ନୂଆଦିଲ୍ଲୀ, ୯।୫: କରୋନା ଭୂତାଣୁ ଯୋଗୁ ଗଳାରେ ସଂକ୍ରମଣ ପରେ ଫୁସ୍ଫୁସ୍ ସଂକ୍ରମିତ ହୋଇଥାଏ। ତେବେ ଏବେ କରୋନା ଭୂତାଣୁ ସଂକ୍ରମଣ ଯୋଗୁ କେତେକଙ୍କଠାରେ ହାର୍ଟ ସମସ୍ୟା ଦେଖାଦେଉଛି। କେତେକ ଲୋକଙ୍କ ମଧ୍ୟ ଏହାଯୋଗୁ ମୃତ୍ୟୁ ଘଟି ସାରିଛି। ଏସମ୍ପର୍କରେ ହୃଦ୍ରୋଗ ବିଶେଷଜ୍ଞ ଡ. ନୀରଜ୍ କୁମାର କୁହନ୍ତି ଯେ, କରୋନା ସଂକ୍ରମଣ ଯୋଗୁ ଶରୀରର ରକ୍ତବାହୀ ନଳୀରେ ରକ୍ତ ଜମାଟ ବାନ୍ଧିବା ଆରମ୍ଭ କରିଥାଏ। ଫଳରେ ହାର୍ଟରେ ଆବଶ୍ୟକ ଅନୁସାରେ ରକ୍ତ ପହଞ୍ଚିପାରେ ନାହିଁ। ଏହାଯୋଗୁ ଶରୀରର ବିଭିନ୍ନ ଅଙ୍ଗ ପ୍ରତ୍ୟଙ୍ଗରେ ରକ୍ତ ଯୋଗାଣ କାର୍ଯ୍ୟରେ ବାଧା ସୃଷ୍ଟି ହୋଇଥାଏ। ରକ୍ତ ଯୋଗାଣ କମ୍ ହେବା ଯୋଗୁ ହାର୍ଟର ପମ୍ପିଂ କ୍ଷମତା ୩୦ରୁ ୪୦ ପ୍ରତିଶତ କମି ଯାଇଥାଏ ବୋଲି ସେ କହିଛନ୍ତି। ଫଳରେ ହାର୍ଟ ମାଂସପେଶୀରେ ଯନ୍ତ୍ରଣା ହୋଇଥାଏ। ଏହାଯୋଗୁ ପରବର୍ତ୍ତୀ ସମୟରେ ହାର୍ଟ ଆଟାକ୍ ହୋଇଥାଏ। ସେହିପରି ହୃଦ୍ରୋଗ ବିଶେଷଜ୍ଞ ଡ.ଅନୀଲ ବର୍ମା କହିଛନ୍ତି ଯେ, ସାଧାରଣ ହାର୍ଟ ବିଟ୍ ମିନିଟ୍ ପିଛା ୬୦ରୁ ୯୦ ମଧ୍ୟରେ ରହିଥାଏ। ମାତ୍ର କରୋନା ଭୂତାଣୁ ସଂକ୍ରମଣ ଯୋଗୁ ରକ୍ତ ଜମାଟ ବାନ୍ଧିବା ଯୋଗୁ ରକ୍ତବାହୀ ନଳୀର କ୍ଷମତା କମି ଯାଇଥାଏ। ଫଳରେ ହାର୍ଟ ବିଟ୍ ୧୧୦ରୁ ଅଧିକ ହେବାରେ ଲାଗେ। ଏହାଯୋଗୁ ଧଇଁସଇଁ ଅବସ୍ଥା ସୃଷ୍ଟି ହୋଇଥାଏ। ହସ୍ପିଟାଲକୁ ଆସୁଥିବା କେତେକ କରୋନା ଆକ୍ରାନ୍ତଙ୍କ ହାର୍ଟ ବିଟ୍ ମିନିଟ୍ ପିଛା ୧୩୦ରୁ ୧୪୦ ମଧ୍ୟରେ ରହୁଛି। ଏହାଯୋଗୁ ସେମାନଙ୍କ ଅବସ୍ଥା ସଙ୍କଟ ଜନକ ହୋଇ ପଡୁଥିବା ସେ କହିଛନ୍ତି।
