ଲଣ୍ଡନ, ୩।୮: କରୋନା ଭାଇରସ ସମଗ୍ର ବିଶ୍ୱରେ ବ୍ୟାପିବାରେ ଲାଗିଛି। ଏହାଦ୍ୱାରା ପ୍ରତିଦିନ ଲକ୍ଷ ଲକ୍ଷ ଲୋକ ଆକ୍ରାନ୍ତ ହେଉଥିବା ବେଳେ ମୃତ୍ୟୁ ସଂଖ୍ୟା ଦିନକୁ ଦିନ ବଢ଼ିଚାଲିଛି। ସମଗ୍ର ଦେଶ ଏହାର ଟିକା ବା ଔଷଧ ପ୍ରସ୍ତୁତ କରିବାରେ ଲାଗିପଡ଼ିଛି। ତେବେ ବ୍ରିଟେନ କରୋନା ବିରୋଧରେ ଏକ ଗୁରୁତ୍ୱପୂର୍ଣ୍ଣ ପରିବର୍ତ୍ତନ ଆଣିବାକୁ ଯାଉଛି। ଆସନ୍ତା ସପ୍ତାହରେ ବ୍ରିଟେନ ସରକାର ୨ଟି ର଼୍ୟାପିଡ୍ କରୋନା ଭାଇରସ ଟେଷ୍ଟ ଲଞ୍ଚ୍ କରିବାକୁ ଯାଉଛି। ଏହି ଦୁଇ ନୂତନ ପରୀକ୍ଷଣ ଯଥେଷ୍ଟ ଉନ୍ନତ ଏବଂ ରକ୍ଷାକାରୀ ବୋଲି କୁହାଯାଉଛି। ଏହା ଦ୍ୱାରା ଆସନ୍ତା ସପ୍ତାହରୁ ଲକ୍ଷ ଲକ୍ଷ ଲୋକଙ୍କୁ ନୂତନ ପରୀକ୍ଷା ଯୋଗାଇ ଦିଆଯିବ। ଏହି ପରୀକ୍ଷାରୁ ଲୋକେ ମାତ୍ର ୯୦ ମିନିଟରେ ଫଳାଫଳ ଜାଣିପାରିବେ। ଏଥିରୁ ଗୋଟିଏ ପରୀକ୍ଷା ଏତେ ସହଜ ଯେ, ବିମାନବନ୍ଦର, କାର୍ଯ୍ୟାଳୟ, ବିଦ୍ୟାଳୟ, ପବ୍ ଏବଂ ରେଷ୍ଟୁରାଣ୍ଟରେ ପରୀକ୍ଷା ପାଇଁ ମଧ୍ୟ ଏହା ଉପଲବ୍ଧ ହେବ। ଏକ ରିପୋର୍ଟ ଅନୁଯାୟୀ, ଏହି ନୂତନ ପରୀକ୍ଷା ବ୍ରିଟେନର ବୃହତ ଜନସଂଖ୍ୟା ପାଇଁ ସହଜ ହୋଇପାରିବ। ଏହି କାରଣରୁ ବ୍ରିଟେନର ସ୍ବାସ୍ଥ୍ୟମନ୍ତ୍ରୀ ମ୍ୟାଟ ହଂକକ୍ ରବିବାର ଏହି ନୂତନ ପରୀକ୍ଷାକୁ ‘ଜୀବନ ରକ୍ଷାକାରୀ’ ବୋଲି କହିଛନ୍ତି।
ପ୍ରାରମ୍ଭରେ ଏହି ନୂତନ ପରୀକ୍ଷା ବ୍ରିଟେନର ଜାତୀୟ ସ୍ବାସ୍ଥ୍ୟ ସେବା ସହ ଜଡିତ ଅନୁଷ୍ଠାନରେ ଉପଲବ୍ଧ ହେବ। କିନ୍ତୁ ଆସନ୍ତା କିଛି ମାସ ମଧ୍ୟରେ ଏହା ବିଭିନ୍ନ ସ୍ଥାନରେ ଲୋକମାନଙ୍କ ପାଇଁ ଉପଲବ୍ଧ ହେବ। ନୂତନ ପରୀକ୍ଷା ପଦ୍ଧତିରେ ଲକ୍ଷଣ ନ ଥିବା ଲୋକଙ୍କୁ ନିୟମିତ ପରୀକ୍ଷା କରାଯିବ। ଯଦି ରୋଗୀର କରୋନା ନ ଥିବ ତେବେ ଅନ୍ୟ ଫ୍ଲୁ ଅଛି କି ନାହିଁ ତାହା ମଧ୍ୟ ଜଣାପଡ଼ିବ।
ଏହି ନୂତନ ଟେଷ୍ଟରୁ ଗୋଟିଏ ହେଉଛି ଲ୍ୟାମ୍ପର ଟେଷ୍ଟ। ଏହା ପରୀକ୍ଷା ପାଇଁ ଲାଳ ଆବଶ୍ୟକ କରେ। ଯେହେଲେ ସାମ୍ପ୍ରତିକ ପରୀକ୍ଷଣରେ ନାକ ଏବଂ ଗଳା ସ୍ବାବ୍ ଆବଶ୍ୟକ। ବର୍ମିଂହୋମ ବିଶ୍ୱବିଦ୍ୟାଳୟର ପ୍ରଫେସର ଏଣ୍ଡ୍ରିୟୁ ବୋଗସ୍ଙ୍କ କହିବାନୁଯାୟୀ, ଏହି ଟେଷ୍ଟ ଦ୍ୱାରା ବହୁତ କିଛି ପରିବର୍ତ୍ତନ ହେବାକୁ ଯାଉଛି।
ଦ୍ୱିତୀୟ ପରୀକ୍ଷଣର ନାମ ହେଉଛି DNANudge । ଏହି ପରୀକ୍ଷଣରେ ନାକରୁ ନିଆଯାଇଥିବା ସ୍ବାବ୍ ଏବଂ ଡିଏନ୍ଏର ବିଶ୍ଲେଷଣ କରାଯିବ। ଏହି ରିପୋର୍ଟକୁ ଆଉ ଲ୍ୟାବ୍କୁ ପଠାିବାର ଆବଶ୍ୟକତା ନାହିଁ। ଉଭୟ ପରୀକ୍ଷା ପାଇଁ ଟ୍ରେଣ୍ଡ ମେଡିକାଲ ପ୍ରଫେସନାଲମାନଙ୍କର ମଧ୍ୟ ଆବଶ୍ୟକତା ନାହିଁ।
