ଜଗତ୍ସିଂହପୁର ଅଫିସ, ୧୯ା୯:ବରିଷ୍ଠ ବିଜେଡି ନେତା ତଥା ତିର୍ତ୍ତୋଲ ବିଧାୟକ ବିଷ୍ଣୁ ଚରଣ ଦାସଙ୍କ ବିୟୋଗ ପରେ ଏହି ଆସନ ପାଇଁ ୩।୧୧।୨୦୨୦ରେ ଉପନିର୍ବାଚନ ହୋଇଥିଲା। ଏନେଇ ରାଜନୈତିକ ପରିବେଶ ଚଳଚଞ୍ଚଳ ହୋଇଉଠିଥିଲା। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଲୋକଙ୍କ ଆସ୍ଥା ବଢ଼ାଇବା ପାଇଁ ସେମାନଙ୍କ ଦୀର୍ଘ ଦିନର ଦାବି ଥିବା ୨ଟି ସେତୁ ନିର୍ମାଣ କରିବାକୁ ସେତେବେଳେ ପ୍ରତିଶ୍ରୁତି ଦେଇଥିଲେ । ଏହି ଅନୁଯାୟୀ, ୨୮ା୯ା୨୦୨୦ରେ ମହାନଦୀ ଉପରେ ଗ୍ରାମ୍ୟ ଉନ୍ନୟନ ବିଭାଗ ପକ୍ଷରୁ ତିର୍ତ୍ତୋଲ-ପୋସଲ ଓ ପୂର୍ତ୍ତ ବିଭାଗ ଦ୍ୱାରା ଜଇପୁର-କଟିକଟା ହାଇଲେଭଲ୍ ସେତୁର ଶିଳାନ୍ୟାସ ହୋଇଥିଲା। ମୁଖ୍ୟମନ୍ତ୍ରୀଙ୍କ ଏହି ପଦକ୍ଷେପ ଉପନିର୍ବାଚନ ପାଇଁ ତିର୍ତ୍ତୋଲବାସୀଙ୍କୁ ଭେଟି ବୋଲି ଆଲୋଚନା ଜୋର ଧରିଥିଲା । କିନ୍ତୁ ଏଥିମଧ୍ୟରେ ୨ ବର୍ଷ ଅତିକ୍ରାନ୍ତ ହୋଇ ଯାଇଥିଲେ ସୁଦ୍ଧା ଉଭୟ ସେତୁ ନିର୍ମାଣ କାମ ଅଧା ହୋଇନାହିଁ । ନିର୍ମାଣ କାର୍ଯ୍ୟରେ ବିଳମ୍ବକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି।
ଶିଳାନ୍ୟାସ ସମୟରେ ତିର୍ତ୍ତୋଲ-ପୋସଲ ହାଇଲେଭଲ୍ ସେତୁ ନିର୍ମାଣ ପାଇଁ ୧୧୮.୫୬ କୋଟି ଟଙ୍କା ବ୍ୟୟ କରାଯିବ ବୋଲି ସୂଚନା ଦିଆଯାଇଥିଲା। ପାଖାପାଖି ୯୦୦ ମିଟର ଦୈର୍ଘ୍ୟ ଓ ଷ୍ଟିଲ୍ ପୋଲ ହେବାର ଥିବାରୁ ବ୍ୟୟ ଅଟକଳ ଅଧିକ ଥିବା ଜଣାଯାଇଥିଲା। କିନ୍ତୁ ପରେ ଏହି ପୋଲ ଡିଜାଇନ୍ ବଦଳିଯାଇଥିଲା। ଅର୍ଥାତ୍ ଷ୍ଟିଲ୍ ବଦଳରେ କଂକ୍ରିଟ୍ ପୋଲ କରିବାକୁ ସ୍ଥିର କରାଯାଇଥିଲା। ଫଳରେ ବ୍ୟୟ ଅଟକଳ ପାଖାପାଖି ୫୩ କୋଟି ଟଙ୍କାକୁ ଖସି ଆସିଥିଲା। ସେହିପରି ଜଇପୁର-କଟିକଟା ହାଇଲେବୁଲ୍ ସେତୁ ନିର୍ମାଣ ନିମନ୍ତେ ୮୨.୫୫ କୋଟି ଟଙ୍କା ବ୍ୟୟ ଅଟକଳ କରାଯାଇଥିଲା । ପାଖାପାଖି ୧୩୦୦ ମିଟର ଦୈର୍ଘ୍ୟ ବିଶିଷ୍ଟ ଏହି ସେତୁ ନିର୍ମାଣ ପାଇଁ ବ୍ୟୟ ଅଟକଳ ଅପରିବର୍ତ୍ତିତ ରହିଥିଲା। ଏହି ୨ଟି ସେତୁ ନିର୍ମାଣ ହେଲେ ତିର୍ତ୍ତୋଲ ସହ କଟକ ଓ କେନ୍ଦ୍ରାପଡ଼ା ଜିଲାର ୨୮ ପଞ୍ଚାୟତର ଦେଢଲକ୍ଷ ଲୋକ ଉପକୃତ ହେବେ। ଏ ସମ୍ପର୍କରେ ଜଗତ୍ସିଂହପୁର ଗ୍ରାମ୍ୟ ଉନ୍ନୟନ ନିର୍ବାହୀ ଯନ୍ତ୍ରୀ ଅନନ୍ତ ଗୋପାଳ ଶତପଥୀ ଓ ପୂର୍ତ୍ତ ବିଭାଗ ନିର୍ବାହୀ ଯନ୍ତ୍ରୀ ନିମାଇଁ ଚରଣ ଦାସଙ୍କୁ ପଚାରିବାରୁ ପୋଲ ଖୁଣ୍ଟି ପାଇଁ ୱେଲ୍ ନିର୍ମାଣ ଆପାତତଃ ସରିଛି । ବନ୍ୟା ଯୋଗୁ କାମ ଅଟକିଛି । ବର୍ଷାଦିନ ସରିଲେ ଅର୍ଥାତ୍ ଦଶହରା ପରେ ପୁଣି କାମ ଆରମ୍ଭ ହେବ । ଏନେଇ ଆଉ ପାଖାପାଖି ୨ ବର୍ଷ ଅର୍ଥାତ୍ ୨୦୨୪ ସୁଦ୍ଧା ପୋଲ ଉଦ୍ଘାଟନ ହେବ ବୋଲି କହିଛନ୍ତି ।
