ଚଣ୍ଡିଖୋଲ,୭ା୪(ଡି.ଏନ୍.ଏ.): ବଡ଼ଚଣା ବ୍ଲକ ଅନ୍ତର୍ଗତ ବାଲିଚନ୍ଦ୍ରପୁର-ବେଣୀପୁର ରାସ୍ତାରେ ପୂର୍ତ୍ତ ବିଭାଗ ତରଫରୁ ତ୍ରୁଟିପୂର୍ଣ୍ଣ ନାମଫଳକ ଲଗାଯାଇଛି। ଏପ୍ରିଲ ୧ ଓଡ଼ିଶା ଦିବସରେ ଏହି ଫଳକକୁ ଦେଖି ସ୍ଥାନୀୟ ଲୋକେ ବିଭାଗୀୟ ଅଧିକାରୀଙ୍କ ଓଡ଼ିଆ ଭାଷା ପ୍ରୀତିକୁ ନେଇ ପ୍ରଶ୍ନ ଉଠାଇଛନ୍ତି।
ସୂଚନା ଅନୁଯାୟୀ, ଚାରବାଟିଆ ପୂର୍ତ୍ତ ବିଭାଗ ଡିଭିଜନର ବଡ଼ଚଣା ସବ୍ଡିଭିଜନ୍ ଅଧୀନରେ ଏହି ରାସ୍ତାଟି ନିର୍ମାଣ କରାଯାଇଛି। ବାଲିଚନ୍ଦ୍ରପୁରଠାରୁ କଳାଶ୍ରୀ ପର୍ଯ୍ୟନ୍ତ ରାସ୍ତା ପାର୍ଶ୍ୱରେ ବିଭାଗ ତରଫରୁ ଫଳକ ଲଗାଯାଇଛି। ଆମ୍ବସୌରୀ ଗ୍ରାମ ନିକଟରେ ଲାଗିଥିବା ଫଳକରେ ‘ଆମ୍ବସୋରୀ’ ଓଡ଼ିଆରେ ଲେଖାଯାଇଥିବାବେଳେ ପତରାଜ ପୁରଠାରେ ସିଂହ ସାହି ବଦଳରେ ‘ସିଙ୍ଘସାହି’ ବୋଲି ଉଲ୍ଲେଖ ହୋଇଛି। ଇଂଲିଶରେ ବନାନ ଠିକ୍ ଲେଖାଯାଇଥିବାବେଳେ ଓଡ଼ିଆରେ ବନାନ ସମ୍ପୂର୍ଣ୍ଣ ଭୁଲ ହୋଇଛି। ଏଥି ସହିତ ପୂର୍ତ୍ତ ବିଭାଗ ରାସ୍ତା କଡ଼ରେ ବ୍ଲୁ ରଙ୍ଗର ସାଇନ୍ ବୋର୍ଡରେ ଧଳା ଅକ୍ଷରରେ ଲେଖାଯିବାର ନିୟମଥିବାବେଳେ ଏହା ମଧ୍ୟ ତ୍ରୁଟିପୂର୍ଣ୍ଣ ହୋଇଛି। ଜାତୀୟ ରାଜପଥରେ ନୀଳ ରଙ୍ଗର ସାଇନ୍ବୋର୍ଡରେ ଧଳାଅକ୍ଷର ଲେଖାଯିବାର ନିୟମ ଥିବାବେଳେ ଏହାକୁ ପୂର୍ତ୍ତ ବିଭାଗ ଭୁଲବଶତଃ ଆପଣେଇ ନେଇଛି। ସାଇନ୍ ବୋର୍ଡର ରଙ୍ଗ ପରିବର୍ତ୍ତନ ସହିତ ଓଡ଼ିଆ ଭାଷାର ସଂଶୋଧନ ପାଇଁ ସ୍ଥାନୀୟ ଅଞ୍ଚଳବାସୀ ଦାବି କରିଛନ୍ତି। ଏ ସମ୍ପର୍କରେ ବିଭାଗୀୟ ସହକାରୀ ଯନ୍ତ୍ରୀ ପ୍ରଫୁଲ୍ଲ କୁମାର ବେହେରାଙ୍କୁ ପଚାରିବାରେ ସେ ତ୍ରୁଟି ସ୍ବୀକାର କରିବା ସହ ଖୁବ୍ଶୀଘ୍ର ଏହାର ସଂଶୋଧନ କରାଯିବ ବୋଲି କହିଛନ୍ତି।
