ନୂଆଦିଲ୍ଲୀ,୭।୮: ପଞ୍ଜାବର ମୁଖ୍ୟମନ୍ତ୍ରୀ କ୍ୟାପଟେନ ଅମରିନ୍ଦର ସିଂଙ୍କ ବିରୋଧରେ ରାଜ୍ୟସଭାର ୨ କଂଗ୍ରେସ ଏମ୍ପି ସ୍ବର ଉତ୍ତୋଳନ କରିଛନ୍ତି। ଏମାନେ ହେଲେ ପ୍ରତାପ ସିଂ ବାଜଓ୍ବା, ସମରେଶ ସିଂ ଡୁଲେ। ଶୁକ୍ରବାର ବାଜଓ୍ବା କହିଛନ୍ତି ଯଦି ରାଜ୍ୟରେ କଂଗ୍ରେସକୁ ବଞ୍ଚାଇ ରଖିବାର ଅଛି ତେବେ ମୁଖ୍ୟମନ୍ତ୍ରୀ ଅମରିନ୍ଦର ସିଂ ଓ ପ୍ରଦେଶ କଂଗ୍ରେସ କମିଟି ଅଧ୍ୟକ୍ଷ ସୁନିଲ ଜାଖଡଙ୍କୁ ସେମାନଙ୍କ ପଦରୁ ହଟାଇ ଦିଆଯାଉ। ସେ ଆହୁରି ମଧ୍ୟ କହିଛନ୍ତି ଯଦି ଏପରି କରା ନ ଯାଏ ତେବେ ସିଦ୍ଧାର୍ଥ ଶଙ୍କର ରାୟ (ପଶ୍ଚିମବଙ୍ଗର ପୂର୍ବତନ ମୁଖ୍ୟମନ୍ତ୍ରୀ)ଙ୍କ ପରେ ପଶ୍ଚିମବଙ୍ଗର ଅବସ୍ଥା ଯାହାହେଲା ପଞ୍ଜାବର ଅବସ୍ଥା ସେମିତି ହେବ। ଅନ୍ୟପଟେ ଦଳର ପ୍ରଦେଶ ପ୍ରଭାରି ଆଶା କୁମାରୀ କହିଛନ୍ତି ଏହି ୨ ଏମ୍ପିଙ୍କ ନିର୍ଣ୍ଣୟ ଏକେ ଆଣ୍ଟୋନିଙ୍କ ଅଧ୍ୟକ୍ଷତାରେ ଥିବା ଅନୁଶାସନାତ୍ମକ କାର୍ଯ୍ୟକାରୀ କମିଟି ଏହାର ବିଚାର କରିବ। ପଞ୍ଜାବର କ୍ୟାବିନେଟ ମନ୍ତ୍ରୀ ମଧ୍ୟ ଗୁରୁବାର ଏହି ଦୁଇ ଏମ୍ପିଙ୍କୁ କଂଗ୍ରେସରୁ ବହିଷ୍କାର କରିବାକୁ ଦାବି କରିଥିଲେ। କାରଣ ଥିଲା ଏମାନେ ବିଷାକ୍ତ ମଦ ମୃତ୍ୟୁ ମାମଲାରେ ସରକାରଙ୍କୁ ସମାଲୋଚନା କରିଥିଲେ।
