ବରଗଡ଼ ଅଫିସ୍,୨୩।୧୨: ସୁନା ବ୍ୟବସାୟ ଆଳ ଦେଖାଇ ବରଗଡ଼ରେ ଏକ ସାଇବର କ୍ରାଇମ ଘଟଣା ସାମ୍ନାକୁ ଆସିଛି। ନକଲି ସୁନା ଦେଇ ବରଗଡ଼ ପୌର ପରିଷଦ ଅଧୀନ ୱାର୍ଡ଼ ନଂ-୧୮ ବାନ୍ଦୁଟିକ୍ରା ନିବାସୀ ପ୍ରତିମାରାଣୀ ପ୍ରଧାନଙ୍କଠାରୁ ୧୩ଲକ୍ଷ ୭୨ହଜାର ଟଙ୍କା ଠକେଇ ହୋଇଛି। ଏହି ଘଟଣାରେ ବରଗଡ଼ ଟାଉନ ଥାନା ପୋଲିସ ୨ଜଣଙ୍କୁ ଗିରଫ କରିଛି। ଗିରଫ ଅଭିଯୁକ୍ତ ଦ୍ୱୟ ହେଲେ ବାଲେଶ୍ୱର ଜିଲାର ମନୋଜ କୁମାର ବେରା ଏବଂ ପରମାନନ୍ଦ ବିନ୍ଧାଣୀ। ବରଗଡ଼ ଟାଉନ ଥାନା ପୋଲିସ ସେମାନଙ୍କ ପାଖରୁ ଏକ କାର୍ (ନଂ.ଓଡ଼ି୨୨ବି/୨୧୯୫), ୩ ମୋବାଇଲ, ୨ ଏଟିଏମ୍ କାର୍ଡ ଏବଂ ଅପମିଶ୍ରିତ ୮କି.ଗ୍ରା. ଧାତୁ ଗୁଣ୍ଡ ଆଦି ଜବତ ହୋଇଛି। ଗିରଫ ଅଭିଯୁକ୍ତଙ୍କ ବିରୋଧରେ ଟାଉନ ଥାନାରେ ଦଫା ୪୨୦, ୪୧୯ ଆଇପିସିରେ ଏକ ମାମଲା (ନଂ.୭୯୭/୨୨) ରୁଜୁ ହୋଇଛି ।
ବରଗଡ଼ ଟାଉନ ଥାନାରେ ଗୁରୁବାର ଅନୁଷ୍ଠିତ ଏକ ଖବରଦାତା ସମ୍ମିଳନୀରେ ଥାନାଧିକାରୀ ସତ୍ୟଜିତ କଣ୍ଡନକେଲ ସୂଚନା ଦେଇ କହିଥିଲେ, ଅଭିଯୋଗକାରିଣୀ ପ୍ରତିମା ଗତ ଅକ୍ଟୋବର ୨୧ତାରିଖରେ ବଡ଼ା ବିଜିନେସ୍ ନାମକ ଏକ ନକଲି ଓ୍ବେବ୍ସାଇଟ୍ରୁ ଗୋଟିଏ ମୋବାଇଲ ନମ୍ବର ପାଇଥିଲେ। ସେହି ମୋବାଇଲ ନମ୍ବରରେ ସେ ଅଭିଯୁକ୍ତ ମନୋଜଙ୍କ ସହିତ ଯୋଗାଯୋଗ କରିଥିଲେ। ସେତେବେଳେ ମନୋଜ ପ୍ରତିମାଙ୍କୁ ନଗଦ ଟଙ୍କା ବିନିମୟରେ ଶସ୍ତାରେ ସୁନା ଯୋଗାଇ ଦେବାକୁ କହିଥିଲେ। ଏହି କ୍ରମରେ ଅଭିଯୁକ୍ତ ମନୋଜ ଏବଂ ପରମାନନ୍ଦ ସୁନା ବ୍ୟବସାୟ ଲାଇସେନ୍ସ ପାଇଁ ୨୨ହଜାର ଏବଂ ସୁନା ଯୋଗାଇ ଦେବାକୁ କହି ୧୩ଲକ୍ଷ ୫୦ହଜାର ଟଙ୍କା ପ୍ରତିମାଙ୍କଠାରୁ ନେଇଥିଲେ। କିନ୍ତୁ ପରବର୍ତ୍ତୀ ସମୟରେ ପ୍ରତିମାଙ୍କୁ ସୁନା ବ୍ୟବସାୟ ପାଇଁ ଲାଇସେନ୍ସ ମିଳି ନ ଥିଲା। ଅନ୍ୟପଟେ ଅଭିଯୁକ୍ତମାନେ ସୁନା ଆଳରେ ଅନ୍ୟ ଧାତୁଗୁଣ୍ଡ ଯୋଗାଇଥିଲେ। ଏହା ଜାଣିବା ପରେ ପ୍ରତିମା ବରଗଡ଼ ଟାଉନ ଥାନାରେ ଏତଲା ଦେଇଥିଲେ। ତାଙ୍କ ଏତଲାକୁ ଭିତ୍ତି କରି ପୋଲିସ ତଦନ୍ତ କରି ଅଭିଯୁକ୍ତଙ୍କୁ ଗିରଫ କରିବାଥିଲା। ତେବେ ଗିରଫ ଅଭିଯୁକ୍ତମାନେ ରାଜ୍ୟର ଅନ୍ୟ ଅଞ୍ଚଳରେ ଏଭଳି ଠକେଇ କରିଥିବା ସନ୍ଦେହ କରାଯାଉଛି। ସେ ନେଇ ଅଧିକ ତଦନ୍ତ ଚାଲିଛି ବୋଲି ବରଗଡ଼ ଟାଉନ ଥାନା ଆଇଆଇସି କଣ୍ଡନକେଲ କହିଛନ୍ତି।
