ନୂଆଦିଲ୍ଲୀ/ମେଲବୋର୍ନ,୨୮ା୪(ପି.ଟି.)-ଭାରତରେ କୋଭିଡ୍ର ଦ୍ୱିତୀୟ ଲହରରେ କରୋନା ସଂକ୍ରମିତଙ୍କ ସଂଖ୍ୟା ଦ୍ରୁତ ହାରରେ ବୃଦ୍ଧି ପାଉଥିବାରୁ ଚଳିତ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରେ ଅଂଶଗ୍ରହଣ କରିବାକୁ ଆସିଥିବା ବିଦେଶୀ ଖେଳାଳିଙ୍କ ଲାଗି ଏହା ଚିନ୍ତାର କାରଣ ହୋଇଛି। ସଂକ୍ରମିତଙ୍କ ଲାଗି ଦେଶରେ ଅକ୍ସିଜେନ ଓ କିଛି ଗୁରୁତ୍ୱପୂର୍ଣ୍ଣ ଔଷଧର ଅଭାବ ଦେଖା ଦେଇଥିବାରୁ ଅନେକ ପ୍ରାଣ ହରାଉଛନ୍ତି। ତେଣୁ ଟୁର୍ନାମେଣ୍ଟ ଶେଷ ହେଲେ ନିଜ ଦେଶକୁ କିପରି ସୁରକ୍ଷିତ ଭାବେ ଫେରିବେ ସେ ନେଇ ବିଦେଶୀ ଖେଳାଳିମାନେ ଆଶଙ୍କାରେ ରହିଛନ୍ତି। କରୋନା ଏହାର କାୟାବିସ୍ତାର କରି ଚାଲିଥିବାରୁ ଆଗକୁ ଭାରତକୁ ଯାତାୟାତ କଟକଣା ଆଶଙ୍କାକୁ ନେଇ ଦ୍ୱନ୍ଦ୍ୱରେ ଅଛନ୍ତି ବିଦେଶୀ ଖେଳାଳି। ଭୟରେ ଆଣ୍ଡ୍ର୍ୟୁ ଟାଇ ଆଗୁଆ ଅଷ୍ଟ୍ରେଲିଆ ଫେରିଯାଇଛନ୍ତି। କେନ୍ ରିଚାର୍ଡସନ ଓ ଆଡାମ ଜାମ୍ପା ବାଙ୍ଗାଲୋରସ୍ଥିତ ରୟାଲ ଚ୍ୟାଲେଞ୍ଜର୍ସ ବାୟୋ-ବବଲ ଛାଡ଼ି ସୋମବାର ଘରମୁହାଁ ହୋଇଛନ୍ତି। ଏହାର ଦିନକ ପରେ ଅଷ୍ଟ୍ରେଲିଆ ମେ’ ୧୫ ତାରିଖ ପର୍ଯ୍ୟନ୍ତ ଭାରତରୁ ବିମାନ ଯାତ୍ରାକୁ ସସ୍ପେଣ୍ଡ କରିଛି। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ତରଫରୁ କିନ୍ତୁ ବିଦେଶୀ ଖେଳାଳିଙ୍କୁ ନିର୍ଭର ପ୍ରତିଶ୍ରୁତି ଦିଆଯାଇଛି। ମେ’୩୦ରେ ଟୁର୍ନାମେଣ୍ଟ ଶେଷ ହେବାମାତ୍ରେ ଖେଳାଳିମାନଙ୍କୁ ସୁରକ୍ଷିତ ଭାବେ ସେମାନଙ୍କ ଘରେ ପହଞ୍ଚାଇବା ଦାୟିତ୍ୱ ଆମର ବୋଲି ବୋର୍ଡର ସିଓଓ ହେମାଙ୍ଗ ଅମିନ ପ୍ରକାଶ କରିଛନ୍ତି। କ୍ରିକେଟ ଅଷ୍ଟ୍ରେଲିଆ (ସିଏ) ସେମାନଙ୍କ ଫେରିବା ଲାଗି ଏକ ସ୍ବତନ୍ତ୍ର ବିମାନର ବ୍ୟବସ୍ଥା କରିବ ବୋଲି ମୁମ୍ବାଇ ଇଣ୍ଡିଆନ୍ସର ଅଷ୍ଟ୍ରେଲୀୟ ବ୍ୟାଟ୍ସମ୍ୟାନ କ୍ରିସ୍ ଲିନ୍ ଆଶା ପ୍ରକାଶ କରିଥିଲେ। କାରଣ ପ୍ରତିଟି ଅଷ୍ଟ୍ରେଲିଆ ଖେଳାଳିଙ୍କର ପ୍ରତିଟି ଆଇପିଏଲ ଚୁକ୍ତିର ୧୦ ପ୍ରତିଶତ ଅର୍ଥ କ୍ରିକେଟ ଅଷ୍ଟ୍ରେଲିଆ ପାଣ୍ଠିକୁ ଯାଇଥାଏ ବୋଲି ସେ ଦର୍ଶାଇଛନ୍ତି। ଏଣେ ଅଷ୍ଟ୍ରେଲିଆ ପ୍ରଧାନମନ୍ତ୍ରୀ ସ୍କଟ ମୋରିସନ ସ୍ପଷ୍ଟ କରିଦେଇଛନ୍ତି ଯେ, ତାଙ୍କ ଦେଶର ଯେଉଁମାନେ ଆଇପିଏଲ୍ ସହ ସଂଶ୍ଲିଷ୍ଟ ଅଛନ୍ତି ସେମାନଙ୍କୁ କୌଣସି ସରକାରୀ ସହାୟତା ଦିଆଯିବ ନାହିଁ। ସେମାନଙ୍କୁ ନିଜସ୍ବ ବ୍ୟବସ୍ଥାରେ ଫେରିବାକୁ ହେବ। କାରଣ ସେମାନେ ଅଷ୍ଟ୍ରେଲିଆ ଜାତୀୟ ଦଳ ସହ ନୁହେଁ ଘରୋଇ ଭାବେ ଭାରତ ଗସ୍ତ କରିଛନ୍ତି। ଭାରତରେ ବର୍ତ୍ତମାନ ଦୈନିକ ହାରାହାରି ୩ଲକ୍ଷରୁ ଊର୍ଦ୍ଧ୍ୱ ନୂଆ କରୋନା ସଂକ୍ରମିତ ବାହାରୁଛନ୍ତି। ଦୈନିକ ୨,୦୦୦ରୁ ଅଧିକ ଲୋକ ପ୍ରାଣ ହରାଉଛନ୍ତି। କରୋନା ରୋଗୀଙ୍କ ଲାଗି ଦେଶରେ ଅକ୍ସିଜେନ୍ ଓ କିଛି ଗୁରୁତ୍ୱପୂର୍ଣ୍ଣ ଔଷଧର ଅଭାବ ଦେଖାଦେଇଛି।
