ପୁରୀ ଅଫିସ,୩୦।୫: କରୋନାର ଦ୍ୱିତୀୟ ଲହର ସମାଜର ମଧ୍ୟମ ଓ ଗରିବ ଶ୍ରେଣୀର ଜନସାଧାରଣ ପାଇଁ ଏବେ ବାଧକ ସାଜିଛି। ପୁରୀ ସହର ଏକ ପର୍ଯ୍ୟଟନସ୍ଥଳ ହୋଇଥିବାରୁ ବର୍ଷତମାମ ଏଠାକୁ ପର୍ଯ୍ୟଟକମାନେ ଆସିଥାନ୍ତି। ପର୍ଯ୍ୟଟକଙ୍କ ଉପରେ ନିର୍ଭର କରି ପୁରୀର ଅଧିକାଂଶ ଲୋକ ନିଜର ଜୀବନ ନିର୍ବାହ କରିଥାନ୍ତି। ମାତ୍ର କରୋନା କଟକଣା ଯୋଗୁ ପୁରୀକୁ ପର୍ଯ୍ୟଟକ ଆସୁ ନ ଥିବାରୁ ପର୍ଯ୍ୟଟକଙ୍କ ଉପରେ ନିର୍ଭର କରି ଚଳୁଥିବା ବ୍ୟବସାୟୀ ଏବେ ଜୀବିକା ହରାଇ ବସିଛନ୍ତି। ଏହି ସମସ୍ୟା ଭିତରୁ ବାଦ୍ ପଡ଼ିନାହାନ୍ତି ପୁରୀର ଅଟୋ ଏବଂ ଟ୍ୟାକ୍ସି ଚାଳକମାନେ। କରୋନାର ପ୍ରଥମ ଲହରରେ କଷ୍ଟେମଷ୍ଟେ ଚାଳକମାନେ ଦିନ କଟିଥିବା ବେଳେ ଏବେ ଦ୍ୱିତୀୟ ଲହର ସେମାନଙ୍କ ଆର୍ଥତ୍କ ମେରୁଦଣ୍ଡକୁ ସମ୍ପୂର୍ଣ୍ଣ ଭାବେ ଦୋହଲାଇ ଦେଇଛି। ଏପରିକି ନିଜ ପରିବାରକୁ ଦୁଇଓଳି ଖାଦ୍ୟ ଦେଇପାରୁ ନାହାନ୍ତିି।
ପୁରୀ ସହରରେ ଅଟୋ ଚଳାଇ ପେଟ ପୋଷୁଥିବା ହଜାରରୁ ଊର୍ଦ୍ଧ୍ୱ ଚାଳକ ଓ ମାଲିକମାନଙ୍କର ଏବେ ଚଳିବା କଷ୍ଟକର ହୋଇପଡ଼ିଛି। ଲକ୍ଡାଉନ, ଶଟ୍ଡାଉନ କାରଣରୁ ବେପାର ବନ୍ଦ ହୋଇଯାଇଛି। ଏପରି ସମୟରେ ଋଣ କିସ୍ତି ବୋଝ ଉପରେ ନଳିତା ବିଡ଼ା ସଦୃଶ ହୋଇଛି। ଅଧିକାଂଶ ଅଟୋ ଚାଳକଙ୍କର କିସ୍ତି ଶୁଝିବାକୁ ବାକି ରହିଛି। ସହରକୁ ପର୍ଯ୍ୟଟକ ଆସିଲେ ଅଟୋ ଚାଳକ ଦୁଇପଇସା ରୋଜଗାର କରିଥାନ୍ତି ଓ ପରିବାର ପୋଷିଥାନ୍ତି। ତେବେ ବର୍ତ୍ତମାନ ପୁରୀ ସହରକୁ କିଛି ହାତଗଣତି ଟ୍ରେନ ଚାଲୁଥିବା ବେଳେ ଶଟ୍ଡାଉନ ଓ ଲକ୍ଡାଉନ ଯୋଗୁ ପର୍ଯ୍ୟଟକ ଆସିପାରୁନାହାନ୍ତି। ଫଳରେ ରେଳ ଷ୍ଟେଶନ, ବସ୍ଷ୍ଟାଣ୍ଡ ସମଦ୍ରକୂଳ ଅଞ୍ଚଳରେ ଶତାଧିକ ଅଟୋ ଏବଂ କାର୍ ଖରାରେ ଠିଆ ହୋଇ ରହୁଥିବା ଦେଖିବାକୁ ମିଳିଛି। ଅଟୋ ଚାଲୁ ନ ଥିବାରୁ କେତେକ ଅଟୋ ମଧ୍ୟ ଖରାପ ହୋଇଗଲାଣି। ତେଣୁ କରୋନା ସମୟରେ ସହାୟତା ପ୍ରଦାନ କରିବାକୁ ଅଟୋ ଚାଳକମାନେ ରାଜ୍ୟ ସରକାରଙ୍କ ନିକଟରେ ଦାବି କରିଛନ୍ତି। ପେଟପାଟଣା ପାଇଁ ଅଟୋ ଏବଂ ଟ୍ୟାକ୍ସି କିଣିଥିଲେ ମଧ୍ୟ କରୋନାଜନିତ କଟକଣା କାରଣରୁ ଏବେ ଗାଡ଼ିଗୁଡିକୁ ପୋଷିବାକୁ ପଡୁଛି ବୋଲି ଅଟୋ ଚାଳକ ବିନୋଦ କୁମାର ସାହୁ କହିଛନ୍ତି। ପୂର୍ବରୁ ଦିନକୁ ୩୦୦ରୁ ୫୦୦ ଟଙ୍କା ଭିତରେ ରୋଜଗାର ହେଉଥିବା ବେଳେ କରୋନା କାରଣରୁ ରୋଜଗାର ସମ୍ପୂର୍ଣ୍ଣ ବନ୍ଦ ହୋଇଯାଇଛି। ଫଳରେ ଘର ଚଳାଇବା ସମ୍ଭବ ହେଉନାହିଁ। ତେଣୁ ପୁରୀ ସହରରେ ଥିବା ଅଟୋ ଏବଂ ଟ୍ୟାକ୍ସି ଚାଳକମାନଙ୍କୁ କିଛି ଆର୍ଥତ୍କ ସାହାଯ୍ୟ ଯୋଗାଇ ଦେବା ନିମନ୍ତେ ବିଭିନ୍ନ ଅଟୋ ଏବଂ ଟ୍ୟାକ୍ସି ଚାଳକ ସଂଘ ପ୍ରଶାସନକୁ ଅନୁରୋଧ କରିଛନ୍ତି।
