ନୂଆଦିଲ୍ଲୀ: ଭାରତରେ କ୍ରିକେଟ୍ ସବୁଠାରୁ ପସନ୍ଦିତ ଖେଳ। ଏହାନୁହେଁ ଯେ ଏଠାରେ ଥିବା ପ୍ରଶଂସକମାନେ କେବଳ ଭାରତୀୟ ଖେଳାଳିଙ୍କୁ ପସନ୍ଦ କରିଥାନ୍ତି ବରଂ ଭାରତରେ ବିଦେଶୀ ଖେଳାଳିଙ୍କ ପ୍ରଶଂସକ ମଧ୍ୟ କିଛି କମ୍ ନୁହେଁ। ଭାରତରେ ସବୁଠାରୁ ପସନ୍ଦିତ ବିଦେଶୀ ଖେଳାଳିଙ୍କ ମଧ୍ୟରେ ଦକ୍ଷିଣ ଆଫ୍ରିକାର ପ୍ରାକ୍ତନ ଅଧିନାୟକ ତଥା ‘ମିଷ୍ଟର ୩୬୦ ଡିଗ୍ରୀ’ ଭାବେ ପରିଚିତ ଆବ୍ରାହମ ବେଞ୍ଜାମିନ (ଏବି) ଡି ଭିଲର୍ସ ସର୍ବାଗ୍ରେ ରହିଛନ୍ତି। ନିଜେ ଡି ଭିଲର୍ସ ମଧ୍ୟ ଏହା ସ୍ବୀକାର କରିଛନ୍ତି ଯେ, ତାଙ୍କୁ ଭାରତରେ ବହୁତ ଭଲପାଇବା ମିଳେ। ଏହି କାରଣରୁ ଡି ଭିଲର୍ସ ତାଙ୍କ ଗର୍ଲଫ୍ରେଣ୍ଡଙ୍କୁ ବିବାହ ପାଇଁ ଭାରତରେ ହିଁ ପ୍ରପୋଜ କରିଥିଲେ।
ଭିଲର୍ସଙ୍କୁ ଯେତେବେଳେ ୨୩ ବର୍ଷ ହୋଇଥିଲା ବିଶ୍ୱ କ୍ରିକେଟ୍ରେ ସେ ନିଜର ସ୍ବତନ୍ତ୍ର ପରିଚୟ ସୃଷ୍ଟି କରିପାରିଥିଲେ। ଏହି ସମୟରେ ଡାନିଏଲ୍ ସ୍ବର୍ଟଙ୍କ ସହ ତାଙ୍କର ପ୍ରଥମ ଥର ଲାଗି ସାକ୍ଷାତ୍କାର ହୋଇଥିଲା। ଏବି ଓ ଡାନିଏଲ୍ଙ୍କ ପାରିବାରିକ ସମ୍ପର୍କ ରହିଥିଲା। ତେଣୁ ଏବିଙ୍କ ବାପାଙ୍କ ଫାର୍ମ ହାଉସରେ ଅନୁଷ୍ଠିତ ଏକ ପ୍ରୋଗ୍ରାମ ଅବସରରେ ଉଭୟ ଡି ଭିଲର୍ସ ଓ ଡାନିଏଲ୍ ପରସ୍ପରକୁ ଭେଟିଥିଲେ। ପ୍ରଥମ ଦେଖାରେ ହିଁ ଡି ଭିଲର୍ସ ଡାନିଏଲ୍ଙ୍କୁ ମନ ଦେଇ ବସିଥିଲେ।
କିନ୍ତୁ ସେହି ସମୟରେ ସେ ଏତେ ପରିମାଣରେ ନର୍ଭସ ଥିଲେ ଡାନିଏଲ୍ଙ୍କ ସହ କଥା ହୋଇ ତାଙ୍କଠାରୁ ଫୋନ ନମ୍ବର ଆଣିବାକୁ ସାହସ ଜୁଟାଇପାରି ନ ଥିଲେ। ଏପରିକି ଲାଜକୁରା ସ୍ବଭାବର ଡି ଭିଲର୍ସ ଡାନିଏଲ୍ଙ୍କୁ ହ୍ୟାଲୋ ଛଡ଼ା ଆଉ କିଛି କହିପାରି ନ ଥିଲେ। ଏହାପରେ ସେ ମା’ଙ୍କ ସହାୟତା ନେଇ ଡାନିଏଲ୍ଙ୍କ ଫୋନ ନମ୍ବର ଆଣିବାରେ ସଫଳ ହୋଇଥିଲେ। ଡି ଭିଲର୍ସ ତାଜମହଲ ସମ୍ମୁଖରେ ଡାନିଏଲ୍ଙ୍କୁ ବିବାହ ଲାଗି ପ୍ରପୋଜ କରିଥିବା ତାଙ୍କ ଆତ୍ମଜୀବନୀ ‘ଏବି- ଦି ଅଟୋବାୟୋଗ୍ରାଫି’ରେ ଉଲ୍ଲେଖ କରିଛନ୍ତି। ୨୦୧୩ରେ ଯେତେବେଳେ ଆଇପିଏଲ୍ ଖେଳିବାକୁ ସେ ଭାରତ ଆସିଥିଲେ ସେହି ସମୟରେ ଡାନିଏଲ୍ଙ୍କୁ ମଧ୍ୟ ସାଥୀରେ ଆଣିଥିଲେ। ଉଭୟ ନୂଆଦିଲ୍ଲୀରୁ ଆଗ୍ରା ବୁଲିବାକୁ ଆସିଥିବାବେଳେ ଡି ଭିଲର୍ସ ତାଜମହଲ ସାମ୍ନାରେ ଡାନିଏଲ୍ଙ୍କୁ ବିବାହ ପ୍ରସ୍ତାବ ଦେଇଥିବା ଜଣାପଡ଼ିଛି। ସେହି ବର୍ଷ ହିଁ ଏହି ଚର୍ଚ୍ଚିତ ଯୋଡ଼ି ବିବାହ ବନ୍ଧନରେ ଆବଦ୍ଧ ହୋଇଥିଲେ। ଡି ଭିଲର୍ସଙ୍କର ଆବ୍ରାହମ ଓ ଜନ୍ ନାମରେ ୨ଟି ପୁଅ ଅଛନ୍ତି।
