ଢେଙ୍କାନାଳ ଅଫିସ, ୧୦।୨ – ମିଳନ ପାଇଁ ବ୍ୟାକୁଳ ଦନ୍ତା ଗୋଠରୁ ଅଲଗା ହୋଇ ଜନବସତିରେ ଆରମ୍ଭ କରିଛନ୍ତି ଉପଦ୍ରବ। ପାଖାପାଖି ମାସେ ହେଲା ସେମାନଙ୍କ ହିଂସ୍ର ଆଚରଣରେ ଅତିଷ୍ଠ ହୋଇପଡ଼ିଛନ୍ତି ଢେଙ୍କାନାଳ ଜିଲାର ହାତୀ ଉପଦ୍ରୁତ ଅଞ୍ଚଳବାସୀ। ଗୋଟିଏ କି ଦୁଇଟି ନୁହେଁ, ଜିଲାର ୮ ସ୍ଥାନରେ ସମାନ ସମସ୍ୟା ସୃଷ୍ଟି ହୋଇଛି। ବର୍ଷ ଆରମ୍ଭରୁ ଅଦ୍ୟାବଧି ସେମାନଙ୍କ ହାବୁଡ଼ରେ ପଡ଼ି ୪ଜଣଙ୍କ ଜୀବନ ଗଲାଣି। ଏହାକୁ ନେଇ ବିଭିନ୍ନ ସମୟରେ ଆଇନଶୃଙ୍ଖଳା ପରିସ୍ଥିତି ସୃଷ୍ଟି ହେଉଥିବାବେଳେ ଚିନ୍ତାରେ ପଡ଼ିଛନ୍ତି ବନ କର୍ମଚାରୀ ଏବଂ ପୋଲିସ।
ଢେଙ୍କାନାଳ ଜିଲା ବନ ବିଭାଗର ମୁଣ୍ଡବ୍ୟଥା ବଢ଼ାଇଛି ଗୋଟିକିଆ ଦନ୍ତା। ହାତୀଙ୍କୁ ଘଉଡ଼ାଇବାରେ ବନ କର୍ମଚାରୀଙ୍କ ସମସ୍ତ ଉଦ୍ୟମ ବିଫଳ ହୋଇଛି। ଗତ ଜାନୁୟାରୀରୁ ଫେବୃୟାରୀ ପ୍ରଥମ ସପ୍ତାହ (୫ ସପ୍ତାହ) ମଧ୍ୟରେ ହାତୀ ଆକ୍ରମଣରେ ୪ଜଣଙ୍କ ମୃତ୍ୟୁ ଘଟିଛି। ଜାନୁୟାରୀ ୧୯ରେ ସଦର ରେଞ୍ଜ୍ ଗହମଖୁଣ୍ଟି ଗ୍ରାମର ଚାଷୀ ରମେଶ ସାହୁ, ୨୬ ତାରିଖରେ ଦାମୋଦରନାଳୀଠାରେ ଲଛମନ ମହାନ୍ତି, ୩୧ରେ ଗୋବିନ୍ଦପୁରରେ ଚାଷୀ ପ୍ରଶାନ୍ତ ରାଉତ ଏବଂ ଫେବୃୟାରୀ ୮ରେ ହିନ୍ଦୋଳ ରେଞ୍ଜ୍ ରାସୋଳ ଥାନା ମାନିଆନାଳରେ ରବି ରାଉତଙ୍କ ଜୀବନ ନେଇଛି ଗୋଠଛଡା ଦନ୍ତା।
ଅବାଧ ବିଚରଣ କରୁଥିବା ଦନ୍ତା ଭୟ କାରଣରୁ ସନ୍ଧ୍ୟା ହେଲେ ଗ୍ରାମ ରାସ୍ତା ଶୂନ୍ଶାନ ହୋଇପଡୁଛି। ଧନଜୀବନ ହାନି ଆଶଙ୍କାରେ ହାତୀ ପାଇଁ ରାତି ଉଜାଗର ରହୁଛନ୍ତି ଗ୍ରାମବାସୀ। ଚାଷୀ କ୍ଷେତକୁ ଯାଇପାରୁନାହାନ୍ତି। ଅପରପକ୍ଷେ ହାତୀ ଉପଦ୍ରବ ରୋକିବାକୁ ଅଣାଯାଇଥିବା ‘ଐରାବତ’ ଯାନକୁ ସଦର ରେଞ୍ଜ ଅଞ୍ଚଳରେ ମୁତୟନ କରାଯାଇଛି। ହେଲେ ଗୋଟିକିଆ ହାତୀଙ୍କୁ ଘଉଡ଼ାଇବାରେ ଏହା ସେତେଟା ସଫଳ ହୋଇପାରୁନାହିଁ। ହାତୀ ଆକ୍ରମଣଜନିତ ମୃତ୍ୟୁ ଏବଂ କ୍ଷୟକ୍ଷତିକୁ ନେଇ ଆଇନଶୃଙ୍ଖଳା ପରିସ୍ଥିତି ସୃଷ୍ଟି ହେଉଛି, ଯାହା ଏବେ ବନ ବିଭାଗ ଏବଂ ପୋଲିସ କର୍ମଚାରୀଙ୍କ ଚିନ୍ତା ବଢ଼ାଇଛି।
