ନୂଆଦିଲ୍ଲୀ,୧୮।୪: କ୍ରମାଗତ ୧୦ ମାସ ହେବ ଦେଶର ହୋଲସେଲ୍ ପ୍ରାଇସ୍ ଇଣ୍ଡେକ୍ସ (ଡବ୍ଲ୍ୟୁପିଆଇ)ରେ ହ୍ରାସ ପରିଲକ୍ଷିତ ହେଉଛି। ଫଳରେ ଦରବୃଦ୍ଧି ଓ ମାନ୍ଦାବସ୍ଥା ସମୟରେ ଗ୍ରାହକଙ୍କୁ କିଛି ପରିମାଣରେ ଆଶ୍ୱସ୍ତି ମିଳୁଛି। ଏପରିକି ଚଳିତ ବର୍ଷ ମାର୍ଚ୍ଚରେ ଦେଶର ପାଇକାରୀ ମୁଦ୍ରାସ୍ଫୀତି ହାର ୧.୩୪%ରେ ପହଞ୍ଚତ୍ଛି ବୋଲି ସୋମବାର ବାଣିଜ୍ୟ ମନ୍ତ୍ରଣାଳୟ ପକ୍ଷରୁ ବିସ୍ତୃତ ସୂଚନା ଦିଆଯାଇଛି। ମନ୍ତ୍ରଣାଳୟର ସୂଚନା ଅନୁଯାୟୀ ପାଇକାରୀ ମୂଲ୍ୟ ସୂଚକାଙ୍କ ଉପରେ ଆଧାରିତ ମୁଦ୍ରାସ୍ଫୀତି ୨୦୨୩ ମାର୍ଚ୍ଚରେ ହ୍ରାସ ପାଇ ୨୯ ମାସର ସର୍ବନିମ୍ନ ସ୍ତରରେ ରହିଛି। ଏପରିକି ୨୦୨୩ ମାର୍ଚ୍ଚରେ ଡବ୍ଲ୍ୟୁପିଆଇ ୧.୩୪% ରହିଥିଲା ବେଳେ ୨୦୨୩ ଫେବୃୟାରୀରେ ଏହାର ପରିମାଣ ୩.୮୫% ଥିଲା। ସେହିଭଳି ଗହମ ଏବଂ ଡାଲି ଜାତୀୟ ସାମଗ୍ରୀରେ ଦରବୃଦ୍ଧି ୨୦୨୩ ମାର୍ଚ୍ଚରେ ଯଥାକ୍ରମେ ୯.୧୬% ଏବଂ ୩.୦୩% ରହିଛି। ଏପରିକି ପନିପରିବା ମୂଲ୍ୟରେ ଏହାର ପରିମାଣ ୨.୨୨% ରହିଥିଲା ବେଳେ ତୈଳ ଜାତୀୟ ସାମଗ୍ରୀରେ ମଧ୍ୟ ମୁଦ୍ରାସ୍ଫୀତି ୨୦୨୩ ମାର୍ଚ୍ଚରେ ୧୫.୦୫% ରହିଥିଲା। ସେହିପରି ଇନ୍ଧନ ଏବଂ ବିଜୁଳି କ୍ଷେତ୍ରରେ ମୁଦ୍ରାସ୍ଫୀତି ୨୦୨୩ ମାର୍ଚ୍ଚରେ ୮.୯୬% ରହିଛି। ଯାହା ୨୦୨୩ ଫେବୃୟାରୀରେ ୧୪.୮୨% ରହିଥିଲା ବେଳେ ବିନିର୍ମାଣ ଉତ୍ପାଦରେ ମଧ୍ୟ ମୁଦ୍ରାସ୍ଫୀତି ୨୦୨୩ ଫେବୃୟାରୀରେ ୧.୯୪% ଥିଲା। ଏହା ୨୦୨୩ ମାର୍ଚ୍ଚରେ ଖସି ୦.୭୭% ରହିଛି। ଉଲ୍ଲେଖଯୋଗ୍ୟ ଚଳିତ ବର୍ଷ ଫେବୃୟାରରେ ଖୁଚୁରା ମୁଦ୍ରାସ୍ଫୀତି ହାର କମିବା ଯୋଗୁ ଚଳିତ ବର୍ଷ ମାର୍ଚ୍ଚରେ ମଧ୍ୟ ଡବ୍ଲ୍ୟୁପିଆଇରେ ମଧ୍ୟ ହ୍ରାସ ଘଟିଛି। ଅପରପକ୍ଷରେ ମନ୍ତ୍ରଣାଳୟର ସୂଚନା ଅନୁସାରେ ଲଗାତର ୧୦ମ ମାସ ଲାଗି ପାଇକାରୀ ମୁଦ୍ରାସ୍ଫୀତି ହାରରେ ହ୍ରାସ ଘଟିଛି। ବିଶେଷ କରି ବେସିକ୍ ମେଟାଲ୍ସ, ଖାଦ୍ୟ ସାମଗ୍ରୀ ମୂଲ୍ୟରେ ହ୍ରାସ ଯୋଗୁ ଡବ୍ଲ୍ୟୁପିଆଇରେ ହ୍ରାସ ଘଟିଛି। ଏପରିକି ମୂଳ ଧାତୁ, ଖାଦ୍ୟ ପାନୀୟ ସାମଗ୍ରୀ, କପଡ଼ା, ଅଣ-ଖାଦ୍ୟ ସାମଗ୍ରୀ, ଖଣିଜ, ରବର ଏବଂ ପ୍ଲାଷ୍ଟିକ ସାମଗ୍ରୀ, ଅଶୋଧିତ ପେଟ୍ରୋଲିୟମ ଏବଂ ପ୍ରାକୃତିକ ଗ୍ୟାସ ଏବଂ କାଗଜ ଉତ୍ପାଦଗୁଡିକର ମୂଲ୍ୟରେ ହ୍ରାସ ଯୋଗୁ ମୁଦ୍ରାସ୍ଫୀତି ହାରରେ ମଧ୍ୟ ହ୍ରାସ ଘଟିଛି ବୋଲି ମନ୍ତ୍ରଣାଳୟ ପକ୍ଷରୁ କୁହାଯାଇଛି।
