ବାଲେଶ୍ୱର ଅଫିସ, ୬ା୨: ବାଲେଶ୍ୱର ପୌରାଞ୍ଚଳ ନାମରେ ଦୀର୍ଘ ୧ବର୍ଷ ଧରି ନକଲି ଫେସବୁକ୍ ଆକାଉଣ୍ଟ ଖୋଲାଯାଇ ବିଭିନ୍ନ ପ୍ରକାର ତଥ୍ୟ ସୋସିଆଲ ମିଡିଆରେ ଅପଲୋଡ୍ କରାଯିବା ସହ ଲୋକଙ୍କୁ ଭ୍ରମିତ କରାଯାଉଛି। ଏନେଇ ପୌର ନିର୍ବାହୀ ଅଧିକାରୀ ତଥା ଉପଜିଲାପାଳ ଆଶିଷ ଈଶ୍ୱର ପାଟିଲ ଡିଏସ୍ପି (ସିଟି)ଙ୍କ ସହ ଆଲୋଚନା କରି ଥାନାରେ ଅଭିଯୋଗ କରିଛନ୍ତି। ପୌର ନିର୍ବାଚନ ପାଖେଇ ଆସୁଥିବା ବେଳେ ପୌରପାଳିକାର ନକଲି ଫେସବୁକ ଆକାଉଣ୍ଟରେ ୪ଜଣ ଅଧ୍ୟକ୍ଷ ପ୍ରାର୍ଥୀଙ୍କ ଫଟୋ ଦେଇ ଲୋକଙ୍କର ମତାମତ ଲୋଡାଯାଇଛି। ଏଭଳି ବିଭ୍ରାନ୍ତିକର ପୋଷ୍ଟିଂ ଦେଖିବା ପରେ ପୌରନିର୍ବାହୀ ଅଧିକାରୀ ଆଶ୍ଚର୍ଯ୍ୟ ପ୍ରକାଶ କରିଛନ୍ତି। ସୂଚନା ଯେ, ୨୦୨୦ ଜାନୁଆରୀ ୩୧ ତାରିଖରେ ଖୋଲାଯାଇଥିବା ଏହି ଆକାଉଣ୍ଟ ସରକାରୀ ବୋଲି ଉଲ୍ଲେଖ ରହିଛି। ୪୨ଜଣ ଏହାକୁ ଲାଇକ୍ କରିଥିବା ବେଳେ ୪୬ଜଣ ଏହାକୁ ଫଲୋ କରିଛନ୍ତି। ଏହି ଆକାଉଣ୍ଟରେ ଇଂରାଜୀ ଖବରକାଗଜରେ ପ୍ରକାଶିତ ଖବର ମଧ୍ୟ ପ୍ରକାଶିତ ହୋଇଛି, ଯାହା ପୌରପାଳିକା ବିରୋଧରେ ହଁି ଲେଖାଯାଇଛି। ସେହିପରି ଗତ ୨ତାରିଖ ଅପରାହ୍ନ ୧ଟା ବେଳେ କୋଷ୍ଟ କେନାଲକୁ ନେଇ ଅନ୍ୟ ଏକ ଖବର କାଗଜରେ ପ୍ରକାଶିତ ଖବରକୁ ପ୍ରୋଫାଇଲ ଛବି ଭାବେ ରଖାଯାଇଛି। ଏନେଇ ପୌର ନିର୍ବାହୀ ଅଧିକାରୀ ତଥା ଉପଜିଲାପାଳ ପାଟିଲ କହିଛନ୍ତି, ପୌରପାଳିକାର ଗୋଟିଏ ଫେସବୁକ୍ ଆକାଉଣ୍ଟ ରହିଛି। ଏଥିରେ ପୌରପାଳିକା ସମ୍ପର୍କିତ ଖବର ପ୍ରକାଶିତ ହୁଏ ଓ ସଚେତନତା ବାର୍ତ୍ତା ପୋଷ୍ଟିଂ କରାଯାଇଥାଏ। ଏବେ ଯାହା ସାମାଜିକ ଗଣମାଧ୍ୟମରେ ଚର୍ଚ୍ଚା ହେଉଛି, ତାହା ଆମ ଆକାଉଣ୍ଟ ନୁହେଁ। କେହି ଜଣେ ଫେକ ଆକାଉଣ୍ଟ ଖୋଲି ପୌରପାଳିକା ନାଁକୁ ବଦନାମ୍ କରୁଛି। ଏନେଇ ଥାନାରେ ଅଭିଯୋଗ ହୋଇଛି।
