ଯାଜପୁର ରୋଡ,୪ା୩(ଡି.ଏନ.ଏ.): ଯାଜପୁର ଜିଲା ବ୍ୟାସନଗର ପୌର ପରିଷଦର ନିର୍ବାଚନ ପରିପ୍ରେକ୍ଷୀରେ ୨୬ ନମ୍ବର ୱାର୍ଡ ଗୁରୁତ୍ୱ ବହନ କରୁଛି। ଜିଲାର ରସୁଲପୁର ଓ ଦାନଗଦି ବ୍ଲକ ଅଞ୍ଚଳ ଦେଇ ପ୍ରବାହିତ ଖରସ୍ରୋତା ନଦୀ ପଟୁ ବ୍ୟାସନଗର ସହରକୁ ଏହି ୱାର୍ଡର ପ୍ରବେଶ ପଥ ରହିଛି। ସହରର ଖଣ୍ଡାହଥା, ଶିଶୁ ମନ୍ଦିର, ଡାହିସାହି, ମୁଣ୍ଡୋମାଳ, ସିଲ୍ କଲୋନୀ ଓ ସରୋବର ଆଦି ଅଞ୍ଚଳ ଏହି ୱାର୍ଡରେ ଅର୍ନ୍ତଭୁକ୍ତ ହୋଇଛି। ଏହି ଓ୍ବାଡ୍ର ଡ୍ରେନେଜ, ରାସ୍ତାଘାଟ, ଆଲୁଅ, ପରିମଳ ବ୍ୟବସ୍ଥା ଇତ୍ୟାଦି ବିପର୍ଯ୍ୟସ୍ତ ହୋଇପଡିଛି। ୨୦୧୬ରୁ ୨୦୨୦ ପର୍ଯ୍ୟନ୍ତ ବିଭିନ୍ନ ଉନ୍ନୟନ କାର୍ଯ୍ୟରେ କୋଟିଏରୁ ଊର୍ଦ୍ଧ୍ୱ ଟଙ୍କା ଖର୍ଚ୍ଚ ହୋଇଛି। ହେଲେ ନିର୍ମାଣ କାର୍ଯ୍ୟରେ ବ୍ୟାପକ ଅନିୟମିତତା ଓ ଦୁର୍ନୀତି ଯୋଗୁ ବିକାଶ ପରାହତ ହୋଇଥିବା ଅଭିଯୋଗ ହେଉଛି। ଏହି କାରଣରୁ ଶାସକ ଦଳ ଓ ପ୍ରଶାସକ ବଦନାମ ହେବା ସହ ଚଳିତ ପୌର ନିର୍ବାଚନରେ ଏହାର ପ୍ରଭାବ ପଡିପାରେ ବୋଲି ଆଶଙ୍କା ପ୍ରକାଶ ପାଇଛି ା
ଏହି ୱାର୍ଡର ଗଣେଶ ଷ୍ଟୋରଠାରୁ ସଲିଲ ସିଲ୍ଙ୍କ ଘର ପର୍ଯ୍ୟନ୍ତ ନିର୍ମାଣ ହୋଇଥିବା ତ୍ରୁଟିପୂର୍ଣ୍ଣ ଡ୍ରେନ୍କୁ ଏଠାରେ ଉଦାହରଣ ଭାବେ ନିଆଯାଇପାରେ। ଏହି କାମ ପାଇଁ ୨୦୧୬-୧୭ରେ ୪ ଲକ୍ଷ ଟଙ୍କା ଖର୍ଚ୍ଚ କରାଯାଇଛି। ତେବେ ଗଣେଶ ଷ୍ଟୋରଠାରୁ ସଲିଲ୍ ସିଲ୍ ଘର ମଝିରେ ଥିବା ଆଇଚ ବାବୁଙ୍କ ଘର ସମ୍ମୁଖରେ ପୁଣି ଏକ ଡ୍ରେନ୍ ନିର୍ମାଣ ହୋଇଥିବା ଆରଟିଆଇ ରିପୋର୍ଟରୁ ଜଣାପଡିଛି। ସେହି ବର୍ଷ ଏହି କାର୍ଯ୍ୟରେ ପୁଣି ୨ ଲକ୍ଷ ଟଙ୍କାର ବିଲ ହୋଇଛି। ଯାହାକି ପୂର୍ବ କାମକୁ ଦେଖାଇ, କୌଣସି କାମ କରା ନ ଯାଇ ସେହି ଅର୍ଥକୁ ସମ୍ପୂର୍ଣ୍ଣ ଭାବେ ଆତ୍ମସାତ୍ କରାଯାଇଛି ବୋଲି ଅଞ୍ଚଳବାସୀ ଅଭିଯୋଗ କରିଛନ୍ତି। ଏହାବାଦ୍ ୱାର୍ଡର