ନୂଆଦିଲ୍ଲୀ,୧୬।୧୧: ବରିଷ୍ଠ ଆଇନଜୀବୀ ସୌରଭ କ୍ରିପାଲଙ୍କୁ ଦିଲ୍ଲୀ ହାଇକୋର୍ଟର ବିଚାରପତି କରିବାକୁ ସୁପ୍ରିମକୋର୍ଟ କଲେଜିୟମ ନିଷ୍ପତ୍ତି ନେଇଛନ୍ତି। ବିଶେଷ କଥା ହେଉଛି ସେ ଭାରତର ପ୍ରଥମ ସମଲିଙ୍ଗୀ ବିଚାରପତି ହେବେ। ଏହି ନିଷ୍ପତ୍ତି ନ୍ୟାୟପାଳିକା ଇତିହାସରେ ଏକ ଉଦାହରଣ ଭାବରେ ଦେଖାଯାଉଛି। ପ୍ରଥମ ଥର ପାଇଁ ସୁପ୍ରିମକୋର୍ଟ କଲେଜିୟମ ସମଲିଙ୍ଗୀ ବିଚାରପତି ନିଯୁକ୍ତ କରିବାକୁ ନିଷ୍ପତ୍ତି ନେଇଛନ୍ତି।
ଏନେଇ ସୁପ୍ରିମକୋର୍ଟଙ୍କ ଦ୍ୱାରା ଏକ ବିବୃତ୍ତି ଜାରି କରାଯାଇଛି। ଯେଉଁଥିରେ କୁହାଯାଇଛି ଯେ ନଭେମ୍ବର ୧୧ରେ କଲେଜିୟମର ବୈଠକ ଅନୁଷ୍ଠିତ ହୋଇଥିଲା। ଏଥିରେ ସୌରଭ କ୍ରିପାଲଙ୍କ ନାମ ସୁପାରିଶ କରାଯାଇଥିଲା।
ଏହାପୂର୍ବରୁ ଚଳିତ ବର୍ଷ ମାର୍ଚ୍ଚରେ ଭାରତର ପୂର୍ବତନ ପ୍ରଧାନ ବିଚାରପତି ଏ.ଏସ୍. ବୋବଡେ ସୌରଭ କ୍ରିପାଲଙ୍କୁ ଜଣେ ବିଚାରପତି ଭାବରେ ନିଯୁକ୍ତ ହେବା ନେଇ ମତାମତ ଦେବାକୁ କେନ୍ଦ୍ର ସରକାରଙ୍କୁ କହିଥିଲେ।
ଏହାପୂର୍ବରୁ, ଚାରିଥର ତାଙ୍କୁ ବିଚାରପତି ନିଯୁକ୍ତ କରିବା ନେଇ ଭିନ୍ନ ଭିନ୍ନ ମତ ଉଠିଥିଲା। ୨୦୧୭ରେ ଦିଲ୍ଲୀ ହାଇକୋର୍ଟର ଜଣେ ବିଚାରପତି ଭାବେ ନିଯୁକ୍ତି ପାଇଁ କଲେଜିୟମ ପ୍ରଥମେ ତାଙ୍କ ନାମ ସୁପାରିଶ କରିଥିଲେ।
ସୌରଭ କ୍ରିପାଲ ଦିଲ୍ଲୀର ସେଣ୍ଟ ଷ୍ଟିଫେନ କଲେଜରୁ ସ୍ନାତକ ହାସଲ କରିଛନ୍ତି। ଏଥି ସହିତ, ସେ ଅକ୍ସଫୋର୍ଡ ୟୁନିଭରସିଟିରୁ ସ୍ନାତକ ଆଇନ ଅଧ୍ୟୟନ କରିଥିଲେ। ସେ କେମ୍ବ୍ରିଜ ବିଶ୍ୱବିଦ୍ୟାଳୟରୁ ଆଇନରେ ସ୍ନାତକୋତ୍ତର ଡିଗ୍ରୀ ହାସଲ କରିଛନ୍ତି। ସେ ଗତ ଦୁଇ ଦଶନ୍ଧି ଧରି ସୁପ୍ରିମକୋର୍ଟରେ ଅଭ୍ୟାସ କରୁଛନ୍ତି।
ଜେନେଭାରେ ମିଳିତ ଜାତିସଂଘ ସହିତ କାର୍ଯ୍ୟ କରିବା ସମୟରେ ’ନବତେଜ ସିଂ ଜୋହର ବନାମ ୟୁନିଅନ ଅଫ ଇଣ୍ଡିଆ’ ମାମଲାରେ ସୌରଭଙ୍କ ନାମ ବେଶ ଜଣାଶୁଣା ହୋଇଥିଲା।
ସେ ଧାରା ୩୭୭ ହଟାଇବା ମାମଲାରେ ସେ ଆବେଦନକାରୀଙ୍କ ଆଇନଜୀବୀ ଥିଲେ। ସେପ୍ଟେମ୍ବର ୨୦୧୮ ରେ, ଧାରା ୩୭୭ସମ୍ବନ୍ଧୀୟ ଆଇନ ସୁପ୍ରିମକୋର୍ଟଙ୍କ ଦ୍ୱାରା ରଦ୍ଦ କରାଯାଇଥିଲା।
