ପୁରୀ ଅଫିସ,୬ା୧: ପୁରୀସ୍ଥିତ ରାଧାବଲ୍ଲଭ ମଠରେ ମଙ୍ଗଳବାର ଅଖିଳ ଭାରତୀୟ ସନ୍ଥ ସମିତି ଓଡ଼ିଶା ଶାଖାର ଅଧିବେଶନ ଅନୁଷ୍ଠିତ ହୋଇଯାଇଛି। ଏଥିରେ ସମିତିର ଓଡ଼ିଶା ଶାଖା ସଭାପତି ସ୍ବାମୀ ଶଙ୍କରାନନ୍ଦ ଗିରି ପୌରୋହିତ୍ୟ କରିଥିଲେ। ଅଯୋଦ୍ଧାରେ ନିର୍ମାଣାଧୀନ ରାମ ମନ୍ଦିର ପାଇଁ ପ୍ରତ୍ୟେକ ବ୍ୟକ୍ତି ଅନୂ୍ୟନ୍ୟ ୧୦ ଟଙ୍କା ଦାନ କରିବା ପାଇଁ ଅଧିବେଶନରେ ନିବେଦନ କରାଯାଇଛି। ରାମଜନ୍ମ ଭୂମିଠାରେ ସମସ୍ତ ଭକ୍ତଙ୍କ ସୁବିଧା ଦର୍ଶନ ପାଇଁ ସମିତି ନିଷ୍ପତ୍ତି ନେଇଛି। ସେଠାରେ ମ୍ୟୁଜିୟମ୍, ଡକ୍ୟୁମେଣ୍ଟାରୀ ଚଳଚ୍ଚିତ୍ର ପ୍ରଦର୍ଶନ ପାଇଁ ସମିତି ପକ୍ଷରୁ ବ୍ୟବସ୍ଥା କରାଯିବ। ମନ୍ଦିର ପରିଚାଳନା କାର୍ଯ୍ୟରେ ଦୁଇ ଜଣ ଆଇଏଏସ୍ ଅଫିସର, ୨/୩ ଜଣ ଆଇପିଏସ୍ ଅଫିସର ଓ ମନ୍ଦିର ପାଇଁ ସ୍ବତନ୍ତ୍ର ପୋଲିସ ବ୍ୟବସ୍ଥା କରିବା ଉପରେ ସମିତି ଦାବି କରିଛି। ମନ୍ଦିର ପାଇଁ ଏକ ମିଡିଆ ଅଫିସ ନିର୍ମାଣ କରାଯିବ। ଏତଦ୍ବ୍ୟତୀତ ଧର୍ମରକ୍ଷା, ଗୋ-ରକ୍ଷା, ମନ୍ଦିର ଓ ସନ୍ଥଙ୍କ ସୁରକ୍ଷା ଭଳି ପ୍ରସଙ୍ଗ ଉପରେ ଉକ୍ତ ଅଧିବେଶନରେ ଆଲୋଚନା ହୋଇଥିଲା। ନକଲି ସନ୍ଥମାନଙ୍କୁ ଚିହ୍ନଟ କରି ଦଣ୍ଡିତ କରାଯିବା ଉପରେ ସମିତି ନିଷ୍ପତ୍ତି ନେଇଛି। ଜନ୍ମ ନିୟନ୍ତ୍ରଣକୁ ଅଗ୍ରାଧିକାର ଦେଇ କମନ୍ ସିଭିଲ୍ କୋର୍ଡ ଲାଗୁ କରିବା ପ୍ରସଙ୍ଗ ଉପରେ ଗୁରୁତ୍ୱ ଦେବା ପାଇଁ ସମତି ପକ୍ଷରୁ ସ୍ପଷ୍ଟ କରାଯାଇଛି। ଏହି ବୈଠକରେ ରାଧାବଲ୍ଲଭ ମଠ ମହନ୍ତ ରାମକୃଷ୍ଣ ଦାସ, ସ୍ବାମୀ ସତ୍ୟାନନ୍ଦ ଗିରି ମହାରାଜ ଓ ଶ୍ରଦ୍ଧାନନ୍ଦ ସରସ୍ବତୀ ପ୍ରମୁଖ ଉପସ୍ଥିତ ଥିଲେ।
