ନୂଆପଡ଼ା ଅଫିସ,୨୫।୨: ତେଲଙ୍ଗାନାରେ ବନ୍ଧକ ଥିବା ନୂଆପଡା ସଦର ବ୍ଲକ ବୋଇରଭାଡି ପଞ୍ଚାୟତ ସରାଇପାଲି ଗାଁର ୬ଜଣ ଦାଦନ ଶ୍ରମିକ ଗାଁକୁ ଫେରିଛନ୍ତି। ତେଲଙ୍ଗାନାରେ ବନ୍ଧକ ଥିବା ନେଇ ଗତ ବୁଧବାର ଧରିତ୍ରୀରେ ପ୍ରକାଶ ହେବା ପରେ ଜିଲା ପ୍ରଶାସନ ପକ୍ଷରୁ ତପତ୍ର ଦେଖାଇ ଦାଦନ ଶ୍ରମିକମାନଙ୍କୁ ଉଦ୍ଧାର କରି ଗାଁକୁ ଫେରାଇ ଆଣିଛି। ସୂଚନା ମୁତାବକ ସରେଇପାଲି ଗାଁର ଜୀବନ ବରିହା, ସବିତା ବରିହା, ଘାନା ବରିହା, ସୋହଦ୍ରା ବରିହା, ଅଲେଖ ବରିହା, ଜନକ ବରିହା ପ୍ରମୁଖ ଗତ ଡିସେମ୍ବରରେ ତେଲଙ୍ଗାନାର କାରିମନଗରକୁ ଇଟା ତିଆରି କରିବାକୁ ଯାଇ ସେଠାରେ ବନ୍ଧକ ରହିଥିଲେ। ଇଟାଭାଟି ମାଲିକ ଖାଇବା ବାବଦକୁ ଦେଉଥିବା ଖର୍ଚ୍ଚ ଅତି କମ ହେଉଥିବାରୁ ସେମାନେ ସେଠାରେ କାମ ନ କରି ଫେରି ଆସିବାକୁ କହିଥିଲେ। ଅଗ୍ରୀମ ଟଙ୍କା ନେଇଛ, କାମ ନ କରି କିପରି ଏଠାରୁ ଯିବ କହି ମାଲିକ ସେମାନଙ୍କୁ ଅତ୍ୟାଚାର ଆରମ୍ଭ କରି ଦେଇଥିଲା। ଜୀବନ ବରିହାଙ୍କ କହିବା ମୁତାବକ ମହିଳାମାନଙ୍କୁ ଅଶ୍ଲୀଳ ଭାଷାରେ ଗାଳିଗୁଲଜ କରିବା ସହ ପୁରୁଷମାନଙ୍କୁ ପଶୁ ପରି ପିଟୁଥିଲେ। ନିର୍ଯାତନା ସହି ନ ପାରି ଗାାଁ ଲୋକଙ୍କୁ ଖବର ଦେଇଥିଲୁ। ଗାଁ ଲୋକେ ପରିବାରଙ୍କୁ ଯାଇ କହିବାରୁ ପରିବାର ଲୋକେ ଦାରକରଜ କରି ଅଗ୍ରୀମ ଆଣିଥିବା ଟଙ୍କା ଦାଦନ ସର୍ଦ୍ଧାରଙ୍କୁ ପାଖକୁ ଯାଇ ଫେରସ୍ତ କରିଥିଲେ। ଟଙ୍କା ଫେରସ୍ତ ପରେ ମଧ୍ୟ ଆମକୁ ଘର ଆସିବାକୁ ଦେଉ ନ ଥିଲେ। କାମ କରିବା ପାଇଁ ବାଧ୍ୟ କରୁଥିଲା କାମ କରି ନ ଗଲେ ମାଡିବା ସହ ଅନେକ ନିର୍ଯାତନା ଦେଉଥିଲେ। ସେମାନଙ୍କଠାରୁ ୩ଟି ମୋବାଇଲ ନେଯାଇଥିଲେ। ଗାଁ ଲୋକଙ୍କ ସହିତ କଥା ହେବାକୁ ଦେଉ ନ ଥିଲେ। ବୋଇରଭାଡି ସମିତି ସଭ୍ୟ ଚନ୍ଦନ ବଞ୍ଜାରାଙ୍କ ଉଦ୍ୟମକ୍ରମେ ପ୍ରଥମେ ଧରିତ୍ରୀରେ ଖବର ପ୍ରକାଶ ପରେ ଜିଲା ଶ୍ରମ ବିଭାଗ କାର୍ଯ୍ୟାଳୟ ପକ୍ଷରୁ ତେଲଙ୍ଗାନାର ସହଯୋଗୀ ଅଧିକାରୀଙ୍କ ସହ ଯୋଗସୂତ୍ର ରକ୍ଷା କରି ଦାଦନ ଶ୍ରମିକଙ୍କୁ ସେଠାରୁ ଉଦ୍ଧାର କରିଥିଲା। ନୂଆପଡା ସହକାରୀ ଜିଲା ଶ୍ରମ ଅଧିକାରୀ ଦିବ୍ୟ ଶଙ୍କର ଧରୁଆ ନିଜେ ତଦାରଖ କରଥିବା ବେଳେ ଜିଲା ଶ୍ରମ ଅଧିକାରୀ ରବିନ୍ଦ୍ର ବାର୍ଲା ମଧ୍ୟ ଘଟଣାକୁ ଗୁରୁତ୍ୱ ସହ ନେଇ ତୁରନ୍ତ ଦାଦନ ଶ୍ରମିକମାନଙ୍କୁ ଉଦ୍ଧାର କରିବା ପଦକ୍ଷେପ ନେଇଥିଲେ। ଦାଦନ ଶ୍ରମିକମାନେ ଗୁରୁବାର ତେଲେଙ୍ଗାନାରୁ ବାହାରି ଶୁକ୍ରବାର ସକାଳେ ନିଜ ଗାଁରେ ପହଞ୍ଚତ୍ଥିଲେ। ଗାଁରେ ପହଞ୍ଚତ୍ବା ପରେ ଶ୍ରମିକମାନେ ତାଙ୍କର ଦୁଃଖ କାହାଣୀ ବଖାଣି କାନ୍ଦି ପକାଇଥିଲେ। ଏହି ଖବର ପ୍ରକାଶ ପରେ ଦାଦନ ଶ୍ରମିକମାନେ ଉଦ୍ଧାର ହୋଇଥିବାରୁ ଧରିତ୍ରୀ ଖବରଦାତାଙ୍କୁ ଧନ୍ୟବାଦ ଜଣାଇବା ସହ ସମିତି ସଭ୍ୟ ଚନ୍ଦନ ବଞ୍ଜାରାଙ୍କୁ ଓ ଜିଲ୍ଲା ପ୍ରଶାସନଙ୍କୁ ଧନ୍ୟବାଦ ଜଣାଇଛନ୍ତି।
