ଦାରିଙ୍ଗବାଡି, ୪।୬ (ଅରୁଣ ସାହୁ): କାଳବୈଶାଖୀ ବର୍ଷା ଚାଷୀଙ୍କ ପାଇଁ ଆଣିଛି ଖୁସିର ମୂହୁର୍ତ୍ତ। ପ୍ରଚଣ୍ଡ ଖରାରେ ଚାଷ ଜମି ଫାଟି ଆଁ କରିଥିବାବେଳେ ଏବେ ବର୍ଷା ଯୋଗୁ ମାଟି ଉର୍ବର ହେବା ସହ ଲଙ୍ଗଳ ମାଟି କାଟିବା ଯୋଗୁ ଚାଷୀଙ୍କ ମନରେ ବହୁତ ଖୁସି ଦେଖିବାକୁ ମିଳୁଛି। ଧାନ ଫସଲ ପାଇଁ ଅକ୍ଷୟ ତୃତୀୟାରୁ ଅଖିମୁଠି ଅନୁକୂଳ କରାଯାଇଥିଲେ ସୁଦ୍ଧା ପ୍ରଚଣ୍ଡ ରୌଦ୍ର ତାପରେ ମାଟି ଟାଣ ହୋଇରହିଥିଲା। ଫଳରେ ଚାଷୀ ଧାନ, ମକା, ସୋରିଷ, ତିଳା (ତୈଳ ଜାତୀୟ ଫସଲ )ଭଳି ଫସଲ ପାଇଁ ବିହନ ବୁଣିବା ସମ୍ଭବ ହୋଇ ନ ଥିଲା। ଏବେ ବର୍ଷା ଯୋଗୁ ଏହି ଚାଷ ପାଇଁ ଜମିରେ ଚାଷ ସହ ଜମିକୁ ପ୍ରସ୍ତୁତ କରାଯାଉଥିବା ଦେଖିବାକୁ ମିଳିଛି।
ସେହିପରି ବ୍ଲକ କୃଷି କାର୍ଯ୍ୟାଳୟ ପକ୍ଷରୁ ମଧ୍ୟ ଚଳିତ ବର୍ଷ ଚାଷୀଙ୍କୁ ସମସ୍ତ ସହଯୋଗ କରିବା ପାଇଁ ଜୋରଦାର ପ୍ରସ୍ତୁତି ଚାଲିଥିବା ବ୍ଲକ କୃଷି ଅଧିକାରୀ ସୀତାଂଶୁ କୁମାର ମଲିକ କହିଛନ୍ତି। ସେ କହିଛନ୍ତି, ଚଳିତବର୍ଷ ଅଞ୍ଚଳରେ ୪ ହଜାର ହେକ୍ଟର ଜମିରେ ଧାନ ଚାଷ ପାଇଁ ଜମି ପ୍ରସ୍ତୁତ କରାଯାଉଥିବା ବେଳେ ୨ ହଜାର ହେକ୍ଟର ଜମିରେ ମକା ଚାଷ, ୧ ହଜାର ହେକ୍ଟର ଜମିରେ ସୋରିଷ ଓ ୩ ଶହ ୫୦ ହେକ୍ଟର ଜମିରେ ତିଳା (ତୈଳ ଜାତୀୟ ଫସଲ )ଚାଷ କରାଯିବାକୁ ଲକ୍ଷ ରଖାଯାଇଛି । ପ୍ରାୟ ୮ ହଜାର ଚାଷୀ ଏହି ଚାଷ କରିବାକୁ ନିଜ ଜମି ପ୍ରସ୍ତୁତ ଚଳାଇଥିବା କୁହାଯାଇଛି।
ସେହିପରି ଚଳିତ ବର୍ଷ ରାଜ୍ୟ ସରକାର ଓଡିଶାରେ ଦାରିଙ୍ଗବାଡି ବ୍ଲକକୁ ନୂତନ ଯୋଜନାରେ ସାମିଲ କରାଇଛନ୍ତି। ବଳଭଦ୍ର ଜୈବିକ ଚାଷ ମିଶନରେ ପ୍ରଥମଥର ପାଇଁ ଉକ୍ତ ବ୍ଲକ ସାମିଲ ହୋଇଥିବାବେଳେ ପ୍ରଥମ ପର୍ଯ୍ୟାୟରେ ୪ ହଜାର ୩ ଶହ ୫୨ ହେକ୍ଟର ଜମିରେ ଏହି ଜୈବିକ ସାର ବ୍ୟବହାର କରାଯାଇ ଚାଷୀ ତାର ମନମୁତାବକ ବିହନ ବ୍ୟବହାର କରି ପନିପରିବା, କ୍ଷୁଦ୍ରଦାନା, ଧାନ, ମକା,ତିଳା, ସୋରିଷ ଆଦି ଚାଷ କରିପାରିବେ ଏଥିରେ ଜୈବିକ ସାର ନିମାସ୍ତର, ବ୍ରହ୍ମସ୍ତ୍ର, ଜୀବମୃତ, ବିଜା ମୃତ, ହାଣ୍ଡି ଖତ ବ୍ୟବହାରକୁ ଗୁରୁତ୍ୱ ଦିଆଯିବ। ଏଥିପାଇଁ ସମସ୍ତ ପଞ୍ଚାୟତରେ ତାଲିମ ପ୍ରଦାନ କରାଯିବ ବୋଲି କୃଷି ଅଧିକାରୀ ସୀତାଂଶୁ କୁମାର ମଲିକ କହିଛନ୍ତି। ଜୈବିକ ଚାଷ ଦ୍ୱାରା ଅମଳ ହେବାକୁ ଥିବା ଫସଲକୁ ବଜାରରେ ଚଢା ଦରରେ ବିକ୍ରି ହେବ। ଜୈବିକ ଚାଷରୁ ଅମଳ ହେଉଥିବା ଖାଦ୍ୟ ଶସ୍ୟ ଖାଇବା ଦ୍ୱାରା ଲୋକଙ୍କୁ ଯେକୌଣସି ରୋଗ ତଥା କ୍ୟାନ୍ସର ରୋଗ ଭଳି ଭୟଙ୍କର ରୋଗ ହେବା ଆଶଙ୍କା କମିବ ବୋଲି ସରକାର ଏଭଳି ବଡ଼ ପଦକ୍ଷେପ ନେଉଥିବା କୃଷି ଅଧିକାରୀ କହିଛନ୍ତି।
Dharitri – Odisha’s No.1 Odia Daily
