ପ୍ରୀତିପୁର,୧୬ା୧(ଡି.ଏନ୍.ଏ.):ବରୁଣେଶ୍ୱର ମେଳା ରବିବାର ୨ୟ ଦିନରେ ପହଞ୍ଚତ୍ଥିବା ବେଳେ ମେଳା ବୁଲିବାକୁ ହଜାରହଜାର ସଂଖ୍ୟାରେ ଜନସାଧାରଣଙ୍କ ସୁଅ ଛୁଟିଛି। ମେଳାରେ ଘର କରଣା ସାମଗ୍ରୀ କିଣିବାକୁ ମହିଳାମାନେ ବିଭିନ୍ନ ଷ୍ଟଲ୍ରେ ଭିଡ଼ ଜମାଉଛନ୍ତି। ଏହି ଅବସରରେ ମେଳା ପଡ଼ିଆ ମଧ୍ୟରେ ବିଞ୍ଝାରପୁର ବ୍ଲକ ପ୍ରଶାସନ ଦ୍ୱାରା ପଲ୍ଲିଶ୍ରୀ ମେଳା ଉଦ୍ଘାଟିତ ହୋଇଛି। ରାଜସ୍ବ ଓ ବିପର୍ଯ୍ୟୟ ପ୍ରଶମନ ବିଭାଗ ମନ୍ତ୍ରୀ ପ୍ରମିଳା ମଲ୍ଲିକ ଯୋଗଦେଇ ଏହାର ଉଦ୍ଘାଟନ କରିଛନ୍ତି। ମନ୍ତ୍ରୀଙ୍କ ସହିତ ବ୍ଲକ ଅଧ୍ୟକ୍ଷା ରଞ୍ଜିତା ଦାସ, ଅରେଇ ସରପଞ୍ଚ ସ୍ମୃତି ସମୀକ୍ଷା ମଲ୍ଲିକ, ମନ୍ତ୍ରୀଙ୍କ ପ୍ରତିନିଧି ପ୍ରଦୀପ କୁମାର ମହାନ୍ତି, ଜୋନସଭ୍ୟ ନନ୍ଦକିଶୋର ସାମଲ, ସଭ୍ୟା ନିନାରାଣୀ ସାମଲ ପ୍ରମୁଖ ଉପସ୍ଥିତ ଥିଲେ। ମେଳାରେ ବିଭିନ୍ନ ସ୍ବୟଂସହାୟକ ଗୋଷ୍ଠୀର ଷ୍ଟଲ୍ ଖୋଲାଯାଇଛି। ଗୋଷ୍ଠୀ ସଦସ୍ୟାମାନେ ନିଜ ଉପତ୍ାଦିତ ସାମଗ୍ରୀମାନ ଏଠାରେ ବିକ୍ରି କରୁଛନ୍ତି। ସେହିପରି ରାଜ୍ୟ ବାହାରୁ ଆସି ଏହି ମେଳାରେ ପସରା ମେଲାଇଥିବା ଶୀତ ବସ୍ତ୍ର, ରାଜସ୍ଥାନୀ ଚୁଡି ଓ କପ୍ ପ୍ଲେଟ୍ ଦୋକାନରେ ଗ୍ରାହକଙ୍କ ଭିଡ଼ ଦେଖିବାକୁ ମିଳିଥିବାବେଳେ ଛୋଟଛୋଟ ପିଲାମାନେ ଚକ୍ରି ଦୋଳି ନିକଟରେ ଭିଡ ଜମାଉଥିବା ଦେଖାଯାଇଛି। ମନ୍ତ୍ରୀ ମଲ୍ଲିକ ଦିନତମାମ ବରୁଣେଶ୍ୱର ଠାରେ ରହି ସମସ୍ତ କାର୍ଯ୍ୟକ୍ରମ ପରିଚାଳନା କରିଛନ୍ତି। ବ୍ଲକ ଅଧ୍ୟକ୍ଷା କେତେଜଣ ମହିଳା ସରପଞ୍ଚ ଓ ଜିଲାପରିଷଦ ସଭ୍ୟାଙ୍କ ସହ ବୁଲି ମେଳାକୁ ଉପଭୋଗ କରୁଥିବା ଘଟଣା ତାଙ୍କ ସମର୍ଥକଙ୍କୁ ଉତ୍ସାହିତ କରିଛି। ବିଞ୍ଝାରପୁର ଥାନା ଅଧିକାରୀ ରଞ୍ଜିତ୍ କୁମାର ମହାନ୍ତିଙ୍କ ନେତୃତ୍ୱରେ ପୋଲିସ ବାହିନୀ ଗାଡ଼ିମୋଟର ଯାତାୟାତ ନିୟନ୍ତ୍ରଣ କରିବା ସହିତ ଶାନ୍ତିଶୃଖଳା ବଜାୟ ରଖିବାରେ ତପତ୍ର ଥିବା ଦେଖାଯାଇଛି।
