କଟକ ଅଫିସ,୨୦ା୧: ଅଦରକାରୀ ସାମଗ୍ରୀରେ ଭିନ୍ନ କଳାକୃତି ଅଙ୍କନ କରି ଜାତୀୟ ସ୍ତରରେ ରେକର୍ଡ ସୃଷ୍ଟି କରିଛନ୍ତି କଟକ ରାଜାବଗିଚା ସର୍ବୋଦୟପୁର ଅଞ୍ଚଳର ଜଣେ ଯୁବକ। ସୁବାସ ମହାନ୍ତି ଓ ଅଳକା ମହାନ୍ତିଙ୍କ ପୁଅ ସ୍ମୃତି ରଞ୍ଜନ ମହାନ୍ତି ମହମରେ ୧ ଇଞ୍ଚର ଜଗନ୍ନାଥ ମୂର୍ତ୍ତି ନିର୍ମାଣ କରି ଇଣ୍ଡିଆ ବୁକ୍ ଓ ଏସିଆ ବୁକ୍ରେ ସ୍ଥାନ ପାଇଛନ୍ତି। ଏହା ବ୍ୟତୀତ ଅଦରକାରୀ କାର୍ଡ ବୋର୍ଡ, ଦିଆସିଲି କାଠି, ଟିସୁ ପେପର ଓ ସୋଲ ବ୍ୟବହାର କରି ୨୭ ସେଣ୍ଟିମିଟରର କେଦାରନାଥ ମନ୍ଦିରର କଳାକୃତି ନିର୍ମାଣ କରିଛନ୍ତି। ଦିଆସିଲ କାଠିରେ ୨ଇଞ୍ଚର ରଥ, ରବରରେ ୨ ସେମିର ଜଗନ୍ନାଥ ମୂର୍ତ୍ତି ଓ ସୋଲରେ ଦଶାବତାର ତିଆରି କରିଛନ୍ତି। କଟକସ୍ଥିତ ଜାତୀୟକବି ବୀରକିଶୋର ମହାବିଦ୍ୟାଳୟ ବାଣିଜ୍ୟ ବିଭାଗର ଯୁକ୍ତ ୨ର ଦ୍ୱିତୀୟ ବର୍ଷର ଛାତ୍ର ସ୍ମୃତି। ପିଲାଟି ଦିନରୁ ତାଙ୍କର ଚିତ୍ରକଳା ପ୍ରତି ବେଶ୍ ଆଗ୍ରହ ଥିଲା। ଏଥିପ୍ରତି ତାଙ୍କୁ ପରିବାର ଲୋକେ ସହଯୋଗ କରିଥିଲେ। ଲକ୍ଡାଉନ ଓ ଶଟ୍ଡାଉନ ସମୟରେ ଅନ୍ଲାଇନ୍ ମାଧ୍ୟମରେ ଜାତୀୟସ୍ତରୀୟ ପ୍ରତିଯୋଗିତାରେ ଭାଗନେଇ ଅଦରକାରୀ ସାମଗ୍ରୀରେ କଳାକୃତି ତିଆରି କରି ପୁରସ୍କୃତ ହୋଇଥିଲେ। ଏହାପରେ କଳାକୃତି ଅଙ୍କନ ପ୍ରତି ତାଙ୍କର ଆଗ୍ରହ ବଢିଥିଲା। ଏନେଇ ସ୍ମୃତି କହିଛନ୍ତି, ଆମେ ଅଦରକାରୀ ସାମଗ୍ରୀକୁ ଫିଙ୍ଗି ଦେଇଥାଉ। ହେଲେ ସେହି ସାମଗ୍ରୀକୁ ବ୍ୟବହାର କରି କିପରି ନୂତନ କଳାକୃତି ପ୍ରସ୍ତୁତ କରାଯାଇପାରିବ ତାହାହିଁ ମୋର ଲକ୍ଷ୍ୟ।
