ଢେଙ୍କାନାଳ ଅଫିସ, ୯।୮ : ଢେଙ୍କାନାଳ ଜିଲାରେ କାୟାବିସ୍ତାର କରିବାରେ ଲାଗିଛି କରୋନା। ଶନିବାର ଦିନକରେ ୩୬ ପଜିଟିଭ୍ ଚିହ୍ନଟ ହେବାପରେ ମୋଟ୍ ଆକ୍ରାନ୍ତଙ୍କ ସଂଖ୍ୟା ୫୨୯ରେ ପହଞ୍ଚତ୍ଛି। ସେହିପରି ୪୭ଜଣ ସୁସ୍ଥ ହୋଇ ଫେରିଛନ୍ତି। ଏହାପରେ ଆରୋଗ୍ୟଙ୍କ ସଂଖ୍ୟା ୩୧୭ ହୋଇଛି। ନୂଆ ଆକ୍ରାନ୍ତଙ୍କ ମଧ୍ୟରେ ଓଡ଼ାପଡ଼ା ବ୍ଲକର ୨୪, ଗଁଦିଆର ୫, ଢେଙ୍କାନାଳ ପୌରାଞ୍ଚଳର ୫, ସଦର ବ୍ଲକର ଜଣେ, ଭୁବନ ଏନ୍ଏସିର ଜଣେ ଅଛନ୍ତି। ଓଡ଼ାପଡ଼ା ବ୍ଲକରୁ ଚିହ୍ନଟ ପଜିଟିଭ୍ ଭିତରୁ କେବଳ ଗୁଣ୍ଡିଚାପଡ଼ାର ୧୩ ଜଣ ଅଛନ୍ତି। ଏହାପରେ ପଞ୍ଚାୟତକୁ ଆସନ୍ତା ୯ରୁ ୧୫ ତାରିଖ ଯାଏ ଜିଲାପାଳ ଭୂମେଶ ଚନ୍ଦ୍ର ବେହେରା କଣ୍ଟେନମେଣ୍ଟ ଜୋନ୍ ଘୋଷଣା କରିଛନ୍ତି। ଆକ୍ରାନ୍ତଙ୍କ ମଧ୍ୟରୁ ୩ଜଣ ସଙ୍ଗରୋଧ କେନ୍ଦ୍ରରେ, ୨୫ଜଣ ହୋମ୍ କ୍ୱାରାଣ୍ଟାଇନରେ ଥିଲେ। ଜିଲା ଚିକିତ୍ସାଳୟରେ ଆଣ୍ଟିଜେନ୍ ଟେଷ୍ଟ ପରେ ୭ଜଣ ପଜିଟିଭ ଚିହ୍ନଟ ହୋଇଛନ୍ତି। ଅନ୍ୟଜଣେ କଟକ ଏସ୍ସିବି ମେଡିକାଲ କଲେଜରେ ଚିହ୍ନଟ ହୋଇ ସେଠାରେ ଚିକିତ୍ସିତ ହେଉଛନ୍ତି। ସମସ୍ତ ଆକ୍ରାନ୍ତଙ୍କୁ ଜିଲା କୋଭିଡ୍ ହସ୍ପିଟାଲରେ ଭର୍ତ୍ତି କରାଯାଇଛି। ସଙ୍ଗରୋଧ କେନ୍ଦ୍ର, ଆକ୍ରାନ୍ତ ରହୁଥିବା ଘର ଏବଂ ପାର୍ଶ୍ୱବର୍ତ୍ତୀ ଅଞ୍ଚଳକୁ ବିଶୋଧନ କରାଯାଇଛି।
