ନୂଆଦିଲ୍ଲୀ, ୧୬।୮: ଉତ୍ତର ଦିଲ୍ଲୀର ହିନ୍ଦୁରାଓ ହସ୍ପିଟାଲରେ ଭର୍ତ୍ତି ହୋଇଥିବା ଜଣେ କରୋନା ସଂକ୍ରମିତ ମହିଳା ତାଙ୍କ ତିନି ଦିନର ଶିଶୁ କନ୍ୟାକୁ ଛାଡି ପଳାଇଛନ୍ତି। ମହିଳା ଜଣକ ଫେରାର ହେବାପରେ ଡାକ୍ତରଖାନା ପ୍ରଶାସନ ଓ ପୋଲିସ ଉତ୍ତେଜନା ପ୍ରକାଶ ପାଇଛି। ଉକ୍ତ ମହିଳାଙ୍କଠାରୁ କରୋନା ସଂକ୍ରମଣ ବ୍ୟାପିବା ଆଶଙ୍କା ଅଛି। ଡକ୍ଟର ଶରତ ଚୌରସିଆଙ୍କ ଅଭିଯୋଗ ଉପରେ ପୋଲିସ ଏନେଇ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି। ଏଥିସହିତ ନିରୀହ ଶିଶୁକୁ ଡାକ୍ତରଖାନାର ନର୍ସରୀରେ ରଖାଯାଇଛି। ଡାକ୍ତର ଏବଂ ଅନ୍ୟ କର୍ମଚାରୀମାନେ ଶିଶୁର ସ୍ବାସ୍ଥ୍ୟ ଉପରେ ନଜର ରଖିଛନ୍ତି।
ପୋଲିସର ସୂଚନାନୁସାରେ, ଅଗଷ୍ଟ ୧୧ରେ ଆସିଫା ଖାତୁୁନ ନାମକ ଜଣେ ମହିଳା ଏବଂ ତାଙ୍କ ନବଜାତ ଶିଶୁ କନ୍ୟାକୁ ହିନ୍ଦୁ ରାଓ ଡାକ୍ତରଖାନାରେ ଭର୍ତ୍ତି କରାଯାଇଥିଲା। ମହିଳା ଜଣକ କସ୍ତୁରବା ଗାନ୍ଧୀ ଡାକ୍ତରଖାନାରେ ଏକ ଝିଅକୁ ଜନ୍ମ ଦେଇଥିଲେ। କିନ୍ତୁ ମହିଳାଙ୍କ କରୋନା ରିପୋର୍ଟ ପଜିଟିଭ୍ ଆସିବା ପରେ ମା- ଝିଇକୁ ହିନ୍ଦୁ ରାଓ ଡାକ୍ତରଖାନାକୁ ପଠାଯାଇଥିଲା। ଶିଶୁଟି ନର୍ସରୀରେ ଥିବାବେଳେ ମା ଆସିଫାଙ୍କୁ କରୋନା ୱାର୍ଡରେ ଭର୍ତ୍ତି କରାଯାଇଥିଲା। ଅଗଷ୍ଟ ୧୨ ରାତିରେ ପ୍ରାୟ ୪ଟାବେଳେ ଝିଅକୁ ଛାଡି ଆସିଫା କେଉଁଆଡେ ପଳାଇ ଯାଇଛନ୍ତି। ଏହା ଜଣା ପଡିବା ମାତ୍ରେ ଡାକ୍ତରଖାନାରେ ଉତ୍ତେଜନା ଦେଖାଦେଇଥିଲା। ସଙ୍ଗେ ସଙ୍ଗେ ହସ୍ପିଟାଲର ଡାକ୍ତର ପୋଲିସକୁ ସୂଚନା ଦେଇଥିଲେ। ଡାକ୍ତରଖାନାରେ ଭର୍ତ୍ତି ହେବା ସମୟରେ ମହିଳା ଜଣକ ଔରଙ୍ଗାବାଦ ବିହାରର ଠିକଣା ପଞ୍ଜୀକୃତ କରିଥିଲେ। ତାଙ୍କ ସ୍ବାମୀଙ୍କ ନାମ ଶାହବାଜ ଆଲାମ। ଡାକ୍ତରମାନେ ମହିଳାଙ୍କଠାରୁ ଏକ ଫୋନ ନମ୍ବର ମଧ୍ୟ ନେଇଥିଲେ, କିନ୍ତୁ ମହିଳାଙ୍କ ଫେରାର ଥିବାରୁ ସେହି ନମ୍ବର ମଧ୍ୟ ବନ୍ଦ ଆସୁଛି।
