ସମ୍ବଲପୁର,୧୬।୭(ବ୍ୟୁରୋ): ସମ୍ବଲପୁର ବିଶ୍ୱବିଦ୍ୟାଳୟ (ଏସ୍ୟୁ) ଦ୍ୱାରା ପରିଚାଳିତ ଯୁକ୍ତ୩ ଶେଷବର୍ଷ ପରୀକ୍ଷାର ପ୍ରଶ୍ନପତ୍ର ଲଗାତର ଦ୍ୱିତୀୟ ଦିନ ପାଇଁ ଲିକ୍ ହୋଇଛି। ଗୁରୁବାର ଯୁକ୍ତ୩ ଶେଷବର୍ଷ ଏଜୁକେଶନ ଅନର୍ସ ପରେ ଶୁକ୍ରବାର ଫିଜିକ୍ସ ଅନର୍ସ (ଷ୍ଟାଟିଷ୍ଟିକାଲ ମେକାନିକ) ପ୍ରଶ୍ନପତ୍ର ସର୍ବସାଧାରଣରେ ପ୍ରଘଟ ହୋଇଛି। ଏହା ଜଣାପଡ଼ିବା ପରେ ବିଶ୍ୱବିଦ୍ୟାଳୟ ଅଧୀନ ୨୦୫ କଲେଜରେ ପରୀକ୍ଷା ବାତିଲ କରିଦିଆଯାଇଛି। ଫଳରେ ପ୍ରାୟ ୫ ହଜାର ଛାତ୍ରୀଛାତ୍ର ପ୍ରଭାବିତ ହୋଇଛନ୍ତି। ଏହାସହ ଏସ୍ୟୁ ପକ୍ଷରୁ ଏକ ୩ ଜଣିଆ କମିଟି ଗଠନ କରାଯାଇ ତଦନ୍ତ କରାଯାଉଛି। ପ୍ରଶ୍ନପତ୍ର ତିଆରି ହୋଇଥିବା ସ୍ଥାନରୁ ଲିକ୍ ହୋଇଥିବା ସନ୍ଦେହ କରାଯାଉଛି। କୁଳପତି ପ୍ରଫେସର ସଞ୍ଜୀବ ମିତ୍ତଲ କହିଛନ୍ତି, ପ୍ରଶ୍ନପତ୍ର ତିଆରି ଦାୟିତ୍ୱରେ ଥିବା କୁଚିଣ୍ଡା ସରକାରୀ ଆଡେଡ୍ କଲେଜର ଫିଜିକ୍ସ ଅଧ୍ୟାପକଙ୍କୁ ନୋଟିସ୍ କରାଯିବା ପରେ ସେ ଆସି ଲିଖିତ ଭାବେ ଜଣାଇଛନ୍ତି। ଶନିବାର ପୁଣି ଉକ୍ତ କଲେଜର ଅଧ୍ୟକ୍ଷ ଓ ଅଧ୍ୟାପକଙ୍କ ସହ ପ୍ରଶ୍ନପତ୍ର ଲିକ୍ ସମ୍ପର୍କରେ ଆଲୋଚନା କରାଯିବ। ଅନ୍ୟପଟେ ପ୍ରଶ୍ନପତ୍ର ସେଟ୍ ଦାୟିତ୍ୱରେ ଥିବା ଏସ୍ୟୁର ଅଧ୍ୟାପକ ଓ ଅଧିକାରୀଙ୍କୁ ମଧ୍ୟ ପଚରାଉଚୁରା କରାଯାଉଛି। ଏଥିରେ ଯାହାର ଲିଙ୍କ୍ ଥିବା ଜଣାପଡ଼ିିବ ତାଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ବାତିଲ ହୋଇଥିବା ଏଜୁକେଶନ ପରୀକ୍ଷା ଜୁଲାଇ ୧୯ ଓ ଫିଜିକ୍ସ ପରୀକ୍ଷା ଜୁଲାଇ ୨୨ରେ ଅନୁଷ୍ଠିତ ହେବ ବୋଲି କୁଳପତି ପ୍ରଫେସର ସଞ୍ଜୀବ ମିତ୍ତଲ ସୂଚନା ଦେଇଛନ୍ତି।
କୁଳପତି ମିତ୍ତଲ ଆହୁରି କହିଛନ୍ତି, ଏହା ଏକ ଦୁର୍ଭାଗ୍ୟଜନକ ଘଟଣା। ଏ ନେଇ ବୁର୍ଲା ଥାନାରେ ଅଭିଯୋଗ କରାଯାଇଛି। ସାଇବର ଥାନାରେ ମଧ୍ୟ ଅଭିଯୋଗ ହୋଇଛି। ଦୁଇଟି ସ୍ଥାନରୁ ଲିକ୍ ହୋଇଥିବା ସନ୍ଦେହ କରାଯାଉଛି। ଦାୟିତ୍ୱରେ ଥିବା ସମସ୍ତ ଅଧିକାରୀଙ୍କୁ ନୋଟିସ୍ କରାଯାଇଛି। ଆଗକୁ ବାକି ରହିଥିବା ସମସ୍ତ ବିଷୟର ପ୍ରଶ୍ନପତ୍ରରେ ପରିବର୍ତ୍ତନ କରାଯିବ। ପୁଣିଥରେ ପ୍ରଶ୍ନପତ୍ର ତିଆରି କରାଯିବ। ତାହାକୁ ପରୀକ୍ଷାର ୧ଘଣ୍ଟା ପୂର୍ବରୁ ବିଭିନ୍ନ କଲେଜକୁ ମେଲ୍ କରାଯିବ। ସେମାନେ ପ୍ରଶ୍ନପତ୍ର ଡାଉନ୍ଲୋଡ କରି ସୁବିଧାରେ ପରୀକ୍ଷା କରିପାରିବେ। ଘଟଣାକୁ ନେଇ ସବୁ ଦିଗରୁ ତଦନ୍ତ କରାଯାଉଛି। କାର୍ଯ୍ୟାନୁଷ୍ଠାନ ମଧ୍ୟ ନିଶ୍ଚିତ ଭାବେ ଗ୍ରହଣ କରାଯିବ ବୋଲି କୁଳପତି ମିତ୍ତଲ କହିଛନ୍ତି।
