ନୂଆଦିଲ୍ଲୀ,୨୩।୨: ନିଜର ବିସ୍ଫୋରକ ବ୍ୟାଟିଂକୁ ନେଇ ବେଶ୍ ଲୋକପ୍ରିୟ ଅଷ୍ଟ୍ରେଲିଆ ବ୍ୟାଟ୍ସମ୍ୟାନ୍ ଡେଭିଡ୍ ଓ୍ବାର୍ନର। ସେ ନିଜ ଦମ୍ରେ ମ୍ୟାଚ୍ର କାୟା ପରିବର୍ତ୍ତିତ କରିଦେଇଥାନ୍ତି। ହେଲେ ସେ ଅନେକ ସମୟରେ ଆଘାତ ସମସ୍ୟା ଦେଇ ଗତି କରିଥାନ୍ତି। ଏଥିପାଇଁ ତାଙ୍କୁ ବାଧ୍ୟହୋଇ କ୍ରିକେଟରୁ ଦୂରରେ ରହିବାକୁ ପଡ଼ିଥାଏ। ଏଭଳି ଏକ ଘଟଣାକ୍ରମରେ ସେ ଆସନ୍ତା ଆଇପିଏଲ୍ରେ ଖେଳିବେ କି ନାହିଁ ସେନେଇ ଆଶଙ୍କା ସୃଷ୍ଟି ହୋଇଛି।
ଓ୍ବାର୍ନର ଭାରତ ବିପକ୍ଷ ଦ୍ୱିତୀୟ ଦିନିକିଆ ଖେଳୁଥିବା ବେଳେ ଆହତ ହୋଇଥିଲେ। ଏଥିପାଇଁ ଦଳରୁ ବାହାର ହୋଇଥିଲେ ସେ। ତୃତୀୟ ଟେଷ୍ଟରେ ସେ ଦଳକୁ ଫେରିଥିଲେ ହେଁ ସେ ସମ୍ପୂର୍ଣ୍ଣ ଭାବେ ସୁସ୍ଥ ଲାଗି ନ ଥିଲେ। ଏପରିକି ଚତୁର୍ଥ ଟେଷ୍ଟରେ ସେ ଭଲ ପ୍ରଦର୍ଶନ କରିପାରି ନ ଥିଲେ। ଏବେ ତାଙ୍କୁ ଆଘାତ ଲାଗି ଯନ୍ତ୍ରଣା ହେଉଛି। ଫିଟ୍ ହେବା ପାଇଁ ତାଙ୍କୁ ଆହୁରୀ ୬ରୁ ୯ ମାସ ସମୟ ଲାଗିବ ବୋଲି କୁହାଯାଉଛି। ଏଣୁ ସନରାଇଜର୍ସ ହାଇଦ୍ରାବାଦର ଅଧିନାୟକ ଦାୟିତ୍ୱ କିଏ ତୁଲାଇବ ସେ ନେଇ ଆଶଙ୍କା ଦେଖାଦେଇଛି।
ଅପରପକ୍ଷେ ଏହି କ୍ରିକେଟର ଡାକ୍ତରଙ୍କ ପ୍ରତ୍ୟକ୍ଷ ତତ୍ତ୍ୱାବଧାନତାରେ ନିଜକୁ ଫିଟ୍ କରିବାକୁ ଚେଷ୍ଟା କରୁଛନ୍ତି। ଔଷଧ ନିୟମିତ ସେବନ କରୁଥିବାରୁ ସେ ଆଇପିଏଲ୍ ବେଳକୁ ସୁସ୍ଥ ହୋଇଯିବା ଭାବୁଛନ୍ତି। ସମସ୍ୟା ରହିବ ହେଲେ ଆତ୍ମବିଶ୍ୱାସ ହିଁ ମୂଳକଥା ବୋଲି ସେ କହିଛନ୍ତି।
