ରାୟଗଡ଼ା,୩୦।୧(ଆଶିଷ ରଞ୍ଜନ ପଣ୍ଡା): ଆର୍ଥିକ ସର୍ବେକ୍ଷଣ ୨୦୨୫-୨୬ ଅନୁସାରେ ଭାରତର ଅର୍ଥନୈତିକ ଅଭିବୃଦ୍ଧି ପ୍ରାୟ ୭% ରହିବାର ପୂର୍ବାନୁମାନ କରାଯାଇଛି। ଯାହା ବିଶ୍ୱସ୍ତରୀୟ ଅନିଶ୍ଚିତତା ସତ୍ୱେ ଦେଶର ସାମଗ୍ରିକ ଅର୍ଥନୈତିକ ସ୍ଥିରତାକୁ ପ୍ରଦର୍ଶିତ କରୁଛି। କିନ୍ତୁ ଏହି ସଂଖ୍ୟା ପଛରେ ଏକ ଚିନ୍ତାଜନକ ବାସ୍ତବତା ରହିଛି। ଫଳରେ ଚାକିରି ସୃଷ୍ଟି, ଆୟ ସୁରକ୍ଷା କିମ୍ବା ଗ୍ରାମୀଣ ଅର୍ଥନୈତିକ ସ୍ଥିରତାରେ ପର୍ଯ୍ୟାପ୍ତ ଭାବରେ ପରିଣତ ହୋଇନାହିଁ ବୋଲି କୋରାପୁଟ ଏମ୍ପି ତଥା ଗ୍ରାମୀଣ ବିକାଶ ଏବଂ ପଂଚାୟତିରାଜ ଷ୍ଟାଣ୍ଡିଂ କମିଟି ଅଧ୍ୟକ୍ଷ ସପ୍ତଗିରି ଶଙ୍କର ଉଲାକା ପ୍ରେସ ବିବୃତ୍ତି ମାଧ୍ୟମରେ ଶୁକ୍ରବାର ସୂଚନା ଦେଇଛନ୍ତି।
ସେ କହିଛନ୍ତି ଯେ, ସର୍ବେକ୍ଷଣ ଅନୁସାରେ ନିଯୁକ୍ତି ସୃଷ୍ଟିରେ ଏ ପର୍ଯ୍ୟନ୍ତ ଦୁର୍ବଳତା ରହିଛି ଏବଂ ଉତ୍ପାଦନ କ୍ଷେତ୍ର ବର୍ଦ୍ଧିତ କର୍ମଶକ୍ତିକୁ ପର୍ଯ୍ୟାପ୍ତ ଭାବେ ଗ୍ରହଣ କରିବାରେ ବିଫଳ ହୋଇଛି। ଯୁବ ବେକାରୀ, ଶ୍ରମର ଅନୌପଚାରିକିକରଣ ଏବଂ ବିଶେଷକରି ଗ୍ରାମୀଣ ଆଦିବାସୀ ଓ ପଛୁଆ ଅଞ୍ଚଳଗୁଡ଼ିକରେ ଏକ ସ୍ଥିର ମଜୁରୀ ପ୍ରଦାନ କରିବାରେ ଲକ୍ଷ ଲକ୍ଷ ଲୋକଙ୍କ ଦୈନନ୍ଦିନ ଜୀବନର ବିଫଳ ହୋଇଥିବା ଦେଖିବାକୁ ମିଳିଛି। ସରକାର ଆର୍ଥତ୍କ ଏକତ୍ରିକରଣକୁ ପ୍ରାଥମିକତା ଦେଉଥିବାବେଳେ ସର୍ବେକ୍ଷଣ ନିରନ୍ତର ନଗଦ ସ୍ଥାନାନ୍ତର, ସାମାଜିକ ଖର୍ଚ୍ଚର ସଙ୍କୋଚନ ଏବଂ ବିକାଶମୂଳକ ଖର୍ଚ୍ଚରୁ ବାହାରକୁ ଯିବାର ସମ୍ଭାବ୍ୟ ପ୍ରଭାବ ସମ୍ପର୍କରେ ଚିନ୍ତା ପ୍ରକଟ କରୁଛି ବୋଲି ଏମ୍ପି ଉଲାକା ଉଲେଖ କରିଛନ୍ତି । ଆର୍ଥତ୍କ ଶୃଙ୍ଖଳା ନାମରେ ଏମଜିଏନଆରଇଜିଏସ୍କୁ ଦୁର୍ବଳ କରିବା, ମଜୁରୀକୁ ବିଳମ୍ବ, ପେନସନକୁ ସଙ୍କୁଚିତ ଏବଂ ଗ୍ରାମୀଣ ବିକାଶକୁ ଦୁର୍ବଳ କରିବା ପାଇଁ ଏହାକୁ ଏକ ଯଥାର୍ଥତା ଭାବରେ ବ୍ୟବହାର କରାଯାଉଛି ବୋଲି ଏମ୍ପି କହିଛନ୍ତି। ଫଳରେ ଏଭଳି ପଦକ୍ଷେପ ସିଧାସଳଖ ଗରିବ ଲୋକଙ୍କୁ ପ୍ରଭାବିତ କରୁଛି ଏବଂ ଅର୍ଥନୀତିର ଚାହିଦାକୁ ଦମନ କରୁଛି। ତୃଣମୂଳସ୍ତରରେ ପଞ୍ଚାୟତିରାଜ ପ୍ରତିଷ୍ଠାନଗୁଡିକୁ କ୍ରମାଗତ ଭାବେ ଦୁର୍ବଳ କରାଯାଉଛି ବୋଲି ସପ୍ତଗିରି ଅଭିଯୋଗ କରିଛନ୍ତି। ବିଭିନ୍ନ ଯୋଜନା କାର୍ଯ୍ୟକାରୀ ପାଇଁ ଆବଶ୍ୟକୀୟ ଗ୍ରାମସଭାଗୁଡିକୁ ଅଣଦେଖା କରାଯାଉଛି ଏବଂ ଜଳ ଜୀବନ ମିଶନ ଓ ଗ୍ରାମୀଣ ନିଯୁକ୍ତି କାର୍ଯ୍ୟକ୍ରମ ପରି ପ୍ରମୁଖ ଯୋଜନାରେ ବିଳମ୍ବ ହେଉଛି। ବିକାଶମୂଳକ ଯୋଜନାର କାର୍ଯ୍ୟକାରିତା କ୍ଷେତ୍ରରେ ମଧ୍ୟ ବିଫଳତାର ଶିକାର ହେଉଛି ବୋଲି କହିଛନ୍ତି। ବର୍ତ୍ତମାନର ସରକାର ବଡ଼ ବଡ଼ କର୍ପୋରେଟ ସଂସ୍ଥାଗୁଡିକ ସପକ୍ଷରେ ଢ଼ଳି ରହୁଥିବା ବେଳେ ସୂକ୍ଷ୍ମ, କ୍ଷୁଦ୍ର ଏବଂ ମଧ୍ୟମ ଉଦ୍ୟୋଗୁଡିକ ବିଭିନ୍ନ ସମସ୍ୟା ନେଇ ଅନିଶ୍ଚିତତା ସହ ନିରନ୍ତର ଭାବେ ସଂଘର୍ଷ କରୁଛନ୍ତି। ତେଣୁ ଉଭୟ କେନ୍ଦ୍ର ଓ ରାଜ୍ୟ ସରକାର ଏଥିପ୍ରତି ଦୃଷ୍ଟି ଦେଲେ ଦେଶର ଅର୍ଥନୈତିକ ଅଭିବୃଦ୍ଧି ଘଟିବ ଏବଂ ପ୍ରକୃତ ବିକାଶ ହେବ ବୋଲି ସେ ପ୍ରେସ୍ ବିଜ୍ଞପ୍ତିରେ କହିଛନ୍ତି।
