ଭଞ୍ଜନଗର,୨୨।୮(ଡି.ଏନ.ଏ): ରାଜ୍ୟରେ ଅଫିସର ରାଜ ଚାଲିଛି । ନେତା ମନ୍ତ୍ରୀଙ୍କ କଥା ଅଫିସରମାନେ ଶୁଣୁନାହାନ୍ତି। ଏ ନେଇ ବିଭିନ୍ନ ସମୟରେ ବିରୋଧି ଦଳର ନେତାମାନେ ଅଭିଯୋଗ କରୁଛନ୍ତି । ଏନେଇ ଶାସକଦଳର ନେତାମାନେ ଖୋଲାଖୋଲି ଭାବେ କହିବାକୁ ସଙ୍କୋଚ କରୁଥିଲେ ମଧ୍ୟ ପରୋକ୍ଷରେ କହୁଛନ୍ତି। ବେଲଗୁଣ୍ଠା ବ୍ଲକ ଗୋବରା ପଞ୍ଚାୟତର ବିଜେଡି ସମର୍ଥିତ ସମିତିସଭ୍ୟ ବିଭୂପାଦ ଜେନା ରବିବାର ପ୍ରଧାନମନ୍ତ୍ରୀ ଗ୍ରାମ୍ୟ ସଡ଼କ ଯୋଜନାରେ ଦୁର୍ନତୀ ହେଉଥିବା ଅଭିଯୋଗ କରିଛନ୍ତି। ନିଜ ପଞ୍ଚାୟତର ଗୋବରାଠାରୁ ବରପଲ୍ଲୀ ପର୍ଯ୍ୟନ୍ତ ପ୍ରଧାନମନ୍ତ୍ରୀ ଗ୍ରାମ୍ୟ ସଡ଼କ ଯୋଜନା କାମ ଚାଲିଛି। ଦୁର୍ନତୀଗ୍ରସ୍ତ ଅଫିସରଙ୍କ ପାଇଁ କାମ ନିମ୍ନ ମାନର ହେଉଛି। ବର୍ତ୍ତମାନ ଲଗାଣ ବର୍ଷା ଯୋଗୁ ଗୋବରା ଡେଙ୍ଗାପଦର ରାସ୍ତା ଅତ୍ୟନ୍ତ କଦର୍ଯ୍ୟ ହୋଇପଡ଼ିଛି। ଉକ୍ତ ରାସ୍ତାରେ କୌଣସି ମରାମତି କରାଯାଉନାହିଁ। ଲୋକେ ଅନେକ ସମସ୍ୟାର ସମ୍ମୁଖିନ ହେଉଛନ୍ତି।
ଅଭିଯୋଗ କଲେ ଅଫିସରମାନେ ଲୋକ ପ୍ରତିନିଧି ହିସାବରେ କଥା ଶୁଣୁନାହାନ୍ତି। ତେଣୁ କେନ୍ଦ୍ର ଗ୍ରାମ୍ୟ ଉନ୍ନୟନ ମନ୍ତ୍ରୀ ସମସ୍ୟା ପ୍ରତି ଦୃଷ୍ଟିଦେଇ ତୁରନ୍ତ ପଦକ୍ଷେପ ନେବାକୁ ବିଭୁପାଦ ଚିଠି ମାଧ୍ୟମରେ ନିବେଦନ କରିଛନ୍ତି । ଏଥିସହ କେନ୍ଦ୍ର ଦୁରସଞ୍ଚାର ମନ୍ତ୍ରୀଙ୍କୁ ମଧ୍ୟ ବିଭୁପାଦ ଆଉ ଏକ ଚିଠି ଲେଖିଛନ୍ତି ।
ଉକ୍ତ ଚିଠିରେ ସେ ଉଲ୍ଲେଖ କରିଛନ୍ତି, ଗୋବରା ହେଉଛି ବ୍ଲକର ଏକ ଗୁରୁତ୍ୱପୁର୍ଣ୍ଣ ଅଞ୍ଚଳ । ଏଠାରେ ମେଡିକାଲ ସମେତ ଅନେକ କାର୍ଯ୍ୟାଳୟ ଅଛି । କିନ୍ତୁ ଗୋବରାରେ ବିଏସ୍ଏନ୍ଏଲ୍ ଟାୱାର ନାହିଁ । ଗୋବରାଠାରୁ ୨ କିମି ଦୁର ଷଢ଼ଙ୍ଗୀପଲ୍ଲୀ ଏବଂ ଅନ୍ୟପଟେ କ୍ଷତ୍ରିୟବରପୁରରେ ଟାୱାର ଅଛି। କିନ୍ତୁ ଉକ୍ତ ଟାୱାରରୁ ଗୋବରାକୁ ମୋବାଇଲ ନେଟୱର୍କ ଠିକ୍ ଭାବେ ଆସୁନାହିଁ। ତେଣୁ ଏ ନେଇ ପଦକ୍ଷେପ ନେବାକୁ ବିଭୁପାଦ କେନ୍ଦ୍ରମନ୍ତ୍ରୀଙ୍କୁ ଜଣାଇଛନ୍ତି। ଅପରପକ୍ଷେ ବିଭୂପାଦ ଉକ୍ତ ଚିଠିକୁ ମଧ୍ୟ ସୋସିଆଲ ମିଡ଼ିଆରେ ଛାଡ଼ିଛନ୍ତି। ଯାହାକୁ ନେଇ ଭିନ୍ନଭିନ୍ନ ମତ ପ୍ରକାଶ ପାଇଛି। ଅଧିକାଂଶ ବ୍ୟକ୍ତି ଏହା ଭଲ ପଦକ୍ଷେପ ବୋଲି କହିଥିବା ବେଳେ ଜଣେ ବ୍ୟକ୍ତି ଏହା ବିଭୁଙ୍କ ପାଇଁ ଘାତକ ହେବ ବୋଲି କହିଛନ୍ତି। ଗ୍ରାମ୍ୟ ଉନ୍ନୟନ ରାସ୍ତା ସମ୍ପର୍କରେ ବେଲଗୁଣ୍ଠା ଯନ୍ତ୍ରୀ କହିଛନ୍ତି, ଉକ୍ତ ରାସ୍ତା ଗୁଡ଼ିକ ପ୍ରଧାନମନ୍ତ୍ରୀ ଗ୍ରାମ୍ୟ ସଡ଼କ ଯୋଜନା ଫେଜ୍ ୩ରେ ହେଉଛି। ବର୍ଷା ଯୋଗୁ କାମ ମନ୍ଥର ଗତିରେ ଚାଲିଛି । ଉକ୍ତ କାମ ସରିବା ପାଇଁ ଆହୁରି ୩ମାସ ସମୟ ଅଛି। ଆଇନ ଅନୁଯାଇ କାମ ହେଉଛି ବୋଲି ଯନ୍ତ୍ରୀ କହିଥିଲେ।
