ଆରଡ଼ି, ୧୯।୧ (ଡି.ଏନ.ଏ.): ଥରେ କି ଦୁଇଥର ନୁହେଁ ଲଗାତର ୭ ବର୍ଷ ହେଲା ୨୦ ନଂ. ଜାତୀୟ ରାଜପଥ ଦବୁଛି। ଯାହାକି ବୈତରଣୀ ନଦୀର ସୁରକ୍ଷା ବନ୍ଧ। ଏଠାରେ ପ୍ରତିବର୍ଷ ରାସ୍ତା ମରାମତି ହେଉଥିଲେ ମଧ୍ୟ ପୁଣି ଉକ୍ତ ନିର୍ଦ୍ଦିଷ୍ଟ ସ୍ଥାନରେ ଧସୁଛି। ଦୁଇବର୍ଷ ତଳେ ଏକ୍ସପର୍ଟ ଟିମ୍ ଏଠାକୁ ଆସି ମୃତ୍ତିକା ପରୀକ୍ଷା କରିବା ସହ ମରାମତି କାର୍ଯ୍ୟ ସମ୍ପର୍କରେ ବିଭାଗୀୟ ଅଧିକାରୀଙ୍କୁ ପରାମର୍ଶ ଦେଇ ଫେରିଥିଲେ। ହେଲେ କିଛି ସୁଫଳ ମିଳି ନ ଥିବା ସ୍ଥାନୀୟ ଲୋକେ କହିଛନ୍ତି। ଭଦ୍ରକ ଜିଲା ଚାନ୍ଦବାଲି ବ୍ଲକ ଅଧୀନ ଓଳଗ ପଞ୍ଚାୟତ ସାଠିବାଙ୍କୁଡ଼ା ଓ ବୋଡ଼କ ମଝିରେ ଥିବା ଏହି ସୁରକ୍ଷା ବନ୍ଧରେ ବୁଧବାର ୩୦ ଫୁଟ ଲମ୍ବ ଓ ୧ ଫୁଟ ଗଭୀରର ଏକ ଫାଟ ସୃଷ୍ଟି ହୋଇଛି।
୨୦୨୦ରେ ହୋଇଥିବା ବନ୍ୟାରେ ଏଠାରେ ରାସ୍ତା ଦବିଥିଲା। ଗତବର୍ଷ ଠିକାଦାରଙ୍କ ଦ୍ୱାରା ମରାମତି କରାଯାଇଥିଲା। ହେଲେ ବର୍ଷକ ପରେ ରାସ୍ତାରେ ଫାଟ ସୃଷ୍ଟି ହେବାକୁ ସେଇ ସାଧାରଣରେ ଅସନ୍ତୋଷ ଦେଖାଦେଇଛି। ଆରଡ଼ିରୁ ଯାଜପୁର ଦେଇ କଟକ ଓ ଭୁବନେଶ୍ୱରକୁ ପ୍ରତିଦିନ ବସ୍, ଟ୍ରକ୍, ମିନି ଟ୍ରକ୍ ଆଦି ଯାତାୟାତ କରିଥାଏ। ଏହି ଫାଟ ସୃଷ୍ଟି ହେବା ଫଳରେ ଯାନବାହାନ ଯାତାୟାତରେ ଅସୁବିଧା ହେବାର ଆଶଙ୍କା ରହିଛି। ନିମ୍ନମାନର ମରାମତି ଯୋଗୁ ବାରମ୍ବାର ଏଭଳି ଫାଟ ସୃଷ୍ଟି ହେଉଥିବା ସ୍ଥାନୀୟ ଲୋକେ କହିଛନ୍ତି। ୨୦୧୫ ଠାରୁ ଏହି ସ୍ଥାନରେ ରାସ୍ତା ବାରମ୍ବାର ଦବିବା ଓ ଧସିବା ଯୋଗୁ ଅଭାବନୀୟ ପରିସ୍ଥିତି ଉପୁଜୁଥିବା ବେଳେ ନିମ୍ନମାନର ମରାମତି କାର୍ଯ୍ୟ ତଦନ୍ତ ସାପେକ୍ଷ ବୋଲି କହିଛନ୍ତି ପୂର୍ବତନ ସରପଞ୍ଚ କିଶୋର ନାୟକ। ଏ ସମ୍ପର୍କରେ ବିଭାଗୀୟ କନିଷ୍ଠ ଯନ୍ତ୍ରୀ ଶୁଭସ୍ମିତା ପାଣିଙ୍କୁ ପଚାରିବାରୁ ଉକ୍ତ ସ୍ଥାନରେ ବୈତରଣୀ ନଦୀର ପାଣି ମାଡ଼ ହେଉଥିବାରୁ ରାସ୍ତା ବାରମ୍ବାର ଧସିବା ସହ ଫାଟ ମଧ୍ୟ ସୃଷ୍ଟି ହେଉଛି। ଏଠାରେ ଆଉ ଏକ ସୁରକ୍ଷା ବନ୍ଧର ଆବଶ୍ୟକତା ରହିଛି। ଏଥିଲାଗି ଅଧିକ ଅର୍ଥ ଆବଶ୍ୟକ ବୋଲି ସେ କହିଛନ୍ତି।
