କାବୁଲ,୬।୯: ପଞ୍ଜଶିରର ରକ୍ତାକ୍ତ ସଂଘର୍ଷରେ ନର୍ଦନ ଆଲାଏନ୍ସ୍ ମୁଖ୍ୟ କମାଣ୍ଡର ସାଲେହ ମହମ୍ମଦଙ୍କ ମୃତ୍ୟୁ ଘଟିଛି। ତାଲିବାନ୍ କହିଛି ଏବେ ପଞ୍ଜଶିର ପୂର୍ଣ୍ଣ ଦଖଲରେ ରହିଛି। ପଞ୍ଜଶିରରେ ଆତଙ୍କବାଦୀ ସଂଗଠନ ତାଲିବାନର ପତାକା ଲଗାଯାଇଛି। ଏଥିରୁ ତାଲିବାନର ଦାବି ସତ୍ୟ ବୋଲି ଗଣମାଧ୍ୟମ ସଂସ୍ଥାଗୁଡ଼ିକ ପକ୍ଷରୁ ଅନୁମାନ କରାଯାଉଛି। ତାଲିବାନ ପ୍ରବକ୍ତା ଜବିହୁଲା ମୁଜାହିଦ୍ ଏନେଇ ସୂଚନା ଦେଇ କହିଛନ୍ତି ଯେ, ପଞ୍ଜଶିର ଯୁଦ୍ଧର ଅନ୍ତ ଘଟିଛି।
ପୂର୍ବରୁ ସ୍ଥାନୀୟ ଗଣମାଧ୍ୟମ ପକ୍ଷରୁ କୁହାଯାଇଥିଲା ନ୍ୟାସନାଲ ରେଜିଷ୍ଟାନ୍ସ ଫ୍ରଣ୍ଟ ଅଫ ଆଫଗାନିସ୍ତାନ (ଏନ୍ଆର୍ଏଫ୍ଏ) ତାଲିବାନକୁ ଅସ୍ତ୍ରବିରତି ଲାଗି ପ୍ରସ୍ତାବ ଦେଇଥିଲା। ତେବେ ତାଲିବାନ ଏହାକୁ ମନା କରିଦେଇଛି।
ଯଦି ସାଲେହ ମହମ୍ମଦଙ୍କ ମୃତ୍ୟୁ ଘଟିଥାଏ ତେବେ ଏହା ରେଜିଷ୍ଟାନ୍ସ ଫ୍ରଣ୍ଟ ପାଇଁ ଏକ ବଡ଼ ବିପଦ ବୋଲି ବିବେଚନା କରାଯାଉଛି। ସାଲେହଙ୍କ ନେତୃତ୍ୱରେ ତାଲିବାନ ସହିତ ଯୁଦ୍ଧ ଚାଲିଥିଲା।
