ନବରଙ୍ଗପୁର,୧୯ା୯(ବି.ପ୍ର.):ନବରଙ୍ଗପୁର ଜିଲାରେ ପ୍ରଧାନମନ୍ତ୍ରୀ ଆବାସ ଯୋଜନାରେ ନିର୍ମାଣ କାର୍ଯ୍ୟ ବହୁ ପଛରେ ପଡ଼ିଛି। ଏଥିରେ ମଧ୍ୟସ୍ଥି ବାଧକ ସାଜିଥିବା ଜଣାପଡ଼ିଛି। ଗରିବ ହିତାଧିକାରୀଙ୍କ ଘର ତିଆରି କରିଦେବା ନାଁରେ ମଧ୍ୟସ୍ଥି ଟଙ୍କା ନେବାପରେ ଅଧାକାମ କରି ଧରାଛୁଆଁ ଦେଉ ନ ଥିବା ଅନେକ ହିତାଧିକାରୀଙ୍କ ଠାରୁ ଅଭିଯୋଗ ଆସୁଛି। ଏମିତିକି ପଞ୍ଚାୟତ ସ୍ତରରୁ ବ୍ଲକ ପର୍ଯ୍ୟନ୍ତ ମଧ୍ୟସ୍ଥି ନିର୍ଦ୍ଦିଷ୍ଟ ଦଳର ହୋଇଥିବାରୁ ପ୍ରଶାସନ ପକ୍ଷରୁ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ନ ଥିବା ଅଭିଯୋଗ ହେଉଛି। ଅଗଷ୍ଟ ସୁଦ୍ଧା ୨୦୧୬-୧୭ ଆର୍ଥିକ ବର୍ଷର ଏ ପର୍ଯ୍ୟନ୍ତ ୫୦୬ ଆବାସ ନିର୍ମାଣ ହୋଇପାରି ନ ଥିବା ଜଣାପଡ଼ିଛି। ସେହିପରି ୨୦୧୮-୧୯ ବର୍ଷର ୬୭୧, ୨୦୧୯-୨୦ ବର୍ଷର ୪୪୫, ୨୦୧୯-୨୦ ବର୍ଷର ୩୧୫୩, ୨୦୨୦-୨୧ ବର୍ଷର ୧୦୩୫ ହିତାଧିକାରୀଙ୍କ ପ୍ରଧାନମନ୍ତ୍ରୀ ଆବାସ ଯୋଜନା ଗୃହ ନିର୍ମାଣ କାର୍ଯ୍ୟ ସମ୍ପୂର୍ଣ୍ଣ ହୋଇ ନ ଥିବା ଜିଲାପରିଷଦ କାର୍ଯ୍ୟାଳୟ ପକ୍ଷରୁ ସୂଚନା ମିଳିଛି।
ଗୁରୁତ୍ୱପୂର୍ଣ୍ଣ ବିଷୟ ହେଲା ଗୃହ ନିର୍ମାଣ ନିମନ୍ତେ ଟଙ୍କା ହିତାଧିକାରୀଙ୍କ ପାଖକୁ ଆସୁଛି। ହିତାଧିକାରୀ ନିଜେ କାମ କରିବାରେ ଅସମର୍ଥ ହେବା ଯୋଗୁ ମଧ୍ୟସ୍ଥିଙ୍କୁ ଟଙ୍କା ଦେଉଛନ୍ତି। ପରେ ମଧ୍ୟସ୍ଥି ଟଙ୍କା ନେଇ ବର୍ଷବର୍ଷ ଧରି ଗୃହ ନିର୍ମାଣ କାର୍ଯ୍ୟ ସାରୁ ନ ଥିବା ଜଣାପଡ଼ିଛି। ଏଭଳି ପରିସ୍ଥିତିରେ ପ୍ରଶାସନ ମଧ୍ୟ ହାତବାନ୍ଧି ଟାର୍ଗେଟ ପୂରଣ ଅପେକ୍ଷାରେ ରହିବାକୁ ବାଧ୍ୟ ହେଉଛି। ପ୍ରକୃତ ହିତାଧିକାରୀ ଘର ଖଣ୍ଡିଏ ପାଇବା ପରେ ବହୁ ଖୁସିଥିବା ବେଳେ ମଧ୍ୟସ୍ଥି ଯୋଗୁ ଘରକାମ ସମ୍ପୂର୍ଣ୍ଣ ହୋଇ ପାରୁନାହିଁ। ଆର୍ଥିକ ସ୍ଥିତି ଦୁର୍ବଳ ଥିବା ହିତଧିକାରୀ ନିଜେ ଘର ନିର୍ମାଣରେ ସମର୍ଥ ହୋଇପାରୁ ନାହାନ୍ତି। ବୟସ୍କ ଲୋକଙ୍କ ଆବାସ ନିର୍ମାଣ ପାଇଁ ମଧ୍ୟସ୍ଥିଙ୍କ ପ୍ରବେଶ ଏବଂ ହିତାଧିକାରୀଙ୍କ ନାମରେ ଆସିଥିବା ଟଙ୍କା ଉଠାଇ ନିର୍ମାଣ କାମ ଅଧାରେ ଅଟକିବା ଏବେ ମୁଖ୍ୟ ସମସ୍ୟା ହୋଇଛି। ଅନ୍ୟପକ୍ଷରେ ବାର୍ଦ୍ଧକ୍ୟ ଜନିତ କାରଣରୁ ହିତାଧିକାରୀ ମଧ୍ୟ ବ୍ଲକ, ଜିଲା କାର୍ଯ୍ୟାଳୟକୁ ଆସି ଅଭିଯୋଗ କରିବାରେ ଅସମର୍ଥ ହେଉଛନ୍ତି। ଫଳରେ ଟଙ୍କା ଉଠାଇ ଛୁ ମାରିଥିବା ମଧ୍ୟସ୍ଥିଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଇ ପାରୁନି। ଏ ନେଇ ଜିଲା ପରିଷଦ ନିର୍ବାହୀ ଅଧିକାରୀ ରତ୍ନାକର ସାହୁଙ୍କୁ ପଚାରିବାରୁ ସେ କହିଛନ୍ତି, ହିତାଧିକାରୀଙ୍କ ସିଧାସଳଖ ଟଙ୍କା ଦିଆଯାଉଛି। ସେମାନେ ମଧ୍ୟସ୍ଥି ଜରିଆରେ କାମ କରୁଥିବାରୁ ପ୍ରଶାସନ ମଧ୍ୟ ଉପାୟଶୂନ୍ୟ ହୋଇପଡ଼ୁଛି। ତଥାପି ବିଡିଓ ମାନଙ୍କୁ ଶୀଘ୍ର ଟାର୍ଗେଟ ପୂରଣ କରିବା ନିମନ୍ତେ ନିର୍ଦ୍ଦେଶ ଦିଆଯାଇଥିବା ସେ କହିଛନ୍ତି।
