କଟକ ଅଫିସ,୧୨।୨: ଓଡ଼ିଶା ହାଇକୋର୍ଟ ପକ୍ଷରୁ ୨ ଦିନିଆ ଜିଲା ଜଜ୍ ସମ୍ମିଳନୀ କଟକସ୍ଥିତ ଓଡ଼ିଶା ଜୁଡିସିଆଲ ଏକାଡେମୀଠାରେ ଶନିବାର ଉଦ୍ଘାଟିତ ହୋଇଯାଇଛି। ସୁପ୍ରିମକୋର୍ଟ ବିଚାରପତି ସଞ୍ଜୀବ ଖାନ୍ନା ଏହାକୁ ଉଦ୍ଘାଟନ କରି କହିଥିଲେ, ଭାରତୀୟ ସଂସ୍କୃତି ମୁକୁଟରେ ଓଡ଼ିଶା ହେଉଛି ଏକ ମଣି। ନିୟମ ଆଧାରରେ ଠିକ୍, ସ୍ବଚ୍ଛ ନିଷ୍ପତ୍ତି ହିଁ ହେଉଛି ନ୍ୟାୟ। ନ୍ୟାୟ ପ୍ରଦାନବେଳେ ପରିସ୍ଥିତିକୁ ସମ୍ଭାଳିବାରେ ବିଚାରପତିମାନେ ସେତିକି ତତ୍ପର ହେବାକୁ ସେ ପରାମର୍ଶ ଦେଇଥିଲେ। ସାମାଜିକ ଗଣମାଧ୍ୟମ ଦ୍ୱାରା ସତ୍ୟ କିପରି କ୍ଷୟ ହେଉଛି ତାହା ଉପରେ ଆଲୋକପାତ କରିଥିଲେ। ନ୍ୟାୟ ପ୍ରଦାନବେଳେ ନିରପେକ୍ଷତା ପ୍ରତି ଯତ୍ନବାନ ହେବା ଉଚିତ ବୋଲି ବିଚାରପତି ଖାନ୍ନା କହିଥିଲେ।
ସେହିପରି ହାଇକୋର୍ଟ ମୁଖ୍ୟ ବିଚାରପତି ଏସ୍. ମୁରଲୀଧର କହିଥିଲେ, ୯ ବର୍ଷର ବ୍ୟବଧାନ ପରେ ଜିଲା ଜଜ୍ ସମ୍ମିଳନୀ ଅନୁଷ୍ଠିତ ହୋଇଛି। ନ୍ୟାୟିକ ଅଭିଜ୍ଞତା ଶିକ୍ଷା କରିବାରେ ଏହା ବହୁ ଭାବେ ଫଳପ୍ରଦ ହେବ। ଜିଲା ଜଜ୍ମାନଙ୍କ ପରାମର୍ଶ କ୍ରମେ ହାଇକୋର୍ଟ ମାମଲା ବୋଝ ହ୍ରାସ କରିବା ଦିଗରେ ପଦକ୍ଷେପ ନେଇ ଜିଲା କୋର୍ଟ ଜରିଆରେ ୫,୫୦,୩୯୨ ମାମଲା ସମାଧାନ କରାଇବାରେ ସକ୍ଷମ ହୋଇଛି। ୨୦୨୧ର ମାମଲା ଫଇସଲା ଅପେକ୍ଷା ୨୦୨୨ରେ ଫଇସଲା ହାର ୧୧୬.