ଭୁବନ, ୧୯।୯(ଡି.ଏନ୍.ଏ.):ମଣିଷ-ଭାରବାହୀ ପ୍ରାଣୀଙ୍କ ମଧ୍ୟରେ ରହିଥିବା ମଧୁର ସମ୍ପର୍କର ପ୍ରତିଫଳନ ଐତିହାସିକ ବଳଦଯାତ୍ରା। ବାଣିଜ୍ୟ ପରମ୍ପରାକୁ ନେଇ ପିଢ଼ି ପରେ ପିଢ଼ି ଶାରଦୀୟ ଦୁର୍ଗାପୂଜାରେ ଆୟୋଜିତ ହୋଇଆସୁଛି ଏହି ପ୍ରସିଦ୍ଧ ପର୍ବ। କରୋନା ମହାମାରୀ ପ୍ରଭାବିତ ବିଶ୍ୱରେ ଦୀର୍ଘ ଦୁଇବର୍ଷ ହେଲା ଏଭଳି ସଂସ୍କୃତିସମ୍ପନ୍ନ ଯାତ୍ରା ହୋଇପାରି ନ ଥିବାବେଳେ ଚଳିତବର୍ଷ ଆଡ଼ମ୍ବର ସହକାରେ ପାଳନ ହେବ ବୋଲି ନିଷ୍ପତ୍ତି ହୋଇଛି। ମା’ଙ୍କ ଆବାହନକୁ ହାତଗଣତି ଦିନ ବାକି ରହିଥିବାବେଳେ ଏହାକୁ ନେଇ ଚଳଚଞ୍ଚଳ ହୋଇଉଠିଛି କଳାସଂସ୍କୃତିର ସହର ଭୁବନ। ଅଞ୍ଚଳର ଅନ୍ୟତମ ପୁରାତନ ପୂଜା ପ୍ରତିଷ୍ଠାନ ଗୁଜୁରୀହାଟ ଦେଶ ଦୁର୍ଗାମେଢ଼ ଏଥିରେ ନିଜକୁ ସାମିଲ କରିଛି। ସୀମିତ ସମ୍ବଳ ସତ୍ତ୍ୱେ ୨୫ଜଣ ବ୍ୟବସାୟୀ ୫୬ ବର୍ଷର ପରମ୍ପରାକୁ ବଞ୍ଚାଇ ରଖିବାକୁ ପ୍ରାଣପଣେ ଉଦ୍ୟମ ଚଳାଇଛନ୍ତି। କମ୍ ବଜେଟରେ ପୂଜା ହେଉଥିଲେ ହେଁ ଯେପରି ମା’ଙ୍କ ନୀତିକାନ୍ତିରେ କାଟ୍ଛାଣ୍ଟ ନ ହୁଏ, ସେଥିପ୍ରତି ସର୍ବାଧିକ ଗୁରୁତ୍ୱ ଦିଆଯାଉଛି।
ପେଟ୍ରୋମାକ୍ସ ଲାଇଟ୍, ଛାମୁଣ୍ଡିଆରୁ ଆରମ୍ଭ ହୋଇଥିଲା ଭୁବନର ମା’ ଦଶଭୁଜାଙ୍କ ଶାରଦୀୟ ପୂଜା। ସହରର ଦ୍ୱିତୀୟ ପୂଜା ମଣ୍ଡପ ଗୁଜୁରୀହାଟ ଦେଶ ଦୁର୍ଗାମେଢ଼ର ପୂଜା ଆରମ୍ଭ ହୋଇଥିଲା ମାତ୍ର ୮୦୦୦ ଟଙ୍କାରୁ। ସହରର ସବୁଠାରୁ ବଡ଼ ବଜାରରେ ସେତେବେଳର ପୂଜା ବେଶ୍ ଆକର୍ଷଣୀୟ ହେଉଥିଲା। ଏଥିରେ ଅଞ୍ଚଳର ସମସ୍ତ ଜନସାଧାରଣ ସାମିଲ ହେଉଥିଲେ। ପରବର୍ତ୍ତୀ ସମୟରେ ବଜାର ବଢ଼ିବା ସହିତ ବ୍ୟବସାୟୀମାନେ ସୁବିଧା ଦୃଷ୍ଟିରୁ ନିଜ ନିଜ ପ୍ରତିଷ୍ଠାନ କରି ପୂଜା ଆରମ୍ଭ କଲେ। ଫଳରେ ଗୁଜୁରୀହାଟ ସଙ୍କୁଚିତ ହୋଇପଡ଼ିବା ସହ ବ୍ୟବସାୟୀଙ୍କ ସଂଖ୍ୟା ୨୦୦ରୁ ୨୫କୁ ହ୍ରାସ ପାଇଛି। ସମ୍ପୃକ୍ତ ବ୍ୟବସାୟୀଙ୍କ ଉଦ୍ୟମରେ ପୂଜାର ଆୟୋଜନ କରାଯାଉଥିବାବେଳେ ବଜେଟ ରହିଛି ଦେଢ଼ ଲକ୍ଷ ଟଙ୍କା।
ଅନ୍ୟପଟେ ମାଟି ଅନୁକୂଳ ପରେ ମା’ ମହିଷମର୍ଦ୍ଦିନୀଙ୍କ ମୃଣ୍ମୟୀ ପ୍ରତିମା ନିର୍ମାଣ କାର୍ଯ୍ୟ ଚାଲିଛି। ଦୀର୍ଘ ୫୪ ବର୍ଷ ଧରି ଅଞ୍ଚଳର ବରିଷ୍ଠ ମୂର୍ତ୍ତିକାର ତଥା ୪ନଂ. ଓ୍ବାର୍ଡର ସୁରେନ୍ଦ୍ର ମିଶ୍ର ମୂର୍ତ୍ତି ନିର୍ମାଣ କରୁଛନ୍ତି। ସୀମିତ ସମ୍ବଳ ମଧ୍ୟରେ ସୁନ୍ଦର ମୂର୍ତ୍ତି, ତୋରଣ, ଆଲୋକ ସାଜସଜ୍ଜାକୁ ଗୁରୁତ୍ୱ ଦିଆଯାଉଛି। ମା’ଙ୍କ ପୂଜା ଆରମ୍ଭରୁ ବିସର୍ଜନ ପର୍ଯ୍ୟନ୍ତ ପ୍ରତି ବ୍ୟବସାୟିକ ପ୍ରତିଷ୍ଠାନ ସମ୍ମୁଖରେ କଳସ ସ୍ଥାପନ କରାଯିବ। ଦଶହରାରେ ୨୦୦୦ ଶ୍ରଦ୍ଧାଳୁଙ୍କ ପାଇଁ ପ୍ରସାଦ ସେବନ ବ୍ୟବସ୍ଥା ରହିଛି। ଭସାଣିରେ ପ୍ରଶାସନର ନୀତିନିୟମକୁ ସମ୍ମାନ ଜଣାଇ ବାଜା, ସଂକୀର୍ତ୍ତନମଣ୍ଡଳୀ, ଘଣ୍ଟୁଆଙ୍କୁ ସାମିଲ କରାଯିବ ବୋଲି ନିଷ୍ପତ୍ତି ହୋଇଛି।
