ପୁରୀ ଅଫିସ,୨୨।୩:ଶ୍ରୀମନ୍ଦିର ନାଟମଣ୍ଡପରେ ଫାଟ ହୋଇଛି। ସୋମବାର ନାଟମଣ୍ଡପ କାନ୍ଥରେ ୪ଟି ଫାଟ ଦେଖିବାକୁ ମିଳିଛି। ଏଥିମଧ୍ୟରେ ୩ଟି ଛୋଟ ଓ ଗୋଟିଏ ବଡ଼ ଫାଟ ରହିଛି। ବଡ଼ଫାଟର ଲମ୍ବ ୨ଫୁଟ୍ରୁ ଅଢ଼େଇ ଫୁଟ୍ ହୋଇଥିବାବେଳେ ଓସାର ୧ଫୁଟ୍ରୁ ଅଧିକ ରହିଛି। ରଥଯାତ୍ରା ସମୟରେ ନାଟମଣ୍ଡପ ମରାମତି କରାଯାଇଥିଲା। କ୍ଲାମ୍ପ ଯୋଗେ ଭାରତୀୟ ପ୍ରତ୍ନତତ୍ତ୍ବ ସର୍ବେକ୍ଷଣ ସଂସ୍ଥା (ଏଏସ୍ଆଇ) ଦ୍ୱାରା ମରାମତି କାର୍ଯ୍ୟ ହୋଇଥିଲା। ମାତ୍ର କ୍ଲାମ୍ପ ଚାପରେ ଏବେ ପୁଣି ଫାଟ ସୃଷ୍ଟି ହୋଇଥିବା ଅନୁମାନ କରାଯାଉଛି। କ୍ରମଶଃ ଫାଟ ବଢ଼ିବା ଆଶଙ୍କା ଦେଖାଦେଇଛି। ଏଭଳି ସ୍ଥିତିରେ ଏହାକୁ ତୁରନ୍ତ ମରାମତି କରାଯିବା ଉଚିତ ବୋଲି ଜଗନ୍ନାଥପ୍ରେମୀ ମତ ଦେଇଛନ୍ତି।
ଜଣେ ସେବାୟତଙ୍କ କହିବା ଅନୁଯାୟୀ, ଅନେକ ସ୍ଥାନରେ ଫାଟ ହୋଇଛି। ଜଗମୋହନ ସମେତ ନାଟମଣ୍ଡପର ମଧ୍ୟ ମରାମତି ଆବଶ୍ୟକ। ଏଏସ୍ଆଇ ଏବଂ ଶ୍ରୀମନ୍ଦିର ପ୍ରଶାସନ ଏନେଇ ତତ୍ପରତା ଦେଖାଉନାହାନ୍ତି। ସେହିପରି ଆଇନଜୀବୀ ଶରତ କୁମାର ରାୟଗୁରୁ କହିଛନ୍ତି, ଗୋଟିଏ ପଟେ ୮ଶହ ବର୍ଷର ପୁରୁଣା ମନ୍ଦିର ଭିତ୍ତିଭୂମିରେ ଫାଟ ଦେଖାଯାଉଥିବାବେଳେ ପ୍ରଶାସନ ମରାମତି ଲାଗି ପଦକ୍ଷେପ ନେବା ପରିବର୍ତ୍ତେ ପରିକ୍ରମା ପ୍ରକଳ୍ପ ନାମରେ ଖନନ କରିବାରେ ବ୍ୟସ୍ତ ରହିଛି। ବଡ଼ଧରଣର ଖନନ କାର୍ଯ୍ୟ କରାଯାଉଛି, ଯାହା ଆଗାମୀ ଦିନରେ ଶ୍ରୀମନ୍ଦିରର ଅନ୍ୟ ଭିତ୍ତିଭୂମିକୁ ପ୍ରଭାବିତ କରିବ ବୋଲି ଆଶଙ୍କା ସୃଷ୍ଟି ହେଲାଣି। ନାଟମଣ୍ଡପ ଫାଟ ସ୍ପଷ୍ଟ ଭାବେ ଦିଶୁଥିଲେ ମଧ୍ୟ ଏଥିପ୍ରତି କାହାରି ଧ୍ୟାନ ନାହିଁ। ତେଣୁ ପ୍ରଶାସନ ଶ୍ରୀମନ୍ଦିର ସୁରକ୍ଷାକୁ ଗୁରୁତ୍ୱର ସହ ନେଉଥିବା ମନେ ହେଉନାହିଁ। ଫାଟ ମରାମତି ଦିଗରେ ପ୍ରଶାସନ ପଦକ୍ଷେପ ନ ନେଲେ ଆଗାମୀ ଦିନରେ ସ୍ଥିତି ଆହୁରି ଖରାପ ହେବ ବୋଲି ରାୟଗୁରୁ କହିଛନ୍ତି। ସୂଚନା ଅଧିକାର କର୍ମୀ ଦିଲୀପ କୁମାର ବରାଳ କହିଛନ୍ତି, ଶ୍ରୀମନ୍ଦିର ୮ଶହ ବର୍ଷର ପୁରୁଣା ମନ୍ଦିର ହୋଇଥିବାରୁ ଭିତ୍ତିଭୂମି ସାମାନ୍ୟ ଦୁର୍ବଳ ହେବାରେ ଲାଗିଛି। ନାଟମଣ୍ଡପ, ଜଗମୋହନ ଓ ଶ୍ରୀମନ୍ଦିର ଭିତରଭଣ୍ଡାର ସ୍ଥିତି ଦୁର୍ବଳ ଥିବାବେଳେ ମନ୍ଦିରର ବିଭିନ୍ନ ସ୍ଥାନରେ ଫାଟ ଦେଖିବାକୁ ମିଳିଲାଣି। ରାଜ୍ୟ ସରକାର ଶ୍ରୀମନ୍ଦିର ସୁରକ୍ଷାକୁ ପ୍ରାଥମିକତା ଦେଇ ଯୁଦ୍ଧକାଳୀନ ଭିତ୍ତିରେ ମରାମତି କାର୍ଯ୍ୟ କରିବା ଦରକାର। ଅନ୍ୟପକ୍ଷରେ ଏନେଇ ଶ୍ରୀମନ୍ଦିର ପ୍ରଶାସନ ପକ୍ଷରୁ କୌଣସି ପ୍ରତିକ୍ରିୟା ମିଳିପାରିନାହିଁ।
