ନୂଆଦିଲ୍ଲୀ,୨୪ା୯: ବର୍ତ୍ତମାନ ବିଶ୍ୱ ବଜାରରେ ମାନ୍ଦାବସ୍ଥା ସୃଷ୍ଟି ହୋଇଛି। ଏପରିକି କିଛି ଅନ୍ତଃରାଷ୍ଟ୍ରୀୟ ସମସ୍ୟା ଯୋଗୁ ଅର୍ଥନୈତିକ ବଜାରରେ ମଧ୍ୟ ଅସ୍ଥିରତା ଦେଖାଦେଇଛି। ଫଳରେ ଭାରତୀୟ ଶେୟାର ବଜାରରେ ମଧ୍ୟ ତା’ର ପ୍ରଭାବ ଗତ କିଛିଦିନ ହେବ ଦେଖିବାକୁ ମିଳୁଛି। ବିଶେଷକରି ଦଲାଲ ଷ୍ଟିଟ୍ରେ ଏହାର ପ୍ରଭାବ ଯୋଗୁ କ୍ରମାଗତ ୩ଦିନ ଲାଗି ଶେୟାର ବଜାର ହ୍ରାସ ପାଇଚାଲିଛି। ବିଶେଷକରି ଆମେରିକାର ସେଣ୍ଟ୍ରାଲ ବ୍ୟାଙ୍କ ଫେଡେରାଲ ରିଜର୍ଭ (ଫେଡ୍ ରିଜର୍ଭ ) ଦ୍ୱାରା ସୁଧ ହାର ବୃଦ୍ଧି କରାଯିବା ପରେ ଭାରତୀୟ ବଜାର ପୁଣି ଥରେ ନିବେଶକଙ୍କ ଭରସା ହରାଇଛି ବୋଲି ଆଶଙ୍କା କରାଯାଉଛି। ଶୁକ୍ରବାର ସପ୍ତାହର ଶେଷ କାର୍ଯ୍ୟ ଦିବସରେ ଭାରତୀୟ ଶେୟାର ବଜାରରେ ଏକ ବଡ଼ ଧରଣର ହ୍ରାସ ଘଟିଛି। ଏହି କାରଣରୁ ନିବେଶକଙ୍କୁ ପ୍ରାୟ ୫ଲକ୍ଷ କୋଟି ଟଙ୍କା (୪,୯୦,୧୬୨.୫୫ କୋଟି) ର କ୍ଷତି ହୋଇଛି। ଅପରପକ୍ଷରେ ବମ୍ବେ ଷ୍ଟକ୍ ଏକ୍ସଚେଞ୍ଜ (ବିଏସ୍ଇ)ର ସେନ୍ସେକ୍ସ ୧୦୨୦.୮୦ ପଏଣ୍ଟ ବା ୧.୭୩% ହ୍ରାସ ସହ ୫୮,୦୯୮.୯୨ ଅଙ୍କରେ ବନ୍ଦ ହୋଇଛି। ବିଏସ୍ଇର କାରବାର ସମୟରେ ଶେୟାର ୧,୧୩୭୭.୭୭ ଅଙ୍କ ତଳକୁ ଖସି ଆସିଥିଲା। ଗୋଟିଏ ସମୟରେ ଏହା ୫୮ ହଜାର ଅଙ୍କରୁ ମଧ୍ୟ ତଳକୁ ଖସି ଆସିଥିଲା। ସେହିଭଳି ନ୍ୟାଶନାଲ ଷ୍ଟକ୍ ଏକ୍ସଚେଞ୍ଜ (ଏନ୍ଏସ୍ଇ) ନିଫ୍ଟି-୫୦ରେ ମଧ୍ୟ ୩୦୨.୪୫ ପଏଣ୍ଟ ବା ୧.୭୨% ହ୍ରାସ ଘଟି ୧୭,୩୨୭.୩୫ ଅଙ୍କରେ କାରବାର ବନ୍ଦ କରିଥିଲା।
ଉଲ୍ଲେଖଯୋଗ୍ୟ, ବିଏସ୍ଇ ମାର୍କେଟ କ୍ୟାପିଟାଲରେ ଶୁକ୍ରବାର ନିବେଶକଙ୍କ ୫ ଲକ୍ଷ କୋଟି ଟଙ୍କାରୁ ଅଧିକ କ୍ଷତି ହୋଇଛି। ଅପରପକ୍ଷରେ ବଜାର କାରବାର ଶେଷରେ ବଜାର ପୁଞ୍ଜି ୨,୭୬,୬୪,୫୬୬.୭୯ କୋଟି ଟଙ୍କା ରହିଥିଲା। ଗୋଟିଏ ଦିନ ପୂର୍ବେ ଏହା ୨,୮୧,୧୭,୬୫୭.୫୭ କୋଟି ଟଙ୍କା ରହିଥିଲା।
ଉଲ୍ଲେଖଯୋଗ୍ୟ, ଶେୟାର ବଜାର ହ୍ରାସ ପଛରେ ଅନେକ କାରଣ ରହିଛି। ତେବେ ସବୁଠୁ ବଡ କାରଣ ହେଉଛି ଆମେରିକା ଫେଡ୍ ରିଜର୍ଭ ବ୍ୟାଙ୍କର ସୁଧ ହାର ବୃଦ୍ଧି। ଏପରିକି ୟୁଏସ୍ ଫେଡ୍ ରିଜର୍ଭ ସୁଧ ହାରରେ ୭୫ ବେସିସ୍ ପଏଣ୍ଟର ବୃଦ୍ଧି କରିଥିଲା। ଏହି ବୃଦ୍ଧି ପରେ ୟୁଏସ୍ର ୧୦ବର୍ଷୀୟ ବଣ୍ଡ ୟିଲ୍ଡରେ ବୃଦ୍ଧି ହୋଇଛି। ସେହିପରି ଡଲାର ସୂଚକାଙ୍କ ମଜଭୁତ ହୋଇଛି। ଏହି କାରଣରୁ ବିଦେଶୀ ନିବେଶକ ଭାରତୀୟ ବଜାରରୁ ଟଙ୍କା ବାହାରକରି ଭଲ ଆୟ ଦେବାକୁ ଥିବା ବଜାରରେ ନିବେଶ କରିବାକୁ ବିଚାର କରୁଛନ୍ତି। ଅନ୍ୟପଟେ ସୁଧ ହାରରେ ବୃଦ୍ଧି ଯୋଗୁ ନିବେଶକଙ୍କ ମଧ୍ୟରେ ମନ୍ଦାବସ୍ଥାର ଭୟ ରହିଛି। ଏଭଳି କିଛି କାରଣରୁ ଅନେକ ଘରୋଇ ନିବେଶକ ନିଜ ଶେୟାର ଠିକ୍ ସମୟରେ ବିକ୍ରି କରୁଛନ୍ତି। ଏହା ପୂର୍ବରୁ ଆସନ୍ତା ସପ୍ତାହରେ ଆର୍ବିଆଇ ଦ୍ୱାରା ପୁଣି ଥରେ ସୁଧ ହାର ବଢ଼ାଇବା ନେଇ ଅନୁମାନ କରାଯାଉଛି। ଏଭଳି ସ୍ଥିତିରେ ନିବେଶକଙ୍କ ଚିନ୍ତା ଅଧିକ ବଢାଇଛି ବୋଲି କୁହାଯାଉଛି।
