ଫୁଲବାଣୀ,୨୫ା୬(ରାକେଶ ରାଉତ): କନ୍ଧମାଳ ଜିଲା ଫିରିଙ୍ଗିଆ ବ୍ଲକ ସାଡିଙ୍ଗିଆ ପଞ୍ଚାୟତ କିଆ ମୁଣ୍ଡାଗାଁ ଜଙ୍ଗଲରୁ ଗତ ୧୩ ତାରିଖରେ ଝୁଲନ୍ତା ମୃତଦେହ ଉଦ୍ଧାର ଘଟଣା ଭିନ୍ନମୋଡ଼ ନେଇଛି। ରବିବାର ପୋଲିସ ଏହି ଘଟଣାର ପର୍ଦ୍ଦାଫାଶ କରିଛି। ଏହା ଏକ ସୁଚିନ୍ତିତ ହତ୍ୟାକାଣ୍ଡ। ତ୍ରିକୋଣୀୟ ପ୍ରେମ କାହାଣୀକୁ ନେଇ ଏହି ହତ୍ୟାକାଣ୍ଡ ହୋଇଛି ବୋଲି ପୋଲିସ କହିଛି। ଏହି ଘଟଣାରେ ସମ୍ପୃକ୍ତ ୫ ଜଣଙ୍କୁ ଗିରଫ କରାଯାଇଛି। ସେମାନେ ହେଲେ ଫିରିଙ୍ଗିଆ ଥାନା ଗୁଜାକ୍ରାଡୁ ଅଞ୍ଚଳର ସୋମନାଥ ଦିଗାଲ, ଚନ୍ଦ୍ରିକା ଦିଗାଲ,ଗୁଜାରା ଦିଗାଲ, କୋଟଗଡ଼ ଥାନା ପାରିଗଡ଼ର ଯତୀନ ବଡ଼ସେଠ ଏବଂ ବାଲିଗୁଡ଼ା ଥାନା ସରୁପଡ଼ା ଗାଁର ଅନନ୍ତ ମଲିକ।
ସୂଚନାଯୋଗ୍ୟ, ଚଳିତମାସ ୧୩ ତାରିଖରେ କିଛି ଲୋକେ କିଆମୁଣ୍ଡା ଜଙ୍ଗଲରେ ଝୁଲନ୍ତା ଅବସ୍ଥାରେ ଜଣେ ଯୁବକଙ୍କ ମୃତଦେହ ଦେଖିବାକୁ ପାଇଥିଲେ। ଘଟଣା ପ୍ରଚାର ହେବା ପରେ ଯୁବକ ଜଣକ ମାଲା ଗ୍ରାମର ରମେଶ ଦିଗାଲଙ୍କ ସାନ ପୁଅ ବସିଆ ବୋଲି ଜଣାପଡ଼ିଥିଲା। ଏନେଇ ବସିଆଙ୍କ ପିତା ଫିରିଙ୍ଗିଆ ଥାନାରେ ପୁଅକୁ ହତ୍ୟା କରାଯାଇଥିବା ନେଇ ଲିଖିତ ଅଭିଯୋଗ କରିଥିଲେ। ପୋଲିସ ଘଟଣାସ୍ଥଳକୁ ଯାଇ ମୃତଦେହ ଉଦ୍ଧାର କରିବା ସହ ଗୋଡ଼ରେ ଆଘାତ ଓ ବିଭିନ୍ନ ପାରିପାର୍ଶ୍ୱିକ ସ୍ଥିତିରୁ ହତ୍ୟା କରାଯାଇଥିବା ନେଇ ସନ୍ଦେହ କରିଥିଲା l ୧୫ ଦିନ ପରେ ପୋଲିସ ତ୍ରିକୋଣୀୟ ପ୍ରେମ ଜନିତ କାରଣରୁ ହତ୍ୟା କରାଯାଇଥିବା ଜାଣିବାକୁ ପାଇଥିଲା। ହତ୍ୟାକାଣ୍ଡ ରେ ବ୍ୟବହୃତ ସାବଳ, କାଠ ଫାଳିଆ ଜବତ କରିବା ସହ ଯୁବକମାନଙ୍କୁ କାବୁ କରିଥିଲା। ବସିଆଙ୍କୁ ସାବଳ ଓ କାଠ ଫାଳିଆରେ ହତ୍ୟା କରି ଜଙ୍ଗଲରେ ଝୁଲାଇ ଦେଇଥିବା ହତ୍ୟାକାରୀମାନେ ସ୍ବୀକାର କରିଛନ୍ତି। ସମସ୍ତଙ୍କୁ କୋର୍ଟ ଚାଲାଣ କରାଯାଇଥିବା ଥାନା ଅଧିକାରୀ ତପନ କୁମାର ନାହାକ ସୂଚନା ଦେଇଛନ୍ତି।
