ମୁମ୍ବାଇ,୧୮।୫: ସାମୁଦ୍ରିକ ଝଡ଼ ତଉକ୍ତାଏ ସୋମବାର ରାତିରେ ଗୁଜରାଟର ସୌରାଷ୍ଟ୍ର ଉପକୂଳ ଡିଉଠାରେ ଲ୍ୟାଣ୍ଡଫଲ୍ କରିଛି। ଏହାର ପ୍ରଭାବରେ ମହାରାଷ୍ଟ୍ରରୁ ଆରମ୍ଭ କରି ଗୁଜରାଟ ପର୍ଯ୍ୟନ୍ତ ଏହାର ତାଣ୍ଡବ ଦେଖିବାକୁ ମିଳିଛି। ବାତ୍ୟା ଯୋଗୁ ବିଭିନ୍ନ ସ୍ଥାନରେ ପ୍ରବଳ ବର୍ଷା ହେବା ସହ ଜୋରରେ ପବନ ବୋହିବାରୁ ବଡ଼ ବଡ଼ ଗଛମାନ ଭାଙ୍ଗିଯାଇଛି। ଇତିମଧ୍ୟରେ ମୁମ୍ବାଇ ନିକଟବର୍ତ୍ତି ସମୁଦ୍ରରେ ଏକ ବେରେଜ ୩୦୫ ନୌକା ବାତ୍ୟା ଯୋଗୁ ଫସିଯାଇଥିଲା। ଯେଉଁଥିରେ ପ୍ରାୟ ୨୭୩ଜଣ ବ୍ୟକ୍ତି ଥିବା କୁହାଯାଉଛି। ଏହାପରେ ଭାରତୀୟ ନୌସେନା ସେମାନଙ୍କୁ ଉଦ୍ଧାର କରିବା ପାଇଁ ରେସକ୍ୟୁ ଅପରେଶନ୍ ଆରମ୍ଭ କରିଥିଲା। ତେବେ ମଙ୍ଗଳବାର ସକାଳ ପର୍ଯ୍ୟନ୍ତ ୧୭୭ ଲୋକଙ୍କୁ ଉଦ୍ଧାର କରାଯାଇଥିବା ଜଣାପଡ଼ିଛି। ଏହି ରେସକ୍ୟୁ ଅପରେଶନ୍ କାର୍ଯ୍ୟରେ ଇଣ୍ଡିଆନ ନାଭାଲ P8I ସର୍ଭିଲାନ୍ସ ଏୟାରକ୍ରାଫ୍ଟ, ଆଇଏନ୍ଏସ୍ କୋଚି, ଆଇଏନ୍ଏସ୍ କୋଲକାତା ଓ ହେଲିକପ୍ଟର ମୁତୟନ ହୋଇଛି ବୋଲି ଭାରତୀୟ ନୌସେନା ଅଧିକାରୀ କହିଛନ୍ତି। ତେବେ ମଙ୍ଗଳବାର ଏହି ଅପରେଶନ୍କୁ ଅଧିକ ତ୍ୱରାନ୍ବିତ କରାଯିବା ସହ ସର୍ଚ୍ଚ ଅପରେଶନ୍ ଜାରି ରହିବ ବୋଲି ଉକ୍ତ ଅଧିକାରୀ ସୂଚନା ଦେଇଛନ୍ତି।
