ପୁରୀ ଅଫିସ,୧୪।୪: ଶ୍ରୀମନ୍ଦିର ପରିକ୍ରମା ପ୍ରକଳ୍ପ ଅଧୀନରେ ବେଆଇନ ଖନନ ଓ ନିର୍ମାଣକୁ ବିରୋଧ କରି ପୁରୀ ଓକିଲ ସଂଘ ପକ୍ଷରୁ ବୁଧବାର ଏସ୍ଡିଜେଏମ୍ କୋର୍ଟରେ ଫୌଜଦାରି ମାମଲା ଦାୟର କରାଯାଇଛି। ଆଇନଜୀବୀ ବିଭୂତି ଶଙ୍କର ତ୍ରିପାଠୀ ଏହି ମାମଲା ଦାୟର କରିଛନ୍ତି। ପ୍ରକଳ୍ପ ଦାୟିତ୍ୱରେ ଥିବା ଠିକା କମ୍ପାନୀ ଟାଟା ପ୍ରୋଜେକ୍ଟ ଲିମିଟେଡ୍ର ମ୍ୟାନେଜର, ଓଡ଼ିଶା ସେତୁ ନିର୍ମାଣ ନିଗମର କାର୍ଯ୍ୟନିର୍ବାହୀ ଅଧିକାରୀ ଏବଂ ପୁରୀ ଜିଲାପାଳ ସମର୍ଥ ବର୍ମାଙ୍କୁ ଏଥିରେ ପକ୍ଷଭୁକ୍ତ କରାଯାଇଛି। ଶ୍ରୀମନ୍ଦିରର ଶହେ ମିଟର ପରିଧି ମଧ୍ୟରେ ହେଉଥିବା ବେଆଇନ ନିର୍ମାଣ କାର୍ଯ୍ୟ ସମ୍ପର୍କରେ ଗତ ମାର୍ଚ୍ଚ ୧୬ରେ ସିଂହଦ୍ୱାର ଥାନାରେ ଏତଲା ଦିଆଯାଇଥିଲେ ମଧ୍ୟ ପୋଲିସ କାର୍ଯ୍ୟାନୁଷ୍ଠାନ ନେଲାନାହିଁ। ଏହାପରେ ଏପ୍ରିଲ ୮ରେ ଏସ୍ପି କନୱର ବିଶାଲ ସିଂଙ୍କୁ ମଧ୍ୟ ଏତଲା ଦିଆଯାଇଥିବା ସତ୍ତ୍ୱେ କାର୍ଯ୍ୟାନୁଷ୍ଠାନ ହୋଇନାହିଁ। ଆମ୍ସାର୍ ଆକ୍ଟ-୧୯୫୮ ଅନୁଯାୟୀ ଶ୍ରୀମନ୍ଦିର ଶହେ ମିଟର ପରିଧି ନିର୍ମାଣ କାର୍ଯ୍ୟ ବେଆଇନ ହୋଇଥିବା ବେଳେ ଓବିସିସି ଏବଂ ଟାଟା କମ୍ପାନୀ ଶ୍ରୀମନ୍ଦିର ମେଘନାଦ ପ୍ରାଚୀରଠାରୁ ୪୦ ମିଟର ଦୂରରେ ପଶ୍ଚିମ, ଉତ୍ତର, ଦକ୍ଷିଣ-ପୂର୍ବ ଦିଗରେ ୩୦ ଫୁଟ୍ର ଖନନ କାର୍ଯ୍ୟ କରୁଛନ୍ତି। ବଡ଼ ବଡ଼ ଡ୍ରିଲିଙ୍ଗ ମେଶିନ ସହାୟତାରେ ଏହି କାର୍ଯ୍ୟ କରାଯାଇଛି, ଯାହାଫଳରେ ଶ୍ରୀମନ୍ଦିର ଭିତ୍ତିଭୂମି ପ୍ରଭାବିତ ହେଉଛି। ଭକ୍ତଙ୍କୁ ମୌଳିକ ସୁବିଧା ଯୋଗାଇଦେବା ଉଦ୍ଦେଶ୍ୟରେ ନିର୍ମାଣ କରିବା ଆଳରେ ଏହି ବଡ଼ ବଡ଼ ଖନନ କରି ନିର୍ମାଣ କାର୍ଯ୍ୟ ଚାଲୁଥିବା ବେଳେ ଶ୍ରୀମନ୍ଦିର ସୁରକ୍ଷା ପ୍ରତି ଧ୍ୟାନ ଦିଆଯାଉନାହିଁ। ଏଣୁ ପ୍ରଶାସନ ମୂକ ବଧିର ଭଳି ବ୍ୟବହାର କରୁଥିବାରୁ ଓକିଲ ସଂଘର ଜେନେରାଲ ବଡି ମିଟିଂ ନିଷ୍ପତ୍ତି ଅନୁଯାୟୀ ଆଇପିସି ଧାରା ୩୦-ଏ ଏବଂ ୧୬୬-ଏ ଅନୁଯାୟୀ ମକଦ୍ଦମା ରୁଜୁ କରାଯାଇଛି। ଏଏସ୍ଆଇ ଫେବୃୟାରୀ ୫ରେ ଓବିସିସି ପ୍ରୋଜେକ୍ଟ ମ୍ୟାନେଜରଙ୍କୁ କାର୍ଯ୍ୟ ବନ୍ଦ କରିବାକୁ ନିର୍ଦ୍ଦେଶ ଦେଇଥିଲେ। ମାତ୍ର ଆଇନକୁ ବେଖାତିର କରି ଖନନ କରାଯାଉଛି। ଏଣୁ ଫୌଜଦାରି ଆଇନ ଧାରା ୧୫୬(୩) ଅନୁଯାୟୀ କାର୍ଯ୍ୟାନୁଷ୍ଠାନ ନେବା ପାଇଁ ସିଂହଦ୍ୱାର ଥାନାକୁ ନିର୍ଦ୍ଦେଶ ଦିଆଯିବାକୁ କୋର୍ଟଙ୍କୁ ଅପିଲ୍ କରାଯାଇଛି। ଏହି ମକଦ୍ଦମାରେ ଆଇନଜୀବୀ ଶାରଦା ପ୍ରସାଦ ସାମଲ, ଭଗବାନ ମିଶ୍ର, ପ୍ରିୟଦର୍ଶନ ପଟ୍ଟନାୟକ, ପ୍ରେମାନନ୍ଦ ମହାନ୍ତି ଓ ତପନ କୁମାର ବାରିକ ପ୍ରମୁଖ ସାକ୍ଷୀ ରହିଛନ୍ତି।