୦୨% ବୃଦ୍ଧି ପାଇଛି। ସେହିପରି ଜିଲା କୋର୍ଟରେ ୨୦୨୧ରେ ୭୨,୮୦୬ ମାମଲା ଫଇସଲା ହୋଇଥିବାବେଳେ ୨୦୨୨ରେ ୧,୬୧,୨୬୩ ମାମଲା ଫଇସଲା ହୋଇଛି। ମାମଲା ଫଇସଲା କ୍ଷେତ୍ରରେ ବଲାଙ୍ଗୀର, ନୟାଗଡ଼ ଓ ଦେବଗଡ଼ ଜିଲା ଯଥାକ୍ରମେ ପ୍ରଥମ, ଦ୍ୱିତୀୟ ଓ ତୃତୀୟ ଭାବେ ଶ୍ରେଷ୍ଠତା ପ୍ରଦର୍ଶନ କରିଥିବା ମୁଖ୍ୟ ବିଚାରପତି ଘୋଷଣା କରିଥିଲେ। ୩ ଜିଲାର ଜିଲା ଜଜ୍ ଓ ମୁଖ୍ୟ ଜୁଡିସିଆଲ ମାଜିଷ୍ଟ୍ରେଟଙ୍କୁ ପୁରସ୍କୃତ କରାଯାଇଛି। ଏହି ଅବସରରେ ବାର୍ଷିକ ବିବରଣୀ ଉନ୍ମୋଚିତ ହୋଇଛି। ଏଥିରେ ହାଇକୋର୍ଟ ଓ ଜିଲାକୋର୍ଟର ୨୦୨୨ ସମ୍ପର୍କିତ କାର୍ଯ୍ୟକାରିତା ଆଦିର ବିବରଣୀ ସ୍ଥାନ ପାଇଛି।
ଜିଲା ଜଜ୍ ସମ୍ମିଳନୀ କମିଟି ଅଧ୍ୟକ୍ଷ ତଥା ହାଇକୋର୍ଟ ବିଚାରପତି ଶୁଭାଶିଷ ତାଳପତ୍ର ସ୍ବାଗତ ଭାଷଣ ଦେଇ କହିଥିଲେ, ବିଚାର ବିଭାଗୀୟ ଅଧିକାରୀମାନଙ୍କ ଅଭିଜ୍ଞତାକୁ ଉପଯୋଗ କରି ନ୍ୟାୟିକ ବ୍ୟବସ୍ଥାକୁ ସୁଦୃଢ଼ କରିବା ସମ୍ମିଳନୀର ଉଦ୍ଦେଶ୍ୟ। ଜିଲା ଜଜ୍ ଓ ବିଚାର ବିଭାଗୀୟ ଅଧିକାରୀମାନେ ନ୍ୟାୟ ପ୍ରଦାନବେଳେ ସମୟ, ସମାନତା, ସ୍ବଚ୍ଛତା ଓ ସ୍ବାଧୀନ ନିଷ୍ପତ୍ତି ନେବା ଉପରେ ଦୃଷ୍ଟି ଦେବାକୁ ବିଚାରପତି ତାଳପତ୍ର କହିଥିଲେ। ରାଜ୍ୟର ୩୦ଟି ଜିଲାରୁ ଜିଲା ଜଜ୍, ବରିଷ୍ଠ ଅଧିକାରୀ, ରାଜ୍ୟ ଆଇନସେବା ପ୍ରାଧିକରଣର ଅଧିକାରୀ ଓ ଓଡ଼ିଶା ଜୁଡିସିଆଲ ଏକାଡେମୀର ଅଧିକାରୀମାନେ ଉପସ୍ଥିତ ଥିଲେ। ଆଡ୍ଭୋକୋଟ ଜେନେରାଲ, ଡେପୁଟି ସଲିସିଟର ଜେନେରାଲ ଅଫ୍ ଇଣ୍ଡିଆ ଫର୍ ଓଡ଼ିଶା ହାଇକୋର୍ଟ ଏବଂ ହାଇକୋର୍ଟ ବାର୍ ଆସୋସିଏଶନ୍ର କର୍ମକର୍ତ୍ତାମାନେ ଉପସ୍ଥିତ ଥିଲେ। ବିଚାରପତି ଶଶିକାନ୍ତ ମିଶ୍ର ଧନ୍ୟବାଦ ଦେଇଥିଲେ।
