ନୂଆଦିଲ୍ଲୀ,୨୨ ।୯: ବଂଶବାଦକୁ ନେଇ ସବୁବେଳେ ଟାର୍ଗେଟରେ ରହୁଥିବା କଂଗ୍ରେସରେ ୨୪ ବର୍ଷ ପରେ ପୁଣିଥରେ ଗାନ୍ଧୀ ପରିବାର ବାହାରୁ କେହି ଅଧ୍ୟକ୍ଷ ହୋଇ ପାରନ୍ତି ବୋଲି ଅନୁମାନ କରାଯାଉଛି । ଦଳ ସ୍ପଷ୍ଟ କରିଛି କି ରାହୁଲ ଗାନ୍ଧୀ ଅଧ୍ୟକ୍ଷ ପଦ ନିର୍ବାଚନ ଲଢିବେ ନାହିଁ । କଂଗ୍ରେସ ଅଧ୍ୟକ୍ଷ ପଦ ନିର୍ବାଚନ ପାଇଁ ହେବାୁ ଯାଉଥିବା ମତଦାନ ପ୍ରକ୍ରିୟା ୨୨ ସେପ୍ଟେମ୍ବରରେ ଅଧିସୂଚନା ଜାରି କରାଯାଇ କରାଯିବ । ଏଥିପାଇଁ ନାମାଙ୍କନ ୨୪ରୁ ୩୦ ସେପ୍ଟେମ୍ବର ମଧ୍ୟରେ କରାଯିବ । ଅକ୍ଟୋବର ୭ରେ ନିର୍ବାଚନ ହେବ ଓ ଏହାର ଦୁଇ ଦିନ ପରେ ଫଳାଫଳ ଆସିବ ।
କଂଗ୍ରେସ ଅଧ୍ୟକ୍ଷ ପଦ ପାଇଁ ରେସର ସବୁଠୁ ଆଗରେ ଥିବା ରାଜସ୍ଥାନର ମୁଖ୍ୟମନ୍ତ୍ରୀ ଅଶୋକ ଗେହଲଟ ବୁଧବାର ଦିଲ୍ଲୀରେ ସୋନିଆ ଗାନ୍ଧୀଙ୍କୁ ଭେଟିଛନ୍ତି । ପ୍ରାୟ ୨ ଘଣ୍ଟାର ସାକ୍ଷାତ୍ ପରେ ଗେହଲଟ କହିଛନ୍ତି ଦଳକୁ ମଜଭୁତ କରିବାକୁ ଯେଉଁଠି ତାଙ୍କର ଆବଶ୍ୟକତା ପଡିବ ସେ ପଛକୁ ହଟିବେ ନାହିଁ । ଯଦି ଲୋକଙ୍କୁ ଲାଗୁଛି ମୁଁ ଅଧ୍ୟକ୍ଷ ପଦ ଓ ମୁଖ୍ୟମନ୍ତ୍ରୀ ପଦରେ ରହିବାର ଆବଶ୍ୟକତା ରହିଛି ତେବେ ମୁଁ ମନା କରିବି ନାହିଁ ।
କଂଗ୍ରେସ ଅଧ୍ୟକ୍ଷ ପଦ ପାଇଁ ନାମାଙ୍କନ ଆରମ୍ଭ ହେବାର ଠିକ ଗୋଟିଏ ଦିନ ପୂର୍ବରୁ ଅର୍ଥାତ୍ ୨୩ ସେପ୍ଟେମ୍ବରରେ ଭାରତ ଯୋଡୋ ଯାତ୍ରାର ବିଶ୍ରାମ ଦିନ ରାହୁଲ ସୋନିଆ ଗାନ୍ଧୀଙ୍କୁ ଭେଟିବାକୁ ଦିଲ୍ଲୀ ଆସିବେ । ଏଥିରେ ତାଙ୍କ କାର୍ଯ୍ୟକ୍ରମରେ ନାମାଙ୍କନ ସାମିଲ ନାହିଁ । ଦଳର ମହାସଚିବ ଜୟରାମ ରମେଶ କହିଛନ୍ତି, ରାହୁଲ ନାମାଙ୍କନ ସମୟରେ ୨୪ରୁ ୩୦ ପଯ୍ୟନ୍ତ ଯାତ୍ରାରେ ରହିବେ । ଏପଟେ ଦିଲ୍ଲୀରେ ବରିଷ୍ଠ ନେତାଙ୍କ ସହ ସାକ୍ଷାତ୍ ପରେ ଗେହଲଟ ଅଧ୍ୟକ୍ଷ ହେବା ଏକ ପ୍ରକାର ନିଶ୍ଚିତ ହୋଇଛି ।
ଏପଟେ ଗେହଲଟ ଏବେବି କହୁଛନ୍ତି କୋଚିରେ ରାହୁଲଙ୍କ ସହ କଥାକାର୍ତ୍ତା ସମୟରେ ସେ ରାହୁଲଙ୍କୁ ପୁଣିଥରେ ଅଧ୍ୟକ୍ଷ ହେବା ପାଇଁ ଶେଷ ଚେଷ୍ଟା କରିବେ । ଅନ୍ୟପଟେ ଶଶି ଥରୁର କେନ୍ଦ୍ରୀୟ ନିର୍ବାଚନ ପ୍ରାଧିକାରଣର ଅଧ୍ୟକ୍ଷ ମଧୁସୂଦନ ମିସ୍ତ୍ରୀଙ୍କ ସହ ସାକ୍ଷାତ୍ କରି ନାମାଙ୍କନ ଓ ରାଜ୍ୟର ପ୍ରତିନିଧିଙ୍କଠାରୁ ସମ୍ଭାବିତ ତଥ୍ୟ ନେଇଛନ୍ତି ।
