ଦିଗପହଣ୍ଡି,୧୭।୬(ଅଶେଷ ନାଥ ମିଶ୍ର): ଗଞ୍ଜାମ ଜିଲା ସାନଖେମୁଣ୍ଡି ବ୍ଲକ ସାହାସପୁର ଗ୍ରାମର ଚନ୍ଦନ ସ୍ବାଇଁଙ୍କ ଠାରୁ ଗ୍ରାମର ଏ.ସନ୍ତୋଷ ପାତ୍ର ଗତ ପ୍ରାୟ ୩ ମାସ ପୂର୍ବେ ଗୃହକାର୍ଯ୍ୟ ନିମନ୍ତେ ୫୫ ହଜାର ଟଙ୍କା ଧାର ନେଇଥିଲେ। ପ୍ରତିଶ୍ରୁତି ମୁତାବକ ନିର୍ଦ୍ଧାରିତ ସମୟରେ ସନ୍ତୋଷ ଧାର ଟଙ୍କା ପରିଶୋଧ ନକରିବାରୁ ଚନ୍ଦନ ନିଜର ଅସନ୍ତୋଷ ପ୍ରକାଶ କରିବା ସହ ସୋମବାର ସନ୍ତୋଷଙ୍କୁ ତୁରନ୍ତ ଟଙ୍କା ପ୍ରଦାନ କରିବାକୁ କହିଥିଲେ। ସନ୍ତୋଷ ଟଙ୍କା ଫେରସ୍ତ ନେବାକୁ ଚନ୍ଦନଙ୍କୁ ରାତି ପ୍ରାୟ ୯ ଟାରେ ତାଙ୍କ ଦୋକାନକୁ ଡକାଇଥିଲେ।ଚନ୍ଦନ ସେଠାରେ ପହଞ୍ଚିବା ପରେ ଉଭୟଙ୍କ ମଧ୍ୟରେ ଟଙ୍କା ଦେଣନେଣକୁ ନେଇ ଯୁକ୍ତିତର୍କ ହୋଇଥିଲା। ଏଥିରେ ସନ୍ତୋଷ ଉତ୍ତେଜିତ ହୋଇ ଏକ ଛୁରୀରେ ଚନ୍ଦନଙ୍କ ପେଟକୁ ଭୂଷି ଦେବା ବେଳେ ସେ ଘୁଞ୍ଚି ଯିବାରୁ ଛୁରୀଟି ତାଙ୍କ ପଛ ପଟେ ବାଜି ରକ୍ତ ବାହାରିଥିଲା। ପରେ ସନ୍ତୋଷ ଏବଂ ତାଙ୍କ ସାଙ୍ଗ ଚେରୁ ରାଉଳ ଚନ୍ଦନଙ୍କୁ ଗାଁରେ ମରଣାନ୍ତକ ଆକ୍ରମଣ କରିଥିଲେ।ଚନ୍ଦନଙ୍କୁ ପରିବାର ଲୋକେ ଉଦ୍ଧାର କରି ନିକଟସ୍ଥ ଆଡ଼ପଡ଼ା ଗ୍ରାମ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ଚିକିତ୍ସା ପରେ ସେ ଘରକୁ ଫେରିଥିଲେ।ଘଟଣାର ପରଦିନ ଚନ୍ଦନଙ୍କ ଭାଇ ଦୀପକ ସ୍ବାଇଁ ପାଟପୁର ଥାନାରେ ପହଞ୍ଚି ଏତଲା ଦେଇଥିଲେ।ଏତଲାକୁ ଭିତ୍ତିକରି ଆଇଆଇସି ଦୀପ୍ତି ରଞ୍ଜନ ବେହେରା ମାମଲା ନଂ.୧୭୪/୨୬ ଅନୁଯାୟୀ ଅଭିଯୁକ୍ତ ଦ୍ବୟଙ୍କ ନାଁରେ ମକଦ୍ଦମା ରୁଜୁ କରିଥିଲେ।ବୁଧବାର ତଦନ୍ତକାରୀ ଅଧିକାରୀ ଏସ.ଆଇ ସୋଲେମାନ ଭୁଁୟା ଅଭିଯୁକ୍ତ ଦ୍ବୟଙ୍କୁ ଗିରଫ କରି କୋର୍ଟ ଚାଲାଣ କରିଥିଲେ।ଜାମିନ ଆବେଦନ ଖାରଜ ହେବାରୁ ଅଭିଯୁକ୍ତ ଦ୍ବୟଙ୍କୁ ଦିଗପହଣ୍ଡି ସବ୍ ଜେଲ ହାଜତକୁ ପଠାଇ ଦିଆଯାଇଛି। ଅଭିଯୁକ୍ତଙ୍କ ନିକଟରୁ ହତ୍ୟା ଉଦ୍ୟମ ମାମଲାରେ ବ୍ୟବହୃତ ଛୁରୀକୁ ତଦନ୍ତକାରୀ ଅଧିକାରୀ ଜବତ କରିଥିବା କହିଛନ୍ତି।
