ଏରସମା,୨୬ା୮(ଦୀପ୍ତି ରଞ୍ଜନ ଖଣ୍ଡୁଆଳ): ଏରସମା ବ୍ଲକ ମୁଖ୍ୟାଳୟ ପଞ୍ଚାୟତସ୍ଥିତ ସିହା ଗ୍ରାମରେ ଆଦର୍ଶ ବିଦ୍ୟାଳୟ ନିର୍ମାଣ ଚାଲିଛି। ତେବେ ଏହି କାର୍ଯ୍ୟ ନିମ୍ନମାନର ହେଉଥିବା ଅଭିଯୋଗ କରି ଗ୍ରାମବାସୀ ଅସନ୍ତୋଷ ପ୍ରକାଶ କରିଛନ୍ତି । କାର୍ଯ୍ୟ ଶେଷ ନ ହେଉଣୁ କାନ୍ଥରେ ଫାଟି ସୃଷ୍ଟି ହୋଇଛି ବୋଲି ସେମାନେ କହିଛନ୍ତି। ଫଳରେ ବିଦ୍ୟାଳୟ ଗୃହର ସ୍ଥାୟିତ୍ୱ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି।
ବିଦ୍ୟାଳୟ ପାଇଁ ୩ ମହଲା ବିଶିଷ୍ଟ ଗୃହ ନିର୍ମାଣ କରାଯାଉଛି । ଏନେଇ ସୂଚନା ଫଳକ ଅନୁସାରେ ୮କୋଟି ୭୭ ଲକ୍ଷ ବ୍ୟୟ ବରାଦ କରାଯାଇଛି । ୨୦୨୪ ଜାନୁୟାରୀ ସୁଦ୍ଧା କାର୍ଯ୍ୟ ଶେଷ କରିବାକୁ ଫଳକରେ ଦର୍ଶାଯାଇଛି। ୨ ମହଲା ଗୃହ ନିର୍ମାଣପରେ ଏବେ ତୃତୀୟ ମହଲା ପାଇଁ କାର୍ଯ୍ୟ ଚାଲିଛି। ତେବେ ଏହି ଅଟ୍ଟାଳିକାର ବାହାର ପଟ ପ୍ଲାଷ୍ଟର କରାଯାଇ ନ ଥିବାବେଳେ ଭିତର ପାର୍ଶ୍ୱ ପ୍ଲାଷ୍ଟର କରାଯିବା ସହ ରଙ୍ଗ କରାଯାଇଛି। ଏଠାରେ ୬ଷ୍ଠ ଓ ୭ମ ଶ୍ରେଣୀର ପିଲାମାନଙ୍କୁ ପାଠ ପଢ଼ାଯାଉଛି ା ମାତ୍ର ବିଦ୍ୟାଳୟର ଭିତରପଟ ପ୍ଲାଷ୍ଟର ଓ ରଙ୍ଗ ହୋଇଥିବା ପୋର୍ଟିକୋ ସଂଲଗ୍ନ ଗୃହ କାନ୍ଥରେ ଫାଟ ସୃଷ୍ଟି ହୋଇଛି ା ସରପଞ୍ଚ ସଚ୍ଚିଦାନନ୍ଦ ଦାସ, ଗ୍ରାମ୍ୟ କମିଟି ସଭାପତି ଆଶିଷ କୁମାର ସ୍ବାଇଁ, ସିହା ଗ୍ରାମ ସ୍ବାମୀ ବିବେକାନନ୍ଦ ସ୍ମାରକ ଯୁବ ସଙ୍ଗଠନର ସଭାପତି ଅଞ୍ଜନ କୁମାର ସ୍ବାଇଁ, ଏରସମା ସଚେତନ ନାଗରିକ ମଞ୍ଚ ସଭାପତି ପ୍ରବୀର ପଣ୍ଡା, ଗ୍ରାମବାସୀ ଯୁଗଳ କିଶୋର ସ୍ବାଇଁ, ପ୍ରତାପ କେଶରୀ ସ୍ବାଇଁ, ଶକ୍ତି ପ୍ରସନ୍ନ ସାମନ୍ତରାୟ ଏବଂ ୱାର୍ଡ ସଭ୍ୟ ସୁଶାନ୍ତ କୁମାର ସ୍ବାଇଁ ପ୍ରମୁ୍ଖ ଏନେଇ ଉଦବେଗ ପ୍ରକାଶ କରିଛନ୍ତି । ବିଭାଗୀୟ ଉଚ୍ଚ କର୍ତ୍ତୃପକ୍ଷ ଏନେଇ ପଦକ୍ଷେପ ନେବାକୁ ଦାବି କରିଛନ୍ତି। ବିଦ୍ୟାଳୟ ଗୃହ ନିର୍ମାଣ ଦାୟିତ୍ୱରେ ଥିବା କନିଷ୍ଠ ଯନ୍ତ୍ରୀ ବେଦବ୍ୟାସ ସ୍ବାଇଁ କହିଛନ୍ତି, ଏହି ଘଟଣା ସମ୍ପର୍କରେ ତଦନ୍ତ କରିବା ପରେ ପରବର୍ତ୍ତୀ ପଦକ୍ଷେପ ନିଆଯିବ।
