ଢେଙ୍କାନାଳ ଅଫିସ, ୧୭ା୯: ଢେଙ୍କାନାଳ ସଦର ଥାନା ଅଧୀନ ଇନ୍ଦିପୁରସ୍ଥିତ ନଟାପୋଖରୀରୁ ଶୁକ୍ରବାର ୩ ଅପରିପକ୍ୱ ନବଜାତକଙ୍କ ମୃତଦେହ ଠାବ କରାଯାଇଛି। କୌଣସି ଘରୋଇ କ୍ଲିନିକ୍ରେ ଗର୍ଭପାତ କରାଇବା ପରେ ଘଟଣାକୁ ଲୁଚାଇବା ନିମନ୍ତେ କେହି ମୃତଦେହ ଆଣି ପୋଖରୀରେ ଫିଙ୍ଗି ଦେଇଥିବା ସନ୍ଦେହ କରାଯାଉଛି। ଏଭଳି ଘଟଣା ଜିଲାରେ ପ୍ରଥମ ବୋଲି କୁହାଯାଉଛି। ନବଜାତକଙ୍କ ଲିଙ୍ଗ ପରୀକ୍ଷା ପାଇଁ କଟକ ଏସ୍ସିବି ଫରେନ୍ସିକ୍ ମେଡିସିନ୍ ଆଣ୍ଡ ଟକ୍ସିକୋଲୋଜି (ଏଫ୍ଏମ୍ଟି)କୁ ପଠାଯାଇଥିବାବେଳେ ପୋଲିସ ତନାଘନା ଆରମ୍ଭ କରିଛି।
ଗ୍ରାମବାସୀଙ୍କ କହିବା କଥା, ପ୍ରାତଃ ସମୟରେ କେତେଜଣ ବ୍ୟକ୍ତି ପୋଖରୀକୁ ଗାଧୋଇବାକୁ ଯାଇଥିବାବେଳେ ୩ ଅପରିପକ୍ୱ ନବଜାତକଙ୍କ ମୃତଦେହ ଭାସୁଥିବା ଦେଖିବାକୁ ପାଇଥିଲେ। ଏହାକୁ ନେଇ ଅଞ୍ଚଳରେ ଭିନ୍ନମତ ପ୍ରକାଶ ପାଇଛି। ଲୋକଲଜ୍ଜାରେ କେହି ଜଣେ କୁଅଁାରୀ ମା’ ଗର୍ଭପାତ କରି ଭୂ୍ରଣ ଫିଙ୍ଗି ଦେଇଥିବା ଆଲୋଚନା ଜୋର୍ ଧରିଛି। ଅନ୍ୟ କେତେକଙ୍କ କହିବା କଥା, ହୁଏତ ଜଣେ ମହିଳା ଗର୍ଭପାତ କରିବା ପରେ ପୋଖରୀରେ ଭ୍ରୂଣଗୁଡ଼ିକୁ ଫିଙ୍ଗି ଦେଇଛନ୍ତି। ସର୍ବସାଧାରଣ ବ୍ୟବହାର କରୁଥିବା ପୋଖରୀରେ ମୃତ ଶରୀର ଫିଙ୍ଗାଯିବା ଘଟଣାକୁ ଗ୍ରାମର ପୁରୁଖା ଲୋକେ ସହଜରେ ଗ୍ରହଣ କରିପାରୁନାହାନ୍ତି। ଏଭଳି କାର୍ଯ୍ୟ କରିଥିବା ବ୍ୟକ୍ତିଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସେମାନେ ଦାବି କରିଛନ୍ତି।
ଏ ନେଇ ଇନ୍ଦିପୁର ସରପଞ୍ଚ ଲଳିତା ସାହୁ କୁହନ୍ତି, କୌଣସି ବେସରକାରୀ କ୍ଲିନିକ୍ରେ ଏଭଳି କାର୍ଯ୍ୟ କରାଯାଇଥିବା ସନ୍ଦେହ କରାଯାଉଛି। ଏଭଳି ଘଟଣା ଅତି ଘୃଣ୍ୟ ଓ ନିନ୍ଦନୀୟ। ପ୍ରଶାସନ ଘଟଣାର ତଦନ୍ତ କରି ଦୋଷୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରୁ ବୋଲି ସେ ଦାବି କରିଛନ୍ତି। ଜିଲା ମୁଖ୍ୟ ଚିକିତ୍ସାଧିକାରୀ ଡା. ଅଶୋକ କୁମାର ଦାଶ କୁହନ୍ତି, ୩ ନବଜାତକଙ୍କ ମୃତଦେହ ପରୀକ୍ଷା ପାଇଁ କଟକ ଏସ୍ସିବି ଏଫ୍ଏମ୍ଟିକୁ ପଠାଯାଇଛି। ରିପୋର୍ଟ ଆସିବା ପରେ ଯାହା କିଛି ସ୍ପଷ୍ଟ ହେବ। ଘରୋଇ କ୍ଲିନିକ ଓ ନର୍ସିଂହୋମ୍ରେ ରୁଟିନ୍ ଚଢ଼ାଉ ଜାରି ରହିଛି। ସଦର ଏସ୍ଡିପିଓ ବିକାଶ ବେଉରା କୁହନ୍ତି, ମୃତକଙ୍କ ଡିଏନ୍ଏ ଟେଷ୍ଟ ହେବ। ରିପୋର୍ଟ ଆସିବା ପରେ ପରବର୍ତ୍ତୀ ପଦକ୍ଷେପ ଗ୍ରହଣ କରାଯିବ। ଏ ସଂକ୍ରାନ୍ତରେ ନଂ. ୫୪/୨୨ରେ ଏକ ଅପମୃତ୍ୟୁ ମାମଲା ରୁଜୁ କରାଯାଇଛି।
