ପୁରୀ ଅଫିସ,୨୦ା୮: ପୁରୀରେ କୌଣସି ପ୍ରକାର ଅପରାଧକୁ ବରଦାସ୍ତ କରାଯିବ ନାହିଁ। ଆଧ୍ୟାତ୍ମିକ ସହର ପୁରୀରେ ଅପରାଧ କିମ୍ବା ଅପରାଧୀଙ୍କ କୌଣସି ସ୍ଥାନ ନାହିଁ। ଅପରାଧୀ ଯିଏ ବି ହୁଅନ୍ତୁ ନା କାହିଁକି କାହାକୁ ଛଡ଼ାଯିବ ନାହିଁ। ଆଇନ ଅନୁଯାୟୀ ସେମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ପୁରୀ ଜିଲାର ଅପରାଧୀ ଅପରାଧ ନଚେତ ପୁରୀ ଛାଡ଼ିିଦିଅନ୍ତୁ। ଜିଲାର ପୋଲିସ ମୁଖିଆ ଭାବେ ଦାୟିତ୍ୱ ଗ୍ରହଣ କରିବା ପରେ ଗତମାସ ୨୧ ତାରିଖରେ ଅପରାଧୀଙ୍କୁ ଏମିତି ଢଙ୍ଗରେ କଡ଼ା ଚେତାବନୀ ଦେଇଥିଲେ ଏସ୍ପି ଅଖିଳେଶ୍ୱର ସିଂ। କିନ୍ତୁ ଏହି ଚେତାବନୀକୁ ସତେଯେମିତି ଫୁ’ କରିଛନ୍ତି ଅପରାଧୀ। ପୋଲିସକୁ ଚ୍ୟାଲେଞ୍ଜ ଦେଇ ଘଟାଇଚାଲିଛନ୍ତି ଏକାଧିକ ଆପରାଧିକ କାର୍ଯ୍ୟକଳାପ। ନୂଆ ଏସ୍ପିଙ୍କ ଯୋଗଦାନ ପରେ ଜିଲାରେ ବାଇକ୍ ଲୁଟେରା ଗ୍ୟାଙ୍ଗ, ହାଇପ୍ରୋଫାଇଲ ଜୁଆଡ଼ିି ଧରାପଡ଼ିବା ସହ ୫୦ରୁ ଊର୍ଦ୍ଧ୍ୱ ବାଇକ୍ ଜବତ କରାଯାଇଥିଲେ ସୁଦ୍ଧା ଚୋରି, ଡକାୟତି, ଜୁଆଖେଳ, ଶଟର ତାଡ଼ି ଲୁଟ୍ ଭଳି ଅପରାଧ ବଢ଼ିବାରେ ଲାଗିଛି। ଏପରି କି ପୋଲିସକୁ ଆକ୍ରମଣ କରିବା, ଅଟକ ରଖିବା ସହ ସର୍ଭିସ ବନ୍ଧୁକ ମଧ୍ୟ ଛଡ଼ାଇ ନେଉଛନ୍ତି। ସେହିପରି କୋଭିଡ୍ ସଂକ୍ରମିତଙ୍କୁ ଆଣିବାକୁ ଯାଇ କେତେକ ସ୍ଥାନରେ ଆକ୍ରମଣର ଶିକାର ହୋଇଛନ୍ତି କରୋନା ଯୋଦ୍ଧା।
ଜୁଲାଇ ୨୦ରେ ବାଲୁଖଣ୍ଡ ଅଭୟାରଣ୍ୟରେ ମାନସିକ ବିକାରଗ୍ରସ୍ତ ମହିଳାଙ୍କୁ ଆକ୍ରମଣ ଓ ଦୁର୍ବ୍ୟବହାର ହୋଇଥିଲା। ଉକ୍ତ ଘଟଣାର ୪ଦିନ ପରେ ଅର୍ଥାତ ୨୪ତାରିଖ ରାତି ପ୍ରାୟ ୧୨ଟାରେ କାକଟପୁର ଥାନା ଭଣ୍ଡିସାହି ଗଁାରେ ଏକ ଜୁଆ ଆଡ୍ଡା ଉପରେ ଚଢାଉ କରିଥିଲା କାକଟପୁର ପୋଲିସ। ଜୁଆଡିମାନେ ଛତ୍ରଭଙ୍ଗ ଦେଇଥିବାବେଳେ ପୋଲିସ ୪ ଜଣଙ୍କୁ କାବୁ କରିଥିଲା। ମାତ୍ର ସେମାନଙ୍କୁ ଥାନାକୁ ନେବାବେଳେ ଅଭିଯୁକ୍ତଙ୍କ ସମ୍ପର୍କୀୟ ପୋଲିସ ଗାଡ଼ିକୁ ଅଟକାଇବା ସହ ଆକ୍ରମଣ କରି ସର୍ଭିସ ବନ୍ଧୁକ ଓ ମୋବାଇଲ ଫୋନ ଛଡ଼ାଇ ନେଇଥିଲେ। ଆକ୍ରମଣରେ ଏଏସ୍ଆଇ ସୂର୍ଯ୍ୟମଣି ମାଝି, ହୋମ୍ଗାର୍ଡ ପ୍ରମୋଦ କାଣ୍ଡି ଆହତ ହୋଇଥିଲେ। ୨୬ ତାରିଖରେ ପେଣ୍ଠକଟାରେ କରୋନା ସଂକ୍ରମିତଙ୍କୁ ହସ୍ପିଟାଲ ନେବା ପାଇଁ ସ୍ବାସ୍ଥ୍ୟକର୍ମୀଙ୍କ ସହ ପୋଲିସର ଛକାପଞ୍ଝା ହୋଇଥିଲା। ସ୍ଥାନୀୟ ଅଞ୍ଚଳବାସୀ ପଜିଟିଭ ରିପୋର୍ଟ ଦେଖାଇବା ଦାବି କରି ଯୁକ୍ତିତର୍କ କରିଥିଲେ। ଏପରି କି କରୋନା ସଂକ୍ରମିତଙ୍କୁ ଛଡ଼ାଇ ନେବା ସହ ପୋଲିସ ଏବଂ ସ୍ବାସ୍ଥ୍ୟକର୍ମୀଙ୍କୁ ଆକ୍ରମଣ କରିଥିଲେ। ସେହିପରି ଅଗଷ୍ଟ ୬ରେ ଗୋପ ଥାନା ପୋଲିସ ଏକ ଚୋରି ଘଟଣାରେ ଜଣେ ଅଭିଯୁକ୍ତଙ୍କୁ ଧରିବା ପାଇଁ ରେଢୁଆ ଗଁ।କୁ ଯାଇଥିଲା। ମାତ୍ର ତାହା ମିଥ୍ୟା ଅଭିଯୋଗ ହୋଇଥିବା କହି ଗ୍ରାମବାସୀ ଅଭିଯୁକ୍ତଙ୍କୁ ଛାଡ଼ିି ନ ଥିଲେ। ବରଂ ୨ ଏଏସ୍ଆଇଙ୍କ ସହ ୧୦ ପୋଲିସ କର୍ମୀଙ୍କୁ ୬ଘଣ୍ଟା ଅଟକ ରଖିଥିଲେ। କେବଳ ଏତିକି ନୁହେଁ ଗତ ୨୭ ଦିନ ମଧ୍ୟରେ ଅନେକ ଅପରାଧମୂଳକ ଘଟଣା ଜିଲାରେ ଘଟିଛି। ଆପରାଧିକ କାର୍ଯ୍ୟକଳାପକୁ ରୋକିବାକୁ ଚେଷ୍ଟା କରାଯାଉଥିଲେ ହେଁ ଏହା ରୋକାଯାଇ ପାରୁ ନାହିଁ। ଏ ସମ୍ପର୍କରେ ଏସ୍ପି ଅଖିଳେଶ୍ୱର ସିଂ କହିଛନ୍ତି, ପୁରୀରେ ଯୋଗଦେବାର ମାସଟିଏ ହୋଇନାହିଁ । ଏକାଦିନେ ଜିଲାକୁ ଅପରାଧମୁକ୍ତ କରିହେବ ନାହିଁ। ସମୟ ଲାଗିବ। ୪/୬ ମାସ ପରେ ନିଶ୍ଚିତ ଫରକ କ’ଣ ଲୋକେ ଜାଣିପାରିବେ ବୋଲି ସିଂ କହିଛନ୍ତି।
