କୋକସରା,୨୧।୬(ଦୁଷ୍ମନ୍ତ କୁମାର ପାଟ୍ଟଯୋଷୀ): କଳାହାଣ୍ଡି ଜିଲା କୋକସରା ବ୍ଲକ ଡ଼ଙ୍ଗରିଗୁଡ଼ା ନିକଟରେ ରବିବାର ବେଆଇନ ଭାବେ ଚାଲାଣ ହେଉଥିବା ମଇଁଷି ବୋଝେଇ କଣ୍ଟେନରକୁ ପୋଲିସ ଜବତ କରିଛି। ପୋଲିସ ଘଟଣାରେ ସମ୍ପୃକ୍ତ ୨ଜଣଙ୍କୁ ଅଟକ ରଖି ପଚରାଉଚରା ଜାରି ରଖିଛି।
ମିଳିଥିବା ସୂଚନା ମୁତାବକ, କଣ୍ଟେନର ନବରଙ୍ଗପୁର ଜିଲା ରାଇଘର ଅଞ୍ଚଳରୁ ପାର୍ବତୀପୁରମକୁ ଯାଉଥିଲା। ତେବେ ୨୬ ନମ୍ବର ଜାତୀୟ ରାଜପଥର କୋକସରା ଥାନା ଡଙ୍ଗରୀଗୁଡା ନିକଟରେ ଗାଡ଼ିର ଟାୟାର ଫାଟି ଯିବାରୁ ବେଆଇନ ମଇଁଷି ଚାଲାଣ ଘଟଣା ସାମ୍ନାକୁ ଆସିଥିଲା। ତେବେ କଣ୍ଟେନର ଭିତରେ ୩୦ରୁ ଊଦ୍ଧର୍ବ ମଇଁଷି ଥିବା ବେଳେ ଠେଲାପେଲା ମଧ୍ୟରେ କେତେକ ମଇଁଷି ଗୁରୁତର ଅବସ୍ଥାରେ ଥିବା ଦେଖିବାକୁ ମିଳିଛି।
ଏନେଇ ହିନ୍ଦୁ ସଂଗଠନର କର୍ମକର୍ତ୍ତା ପୋଲିସକୁ ଖବର ଦେଇଥିଲେ। କୋକସରା ଥାନା ଅଧିକାରୀ ସୁଜ୍ଞାନ କୁମାର ବାରିକ ଘଟଣାସ୍ଥଳରେ ପହଞ୍ଚି ତଦନ୍ତ କରି କଣ୍ଟେନର ଜବତ କରିବା ସହ ୨ଜଣକୁ କାବୁ କରିଥିଲେ। ଏଥି ସହିତ ମଇଁଷିଗୁଡ଼ିକୁ ଉଦ୍ଧାର କରି ଜୁନାଗଡ଼ ସ୍ଥିତ ଗୋଶାଳାରେ ରଖାଯାଇଥିବା ଜଣାପଡିଛି।