ବିଭିନ୍ନ ରାସ୍ତା ମରାମତି କାମ ଆଳରେ ମୋରମ ଓ କ୍ରସର ଗୁଣ୍ଡ ବାବଦକୁ ୧ ଲକ୍ଷ ଟଙ୍କାର ବିଲ କରାଯାଇ ସେହି ଅର୍ଥକୁ ଆତ୍ମସାତ୍ କରାଯାଇଛି। ୨୦୧୮-୧୯ରେ ବ୍ୟାସସରୋବରଠାରୁ ଗ୍ୟାସ୍ ଗୋଦାମ ପଟକୁ ରାସ୍ତା ନିର୍ମାଣରେ ୧୭ ଲକ୍ଷ ଟଙ୍କା ଖର୍ଚ୍ଚ ହୋଇଥିବା ଦର୍ଶାଯାଇଛି। କିନ୍ତୁ ବାସ୍ତବରେ ସେହି ରାସ୍ତାର ଅଲେଖ ମହିମା ମଠଠାରୁ ସରୋବର ତୋରଣ ପର୍ଯ୍ୟନ୍ତ ୧୦୦ ମିଟର କଂକ୍ରିଟକରଣ କରି ସିଂହଭାଗ ଅର୍ଥ ହଡ୍ପ ହୋଇଥିବା କୁହାଯାଉଛି। ପ୍ରଶାସକ ଶାସନ ସମୟରେ ଏହି କାର୍ଯ୍ୟ ହୋଇଛି। ଅନ୍ୟପକ୍ଷେ ଡ୍ରେନେଜ କାମରେ ବର୍ହିଗମନ ପଥ ନାହିଁ। ଫଳରେ ୱାର୍ଡର ବିଭିନ୍ନ ସ୍ଥାନରେ ପାଣି ଜମା ହୋଇ ମଶାମାଛିଙ୍କ ଅନ୍ତୁଡ଼ିଶାଳ ପାଲଟିଛି। ଏଭଳି ଅନେକ ଅନିୟମିତତା ଓ ଦୁର୍ନୀତି ୨୬ ନମ୍ବର ୱାର୍ଡବାସୀଙ୍କୁ ବିଳଚିତ କରିଛି।
ଏଥର ସାଧାରଣ ବର୍ଗ ପାଇଁ ୱାର୍ଡ କାଉନସିଲର ପଦବୀ ସଂରକ୍ଷିତ ରହିଛି। ଗୁରୁବାର ପର୍ଯ୍ୟନ୍ତ କୌଣସି ପ୍ରମୁଖ ରାଜନୈତିକ ଦଳର ପ୍ରାର୍ଥୀ ନାମାଙ୍କନ ପତ୍ର ଦାଖଲ କରି ନାହାନ୍ତି। ତେଣୁ ଏହି ୱାର୍ଡର କାଉନସିଲର ପଦବୀ ପାଇଁ ବିଜେଡି ଅନ୍ୟ ୱାର୍ଡରୁ ପ୍ରାର୍ଥୀ ଦେବ ବୋଲି ସୂଚନା ମିଳିଛି। ଏହାକୁ ନେଇ ୱାର୍ଡବାସୀଙ୍କ ମଧ୍ୟରେ ଅସନ୍ତୁଷ୍ଟ ପ୍ରକାଶ ପାଇଛି। ଉକ୍ତ ୱାର୍ଡରେ ୧୮୧୯ ଭୋଟର ନିଜର ମତଦାନ ସାବ୍ୟସ୍ତ କରିବେ। ପ୍ରଶାସନ ପକ୍ଷରୁ ଏଥିପାଇଁ ଖଣ୍ଡାହତା ଓ ମୁଣ୍ଡୋମାଳ ପ୍ରାଥମିକ ସ୍କୁଲରେ ୨ଟି ବୁଥ କରିବାକୁ ଧାର୍ଯ୍ୟ ହୋଇଛି। ଏ ସଂକ୍ରାନ୍ତରେ ୱାର୍ଡବାସୀ ବିଜୁ ମହାରଣା କୁହନ୍ତି, ୨୦୧୩ରୁ ୨୦୧୮ ମଧ୍ୟରେ ଯେଉଁ ଦୁର୍ନୀତି ହୋଇଥିଲା ତାହା ପରବର୍ତ୍ତୀ ପ୍ରଶାସନ ଶାସନରେ ଏକାଧିକ ଗୁଣ ହୋଇଛି। ଏହି ଦୁର୍ନୀତିର ପ୍ରଭାବ ଚଳିତ ପୌର ନିର୍ବାଚନ ଉପରେ ପଡିବ ବୋଲି ସେ ସୂଚନା ଦେଇଛନ୍ତି।
