ଜଗତ୍ସିଂହପୁର ଅଫିସ,୨।୧୧: ତିର୍ତ୍ତୋଲ ଉପନିର୍ବାଚନ ରବିବାର ସନ୍ଧ୍ୟାରେ ପ୍ରଚାର ସରିବା ପରେ ନିର୍ବାଚନମଣ୍ଡଳୀ ବାହାରୁ ଆସିଥିବା ନେତା,କର୍ମୀଙ୍କ ରହଣି ଉପରେ କଟକଣା ଜାରି କରାଯାଇଛି। ଏନେଇ ଜିଲା ନିର୍ବାଚନ ଅଧିକାରୀ ସରୋଜ କୁମାର ମିଶ୍ର ଓ ଆରକ୍ଷୀ ଅଧୀକ୍ଷକ ପ୍ରକାଶ ଆର୍ଙ୍କ ପକ୍ଷରୁ ରବିବାର ସନ୍ଧ୍ୟାରୁ ମିଳିତ ଚଢ଼ାଉ ଆରମ୍ଭ ହୋଇଛି। ଉଭୟ ପ୍ରଶାସନିକ ଅଧିକାରୀ ତିର୍ତ୍ତୋଲ ବଜାରସ୍ଥିତ ଆନନ୍ଦ ମଣ୍ଡପରେ ଚଢ଼ାଉ କରିଥିଲେ। ମାତ୍ର କୌଣସି ରାଜନୈତିକ ଦଳର କର୍ମକର୍ତ୍ତା ସେଠାରେ ମିଳି ନ ଥିଲେ। ନିର୍ବାଚନ ଶେଷ ହେବା ପର୍ଯ୍ୟନ୍ତ ଏଭଳି ଚଢ଼ାଉ ଜାରି ରହିବ ବୋଲି ଜିଲା ସୂଚନା ଓ ଲୋକ ସମ୍ପର୍କ ଅଧିକାରୀ କାମିନୀରଞ୍ଜନ ପଟ୍ଟନାୟକ ସୂଚନା ଦେଇଛନ୍ତି। ଭାରତର ନିର୍ବାଚନ କମିଶନଙ୍କ ନିର୍ଦ୍ଦେଶକ୍ରମେ ଜିଲା ପ୍ରଶାସନ ପକ୍ଷରୁ ସ୍ବଚ୍ଛ ନିରପେକ୍ଷ ନିର୍ବାଚନ ପରିଚାଳନା ପାଇଁ ଦୃଢ ପଦକ୍ଷେପ ନିଆଯାଇଛି । ଏନେଇ ଭୋଟ ଗ୍ରହଣ ପୂର୍ବ ୪୮ ଘଣ୍ଟା ମଧ୍ୟରେ କୌଣସି ସ୍ଥାନରେ ରାଜନୈତିକ ଅଭିଯାନ ଉପରେ କଟକଣା ଜାରି କରାଯାଇଛି । ରାତିରେ ଜିଲା ପୋଲିସ ପକ୍ଷରୁ ପ୍ରହରା କଡ଼ାକଡ଼ି କରାଯାଉଛି । ନିର୍ବାଚନମଣ୍ଡଳୀର ସମସ୍ତ କଲ୍ୟାଣ ମଣ୍ଡପ, କମ୍ୟୁନିଟି ହଲ୍, ହୋଟେଲ ଓ ଲଜ୍ ଆଦି ଯାଞ୍ଚ କରାଯାଉଛି। ପ୍ରତ୍ୟେକ ଚେକ୍ ପୋଷ୍ଟରେ ଯାନବାହନଗୁଡ଼ିିକୁ ତନଖି କରାଯାଉଛି। ମୋବାଇଲ ପାର୍ଟି ନିର୍ବାଚନ ମଣ୍ଡଳୀ ସାରା ବୁଲି ଆଦର୍ଶ ଆଚରଣ ବିଧି ଅନୁଧ୍ୟାନ କରିବାକୁ ନିଷ୍ପତ୍ତି ହୋଇଛି । ଏଥିପାଇଁ ନିର୍ବାଚନ ସରିବା ପର୍ଯ୍ୟନ୍ତ ୩୨ ସେକ୍ଟର ଅଫିସର, ୩୨ଟି ପୋଲିସ ମୋବାଇଲ ଟିମ୍କୁ ନିୟୋଜିତ କରାଯାଇଛି।
