ବାଲେଶ୍ୱର ଅଫିସ/ରୂପ୍ସା, ୨୦।୬(ଡି.ଏନ.ଏ.): ବାପା ପାଠ ପଢିବାକୁ ତାଗିଦ୍ କରିବାରୁ ନାବାଳକ ପୁଅ ଘର ଛାଡି ପଳାଇଆସିଲେ। ଶନିବାର ମଧ୍ୟରାତ୍ରରେ ବାଲେଶ୍ୱର ଜିଲା ରୂପ୍ସା ରେଳଷ୍ଟେଶନରେ ସେ ଅସହାୟ ଅବସ୍ଥାରେ ବୁଲୁଥିବା ବେଳେ ଆର୍ପିଏଫ୍ ପୋଲିସ ଉଦ୍ଧାର କରି ଚାଇଲ୍ଡଲାଇନ୍ ସହାୟତାରେ ଜିଲା ଶିଶୁ ମଙ୍ଗଳ କମିଟିକୁ ହସ୍ତାନ୍ତର କରିଛି।
ରୂପ୍ସା ଥାନା ଅଧୀନ ହାତିଆଡ଼ିହା ଗ୍ରାମର ଜଣେ ବ୍ୟକ୍ତି ତାଙ୍କ ୧୨ବର୍ଷର ପୁଅକୁ ପାଠ ପଢ଼ିବାକୁ କହିବାରୁ ରାଗି ଯାଇ ସେ ଘର ଛାଡ଼ି ପଳାଇଆସିଥିଲେ। ରାତିରେ ରୂପ୍ସା ରେଳଷ୍ଟେଶନରେ ବୁଲୁଥିବା ବେଳେ ଆର୍ପିଏଫ୍ ଥାନା ପୋଲିସ ଉକ୍ତ ନାବାଳକଙ୍କୁ ପଚରାଉଚରା କରିବା ପରେ କୌଣସି ଠିକ୍ ତଥ୍ୟ ନ ମିଳିବାରୁ ଚାଇଲ୍ଡଲାଇନ ମୁଖ୍ୟ ପ୍ରଶାନ୍ତ କୁମାର ରାଉତଙ୍କୁ ଖବର ଦେଇଥିଲେ। ରବିବାର ରାଉତ ଏକ ଟିମ୍ ସହ ରୂପ୍ସା ଷ୍ଟେଶନରେ ପହଞ୍ଚତ୍ ନାବାଳକଙ୍କୁ କାଉନ୍ସେଲିଂ କରିବା ପରେ ପିଲାର ପରିଚୟ ପାଇଥିଲେ। ପିଲା ଘରୁ ରାଗି ଆସିବା ଏବଂ ବାପା ତାଗିଦ୍ କରିଥିବାରୁ ପିଲାକୁ ଜିଲା ଶିଶୁ ମଙ୍ଗଳ କମିଟିରେ ହାଜର କରାଇଥିବା ଜଣାପଡ଼ିଛି। ରବିବାର ହୋଇଥିବାରୁ ଶିଶୁ ମଙ୍ଗଳ କମିଟିର ସମ୍ପୂର୍ଣ୍ଣ ଡେସ୍କ ନ ଥିବା କାରଣରୁ ସୋମବାର ବିଚାର କରାଯାଇ ମା’ ବାପାଙ୍କୁ ହସ୍ତାନ୍ତର କରାଯିବ କି ନାହଁି ଜଣାପଡ଼ିବ। ନାବାଳକଙ୍କୁ ଶିଶୁ ମଙ୍ଗଳ କମିଟି ଅଧ୍ୟକ୍ଷ ଭାଗିରଥି ବାରିକଙ୍କ ତତ୍ତ୍ୱାବଧାନରେ ରଖାଯାଇଛି। ଅନ୍ୟପକ୍ଷରେ ଚାଇଲ୍ଡଲାଇନ୍ ମୁଖ୍ୟ ରାଉତ ଉଦ୍ଧାର କାର୍ଯ୍ୟ କରୁଥିବା ବେଳେ ଜଣେ ପୂର୍ବତନ ରେଳ କର୍ମଚାରୀ ନାବାଳକଙ୍କୁ ତାଙ୍କ ପରିବାର ସହ ପଠାଇବା ପାଇଁ ବାଧ୍ୟ କରୁଥିଲେ। ଏହାକୁ ନେଇ ଉଭୟଙ୍କ ମଧ୍ୟରେ କଥା କଟାକଟି ହେବାରୁ କିଛି ସମୟ ପାଇଁ ଉତ୍ତେଜନା ଦେଖାଦେଇଥିଲା। ଏ ସମ୍ପର୍କରେ ରାଉତ ଶିଶୁ ମଙ୍ଗଳ କମିଟିରେ ଲିଖିତ ଅଭିଯୋଗ କରିଛନ୍ତି।
