ବାଉଁଶୁଣୀ, ୨୪।୯(ଡି.ଏନ୍.ଏ.): ବୌଦ୍ଧ ବ୍ଲକ ବାଉଁଶୁଣୀ ନିକଟ ଜାତୀୟ ରାଜପଥ ପାଶର୍ବରେ ବାଘନଦୀ କୂଳରେ ଥିବା ପୁରାତନ ଡ଼ାକବଙ୍ଗଳାର ପୁନରୁଦ୍ଧାର କାର୍ଯ୍ୟ ବିଳମ୍ବିତ ହେଉଛି। ଫଳରେ ଅଞ୍ଚଳର ବୁଦ୍ଧିଜୀବୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି। ପୁରାତନ ଡାକବଙ୍ଗଳାର ପୁନରୁଦ୍ଧାର କାର୍ଯ୍ୟ ଆରମ୍ଭ ପାଇଁ ପୂର୍ତ୍ତ ବିଭାଗ ଗତ ଦୁଇ ବର୍ଷ ପୂର୍ବେ ଭାଙ୍ଗି ଦେଇଥିଲା। ଲୋକେ ଆଶା କରିଥିଲେ ଯାହାବି ହେଉ ବିଭାଗ ଏ ବଙ୍ଗଳା ପ୍ରତି ଶୁଭଦୃଷ୍ଟି ପକାଇଲା ବୋଲି। ମାତ୍ର ଦୁଃଖର କଥା ଆଜକୁ ଦୁଇ ବର୍ଷ ହେଲା ଘରର ପୁରୁଣା କାଠ, ଟିଣ, ଛପର ଓ ଶାଳକାଠର ଝରକା କବାଟ ଖୋଲି ନେବା ପରେ ସେମିତି ଲଙ୍ଗଳା କରି ପକାଇ ଦେଇଛନ୍ତି। ଡାକବଙ୍ଗଳା ଜରାଜୀର୍ଣ୍ଣ ଅବସ୍ଥାରେ ରହିଛି। ପ୍ରାୟ ଦୁଇ ବର୍ଷରୁ ଅଧିକ ସମୟ ବିତିଯାଇଥିଲେ ମଧ୍ୟ ଆଜି ପର୍ଯ୍ୟନ୍ତ ନୂତନ ବଙ୍ଗଳା ନିର୍ମାଣ ତ ପରର କଥା ପୁରୁଣା କାନ୍ଥ ବି ଭଙ୍ଗା ଯାଇପାରୁ ନାହିଁ। ପୁରୁଣା ଟିଣ ଓ ଶାଳ କବାଟଗୁଡିକ କେଉଁଆଡେ ଗଲା ତା’ର ଖୋଜ ଖବର ନାହିଁ। ଏଠାରେ ଉଲ୍ଲେଖଯୋଗ୍ୟ ଯେ, ପୂର୍ତ୍ତ ବିଭାଗ ଅଧିନରେ ଥିବା ଏହି ପ୍ରାଚୀନ ଡ଼ାକବଙ୍ଗଳା ଗଡ଼ଜାତ ସମୟରୁ ରହିଥିଲା। ସ୍ବାଧୀନତା ପରେ ଏହାର ପୁରାତନ ଡ଼ାକବଙ୍ଗଳାର ପୁନଃନିର୍ମାଣ କରାଯାଇ ରାଜ୍ୟ ସରକାରଙ୍କ ପୂର୍ତ୍ତ ବିଭାଗ ଅଧିନରେ ରକ୍ଷଣାବେକ୍ଷଣ ହେଉଥିଲା। ଉକ୍ତ ଡ଼ାକବଙ୍ଗଳାକୁ ନେଇ ଅନେକ ସ୍ମୃତି ରହିଛି। ପୂର୍ବତନ ମୁଖ୍ୟମନ୍ତ୍ରୀ ସ୍ବର୍ଗତ ରାଜେନ୍ଦ୍ର ନାରାୟଣ ସିଂଦେଓ, ସ୍ବର୍ଗତ ଜାନକୀ ବଲ୍ଲଭ ପଟ୍ଟନାୟକଙ୍କ ସମେତ ଓଡ଼ିଶାର ଅନେକ ବିଶିଷ୍ଟ ବ୍ୟକ୍ତି ଏଠାରେ ଏକାଧିକ ଥର ବିଶ୍ରାମ ନେଇଛନ୍ତି। ୨୦୦୨ମସିହା ପରଠାରୁ ଏହି ଐତିହାସିକ ବଙ୍ଗଳାର ଦୁର୍ଦ୍ଦିନ ଆସିଥିଲା। ରକ୍ଷଣାବେକ୍ଷଣ ଅଭାବରୁ ଭଗ୍ନ ଅବସ୍ଥାକୁ ଚାଲି ଆସିବା ସହ ଏହାର ପରିବେଶରେ ଅନାବନା ଗଛଲତା ଉଠି ଭୂତକୋଠି ଭଳି ପ୍ରତୀୟମାନ ହୋଇଥିଲା। ଅନେକ ସଚେତନ ବ୍ୟକ୍ତି ଡାକବଙ୍ଗଳାର ପୁନରୁଦ୍ଧାର ପାଇଁ ଦାବି ମଧ୍ୟ କରି ଆସୁଥିଲେ। ପୂର୍ତ୍ତ ବିଭାଗ ପୁନରୁଦ୍ଧାର କାର୍ଯ୍ୟ ଆରମ୍ଭ କରିବାରୁ ସେ ସମୟରେ ଲୋକେ ସାଧୁବାଦ ଜଣାଇଥିଲେ। ମାତ୍ର ପୂର୍ତ୍ତ ବିଭାଗ ଲୋକଙ୍କୁ ହତାସ କରିଛି। କେଉଁ କାରଣରୁ କାହା ସ୍ବାର୍ଥରେ ପୂର୍ତ୍ତ ବିଭାଗ ଏଭଳି ନିଷ୍ପତ୍ତି ନେଇଛି ତାହା ଜନସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି।
