କାବୁଲ,୧୧।୮:ଆଫଗାନିସ୍ତାନରେ ଏବେ ଅବସ୍ଥା ଆହୁରି ବିଗିଡି ଯାଇଛି। ତାଲିବାନ ଏବଂ ସରକାରୀ ସାମରିକ ବାହିନୀ ମଧ୍ୟରେ ପ୍ରବଳ ଯୁଦ୍ଧ ଯୋଗୁ ଦେଶର ସ୍ଥିତି ଖରାପ ହେବାରେ ଲାଗିଛି। ତାଲିବାନ ଦେଶର ଉପକଣ୍ଠକୁ କବଜା କରି ଏବେ ପ୍ରଦେଶ ରାଜଧାନୀ ଆଡକୁ ଗତି କରୁଛି। ପରିସ୍ଥିତି ହୋଇଛି ଯେ, ତାଲିବାନ ଆଫଗାନିସ୍ତାନର ୮୦ ପ୍ରତିଶତ କବଜା କରି ସାରିଲାଣି। ଆମେରିକା ସେନା ପ୍ରତ୍ୟାହାର ପରେ ପରିସ୍ଥିତି ଆହୁରି ବିଗିଡି ଯାଇଛି। ଭାରତର ଆଇପିଏଲ, ପାକିସ୍ତାନର ପିଏସଏଲ, ଅଷ୍ଟ୍ରେଲିଆର ବିବିଏଲ ସମେତ ସାରା ବିଶ୍ୱରେ ଅନେକ ଫ୍ରାଞ୍ଚାଇଜ ଲିଗ ଖେଳିଥିବା ଆଫଗାନିସ୍ତାନ ଲେଗ ସ୍ପିନର ରସିଦ ଖାନ ତାଙ୍କ ଦେଶର ଲୋକଙ୍କ ପାଇଁ ବିଶ୍ୱ ନେତାମାନଙ୍କୁ ନିବେଦନ କରିଛନ୍ତି। ୨୨ ବର୍ଷୀୟ ଷ୍ଟାର ସ୍ପିନର ରସିଦ ତାଙ୍କ ଟୁଇଟର୍ରେ ଏକ ସ୍ପର୍ଶକାତର ପୋଷ୍ଟ ଶେୟାର କରିଛନ୍ତି। ସେ ଲେଖିଛନ୍ତି, ବିଶ୍ୱର ନେତାମାନେ, ମୋ ଦେଶ ଅସୁବିଧାରେ ଅଛନ୍ତି। ଶିଶୁ ଏବଂ ମହିଳାଙ୍କ ସମେତ ହଜାର ହଜାର ନିରୀହ ଲୋକଙ୍କୁ ପ୍ରତିଦିନ ହତ୍ୟା କରାଯାଉଛିି, ଘର ଓ ସମ୍ପତ୍ତି ନଷ୍ଟ ହୋଇଯାଉଛି। ଆକ୍ରମଣ ଯୋଗୁ ହଜାର ହଜାର ପରିବାର ବିସ୍ଥାପିତ ହୋଇଛନ୍ତି। ଆମକୁ ଅସୁବିଧାରେ ଛାଡନ୍ତୁ ନାହିଁ। ଆଫଗାନିସ୍ତାନକୁ ରକ୍ଷା କରନ୍ତୁ ଏବଂ ଦେଶକୁ ଧ୍ୱଂସ କର ନାହିଁ। ଆମେ ଶାନ୍ତି ଚାହୁଁଛୁ। ି
ଆଫଗାନିସ୍ତାନ ସରକାରୀ ବାହିନୀ ଏବଂ ତାଲିବାନ ମଧ୍ୟରେ ଚାଲିଥିବା ଯୁଦ୍ଧ ଅନେକ ପରିବାରକୁ ଭୂମିହୀନ କରିଦେଇଛି ଏବଂ ବହୁ ସଂଖ୍ୟାରେ ଶିଶୁ ଓ ମହିଳାଙ୍କୁ ଟାର୍ଗେଟ କରାଯାଇଛି। ଏପରିକି ପିଲାମାନଙ୍କୁ ସଶସ୍ତ୍ର ସଂଗଠନରେ ଯୋଗ ଦେବାକୁ ବାଧ୍ୟ କରାଯାଉଛି।
