ନୂଆଦିଲ୍ଲୀ,୧୬।୭: ପୁଲିଟର ପୁରସ୍କାର ବିଜେତା ଭାରତୀୟ ଫଟୋ ସାମ୍ବାଦିକ ଦାନିଶ ସିଦ୍ଦିକିଙ୍କୁ ଶୁକ୍ରବାର ଆଫଗାନିସ୍ତାନରେ ହତ୍ୟା କରାଯାଇଛି। ସେ କାନ୍ଦାହାରର ସ୍ପିନ୍ ବୋଲଡାକ ହିଂସାକାଣ୍ଡ ଘଟଣାର କଭରେଜ୍ କରୁଥିଲେ। ଗତ କିଛିଦିନ ଧରି ସିଦ୍ଦିକି କାନ୍ଦାହାରରେ ଥିଲେ। ସେଠାରୁ ବିବାଦର ଚିତ୍ରକୁ ବିଶ୍ୱ ସାମ୍ନାକୁ ଆଣିଥିଲେ। ନିକଟ ଅତୀତରେ ସେ ଆଫଗାନିସ୍ତାନ ସୁରକ୍ଷା ବାହିନୀ ସହ ପ୍ରମୁଖ ଅପରେଶନ କଭର୍ କରିଛନ୍ତି। ଜୁନ ୧୩ରେ ତାଙ୍କ ଟିମ୍ ଉପରେ ଆକ୍ରମଣ ହୋଇଥିବା ନେଇ ସେ ଭିଡିଓ ପୋଷ୍ଟ କରି ଜଣାଇଥିଲେ। ହେଲେ କାନ୍ଦାହାର ଅଞ୍ଚଳରେ ତାଲିବାନ ଓ ଆଫଗାନିସ୍ତାନ ସୁରକ୍ଷା ବାହିନୀ ମଧ୍ୟରେ ଚାଲିଥିବା ହିଂସାତ୍ମକ ସଂଘର୍ଷରେ ସିଦ୍ଦିକିଙ୍କର ମୃତ୍ୟୁ ହୋଇଥିବା କୁହାଯାଉଛି। ଆଫଗାନିସ୍ତାନ ରାଷ୍ଟ୍ରଦୂତ ଫରିଦ ମାମୁଣ୍ଡଜେ ତାଙ୍କ ମୃତ୍ୟୁର ସୂଚନା ଦେଇଛନ୍ତି।
ଦେଶର ଜଣେ ଜଣାଶୁଣା ଫଟୋ ଜର୍ନାଲିଷ୍ଟ ଥିଲେ ଦାନିଶ। ତାଙ୍କୁ ପୁଲିଟର ସମ୍ମାନରେ ସମ୍ମାନିତ କରାଯାଇଥିଲା। ସେ ମୁମ୍ବାଇରେ ରହୁଥିବା ବେଳେ ଖବର ସରବରାହ ସଂସ୍ଥା ରଏଟର ପାଇଁ କାମ କରୁଥିଲେ। ପ୍ରବାସୀ ସଙ୍କଟ ଏବଂ କରୋନାର ଦ୍ୱିତୀୟ ଲହର ସହ ଅନେକ ଗୁରୁତ୍ୱପୂର୍ଣ୍ଣ ଜାତୀୟ ତଥା ଅନ୍ତର୍ଜାତୀୟ ଘଟଣା ବିଷୟରେ ସେ ଦୃଷ୍ଟି ଆକର୍ଷଣ କରିଥିଲେ। କିଛିଦିନରୁ ସେ କାନ୍ଦାହାରରେ ବର୍ତ୍ତମାନର ସଙ୍କଟ ସ୍ଥିତିର କଭରେଜ୍ କରୁଥିଲେ।
ଟେଲିଭିଜନରୁ ସିଦ୍ଦିକି ତାଙ୍କର ସାମ୍ବାଦିକତା ବୃତ୍ତି ଆରମ୍ଭ କରିଥିଲେ। ସେ ୨୦୧୦ରେ ରଏଟରରେ ଯୋଗଦେବା ପୂର୍ବରୁ କିଛି ସମୟ ପାଇଁ ଇନଟର୍ନ ଭାବେ କାର୍ଯ୍ୟ କରିଥିଲେ। ୨୦୧୮ରେ ସେ ଓ ତାଙ୍କ ସହକର୍ମୀ ଅଦନାନ ଆବିଦିଙ୍କୁ ଫିଚର ଫଟୋଗ୍ରାଫି ପାଇଁ ପୁଲିଟର ପୁରସ୍କାର ମିଳିଥିଲା। ଉଭୟ ରୋହିଙ୍ଗ୍ୟା ଶରଣାର୍ଥୀ ସଙ୍କଟର ଉତ୍କୃଷ୍ଟ କଭରେଜ୍ କରିଥିଲେ। କେବଳ ଏତିକି ନୁହେଁ ସେ ଆଫଗାନିସ୍ତାନ, ଇରାକ ଯୁଦ୍ଧ, ରୋହିଙ୍ଗ୍ୟା ଶରଣାର୍ଥୀ ସଙ୍କଟ, ହଂକଂ ବିରୋଧ, ନେପାଳ ଭୂମିକମ୍ପ ଭଳି ଅନେକ ଗୁରୁତ୍ୱପୂର୍ଣ୍ଣ ଘଟଣାକୁ କଭରେଜ୍ କରିଥିଲେ।