ମିଳନ ପାଇଁ ବ୍ୟାକୁଳ ହୋଇ କରୁଛନ୍ତି ଉପଦ୍ରବ
ସାଧାରଣତଃ ଡିସେମ୍ବରରୁ ଜାନୁୟାରୀ ହେଉଛି ହାତୀଙ୍କ ମିଳନ ସମୟ। ଏହି ସମୟରେ ଦନ୍ତାହାତୀ ଦଳରୁ ଅଲଗା ହୋଇ ଅଧିକ ଉପଦ୍ରବ କରିଥାନ୍ତି। ଫେବୃୟାରୀ ପରେ ଦନ୍ତାହାତୀଙ୍କ ଏହି ପ୍ରବୃତ୍ତି ସ୍ବାଭାବିକ ଭାବେ କମିଯାଏ। ଜିଲାର ୮ ସ୍ଥାନରେ ଏଭଳି ଗୋଟିକିଆ ଦନ୍ତା ହାତୀ ଉତ୍ପାତ କରୁଛନ୍ତି। ଆକ୍ରମଣରେ ଧନଜୀବନ ହାନି ଘଟୁଛି। ଗୋଟିକିଆ ଦନ୍ତା ବିଚରଣ କରୁଥିବା ସ୍ଥାନଗୁଡ଼ିକ ଉପରେ ବନ ବିଭାଗ ତୀକ୍ଷ୍ମ ନଜର ରଖିଛି। ହାତୀଙ୍କୁ ଘଉଡ଼ାଇବା ଲାଗି ବନ କର୍ମଚାରୀ ଉଦ୍ୟମ ଚଳାଇଛନ୍ତି।
-ଡା. ପ୍ରକାଶଚାନ୍ଦ ଗୋଗିନେନି, ଜିଲା ବନଖଣ୍ଡ ଅଧିକାରୀ
ଘଉଡ଼ାଇବାରେ ବନ ବିଭାଗ ବିଫଳ
ଗୋଠରୁ ଅଲଗା ହୋଇଥିବା ଏକ ଦନ୍ତା ହାତୀ ପାଇଁ ଅଞ୍ଚଳବାସୀ ଆତଙ୍କିତ ଅବସ୍ଥାରେ ରହିଛନ୍ତି। ସଦର ବ୍ଲକ ବେଲଟିକିରି, ନାଗିଆପଶି, କାଇମାଟି, ସୋଗରପଶି ପଞ୍ଚାୟତରେ ହାତୀଟି ଘୂରିବୁଲୁଛି। ସନ୍ଧ୍ୟା ହେଲେ ପଦାକୁ ବାହାରିବାକୁ ଗ୍ରାମବାସୀ ଭୟ କରୁଛନ୍ତି। ବନ କର୍ମଚାରୀ ହାତୀ ଘଉଡ଼ାଇବାରେ ସମ୍ପୂର୍ଣ୍ଣ ବିଫଳ।
-ବଳଭଦ୍ର ସାମଲ, ବେଲଟିକିରି
ଉଜୁଡ଼ିଗଲାଣି କାଜୁ ବଗିଚା
ହାତୀ ପାଇଁ ନିଦ ହଜିଯାଇଛି। ଗୋବିନ୍ଦପୁର ଗ୍ରାମ ନିକଟବର୍ତ୍ତୀ ଅଞ୍ଚଳରେ ଥିବା କାଜୁ ବଗିଚାକୁ ହାତୀ ସମ୍ପୂର୍ଣ୍ଣ ଉଜାଡ଼ି ଦେଲାଣି। ବନ ବିଭାଗର ହାତୀ ଘଉଡ଼ାଇବା କେବଳ ପ୍ରତିଶ୍ରୁତିରେ ସୀମିତ ରହିଛି। ହାତୀ ଅଞ୍ଚଳ ଛାଡ଼ି ଯାଉ ନ ଥିବାରୁ ଚିନ୍ତା ବଢ଼ିବାରେ ଲାଗିଛି। ଲୋକମାନେ ଭୟ ଓ ଆତଙ୍କରେ ଦିନ କାଟୁଛନ୍ତି।
-ସନ୍ତୋଷ ସ୍ବାଇଁ, ଗୋବିନ୍ଦପୁର
