ଗୋପ,୬।୧(ଡି.ଏନ୍.ଏ.): ଗୋପ ବ୍ଲକ ଅଞ୍ଚଳରେ ୪ଟି ଅଙ୍ଗନଓ୍ବାଡ଼ି କେନ୍ଦ୍ରରେ ସହାୟିକା ନିଯୁକ୍ତି ନେଇ ବିବାଦ ଦେଖାଦେଇଥିଲା। ଏହାକୁ ନେଇ କେତେଜଣ ବିରୋଧୀ କେତୋଟି ଅଙ୍ଗନଓ୍ବାଡ଼ି କେନ୍ଦ୍ରରେ ତାଲା ପକାଇ ଦେଇଛନ୍ତି। ଫଳରେ ଶିଶୁମାନେ ଅଙ୍ଗନଓ୍ବାଡ଼ି କେନ୍ଦ୍ରକୁ ଆସି ଫେରୁଥିବା ଅଭିଯୋଗ ରହିଛି। ପ୍ରକାଶ ଯେ, ଗୋପ ବ୍ଲକ ଅନ୍ତର୍ଗତ ବଡ଼ତରା ପଞ୍ଚାୟତର ମଲ୍ଲ ଗ୍ରାମ କେନ୍ଦ୍ର, ବେଦପୁରର ବାଲିସାହି, ଅଣ୍ତରା-ଇଚ୍ଛାପୁରର ଦିହୁଡା ଓ ବଣହରାର ବଣହରା ଅଙ୍ଗନଓ୍ବାଡ଼ି କେନ୍ଦ୍ରରେ ସହାୟିକା ନିଯୁକ୍ତି ଲାଗି ସିଡିପିଓ କାର୍ଯ୍ୟାଳୟ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଥିଲା। ଏହି ନିଯୁକ୍ତି ପାଇଁ ସରକାରୀ ନିୟମ ଅନୁସାରେ ବିଭାଗୀୟ ଅଧିକାରୀମାନେ ଗାଁରେ ପହଞ୍ଚତ୍ ଭୋଟ ମାଧ୍ୟମରେ ନିଯୁକ୍ତି କରିବା ପରେ ବିବାଦ ଆରମ୍ଭ ହୋଇଥିଲା। ଏହାକୁ ନେଇ କେତେଜଣ ବିରୋଧୀ ଏହା ଠିକ୍ ଭାବେ ନିଯୁକ୍ତ ପ୍ରକ୍ରିୟା ହୋଇ ନ ଥିବା କହି ବାଲିସାହି ଅଙ୍ଗନଓ୍ବାଡ଼ି, ଦିହୁଡା ଅଙ୍ଗନବାଡ଼ି କେନ୍ଦ୍ରରେ ତାଲା ପକାଇଥିବାବେଳେ ପରେ ଆଉ ୨ଟି ଅଙ୍ଗନଓ୍ବାଡ଼ି କେନ୍ଦ୍ରରେ ମଧ୍ୟ ତାଲା ପକାଇଥିଲେ। ଏ ନେଇ ସିଡିପିଓ ତନୁ ପ୍ରଭା ବେଉରାଙ୍କୁ ପଚାରିବାରେ ସରକାରୀ ନିୟମ ଅନୁସାରେ ସହାୟିକା ନିଯୁକ୍ତି ଦିଆଯାଇଛି। କେନ୍ଦ୍ରରେ ତାଲା ପଡ଼ିବା କଥାରେ ବ୍ୟକ୍ତିଗତ କାମ ଯୋଗୁ ଛୁଟିରେ ଅଛି। ଅଙ୍ଗନଓ୍ବାଡ଼ି କର୍ମୀମାନଙ୍କୁ ଥାନାରେ ଅଭିଯୋଗ ଦେବା ପାଇଁ ନିର୍ଦ୍ଦେଶ ଦେଇଛି। ଏଥିସହ ଘଟଣା ସମ୍ପର୍କରେ ଉପଜିଲାପାଳଙ୍କୁ ମଧ୍ୟ ଜଣାଇଛି ବୋଲି କହିଥିଲେ।
