ନିମାପଡ଼ା,୧୨ା୪(ରଞ୍ଜନ ପଟ୍ଟନାୟକ): ୨୦୦୦ ପରଠାରୁ ନିମାପଡ଼ା ବିଧାନସଭା ନିର୍ବାଚନମଣ୍ଡଳୀରେ କଂଗ୍ରେସର ପ୍ରାର୍ଥୀମାନେ ନିର୍ବାଚନ ଲଢ଼ି ବିଜୟର ସ୍ବାଦ ଚାଖିନାହାନ୍ତି। ଏଥର ନିର୍ବାଚନ ତାରିଖ ଘୋଷଣା ପରେ ବି ଦଳ ଏହି ନିର୍ବାଚନମଣ୍ଡଳୀ ପାଇଁ ଏପର୍ଯ୍ୟନ୍ତ ପ୍ରାର୍ଥୀ ଘୋଷଣା କରିପାରିନାହିଁ। ଫଳରେ ନେତା ଓ କର୍ମୀମାନେ ଦ୍ୱନ୍ଦ୍ୱରେ ରହିଛନ୍ତି। କାହାକୁ ଟିକେଟ ମିଳିବ ଓ କିଏ ରେସ୍ରୁ ବାଦ୍ ପଡ଼ିବେ ସେ ନେଇ ଆଶାୟୀ ପ୍ରାର୍ଥୀଙ୍କ ଚିନ୍ତା ବଢିଯାଇଛି। ଏଥର ଦଳୀୟ ଚିହ୍ନ ପାଇବା ପାଇଁ ଆଶାୟୀମାନେ ଉଦ୍ୟମ କରୁଛନ୍ତି। ସେମାନେ ହେଲେ ଅଧ୍ୟାପକରୁ ସମାଜସେବୀ ପାଲଟିଥିବା ନିରୋଦ ବରଣ ଖୁଣ୍ଟିଆ, ଆଇନଜୀବୀ ସୁଧୀର ମହାନ୍ତି, ଜ୍ୟୋତିରଞ୍ଜନ ମହାନ୍ତି ଏବଂ ସିଦ୍ଧାର୍ଥ ରାଉତରାୟ। ନିରୋଦ ଅଧ୍ୟାପନାରୁ ଅବସର ନେବାପରେ ୨୦୦୭ରେ ପ୍ରଥମ ଥର ପାଇଁ ଭାଜପା ସମର୍ଥନରେ ସମିତିସଭ୍ୟ ଭାବେ ନିର୍ବାଚନରେ ପ୍ରତିଦ୍ବନ୍ଦ୍ୱିତା କରି ବିଜୟୀ ହୋଇଥିଲେ। ସେ ୨୦୧୯ରେ ଭାଜପା ଛାଡ଼ି ଆମ୍ ଆଦ୍ମୀ ପାର୍ଟିରେ ଯୋଗଦେଇ ପୁରୀ ସଂସଦୀୟ କ୍ଷେତ୍ରରୁ ଲଢି ପରାଜିତ ହୋଇଥିଲେ। ଏଥର ନିରୋଦ କଂଗ୍ରେସ ପକ୍ଷରୁ ବିଧାୟକ ଭାବେ ପ୍ରତିଦ୍ୱନ୍ଦ୍ୱିତା କରିବା ପାଇଁ ଆଶାୟୀ ରହିଛନ୍ତି। ସେହିଭଳି ଆଇନଜୀବୀ ସୁଧୀର ମହାନ୍ତି ପୂର୍ବରୁ ୨୦୦୯ ଓ ୨୦୧୪ ନିର୍ବାଚନରେ ବହୁଜନ ସମାଜ ପାର୍ଟି ଏବଂ ସ୍ବାଧୀନ ଭାବେ ଲଢ଼ି ପରାଜିତ ହୋଇଥିଲେ। ସେ ମଧ୍ୟ ଦଳୀୟ ଟିକେଟ ଲବିରେ ରହିଛନ୍ତି। ଜ୍ୟୋତିରଞ୍ଜନ ମହାନ୍ତି କଂଗ୍ରେସର ଜଣେ ପୁରୁଣା କର୍ମୀ। ୨୦୦୯ରେ ଉକ୍ତ ଆସନଟି ଅଣସରଂକ୍ଷିତ ହେବା ପରେ ସେହି ବର୍ଷ ଦଳୀୟ ଟିକେଟ ନିମନ୍ତେ ଉଦ୍ୟମକରି ବିଫଳ ହୋଇଥିଲେ। ସେ ୨୦୧୪ରେ ଦଳ ଛାଡି ବିଜେଡିରେ ଯୋଗ ଦେଇଥିଲେ। ୨୦୧୯ରେ ବିଜେଡି ଟିକେଟ ପାଇଁ ଉଦ୍ୟମ କରି ମଧ୍ୟ ବିଫଳ ହୋଇଥିଲେ। ଏଥର ବିଜେଡି ଛାଡ଼ି କଂଗ୍ରେସ ଟିକେଟ ହାତେଇବା ପାଇଁ ଉଦ୍ୟମ ଜାରି ରଖିଛନ୍ତି। ସବୁଠାରୁ ଗୁରୁତ୍ୱପୂର୍ଣ ବିଷୟ ହେଉଛି, ଜଟଣୀ ବିଧାୟକ ସୁରେଶ କୁମାର ରାଉତରାୟଙ୍କ ପୁଅ ସିଦ୍ଧାର୍ଥ ରାଉତରାୟ ପ୍ରାୟ ୬ମାସ କାଳ କଂଗ୍ରେସ ଟିକେଟ ଆଶାରେ ନିମାପଡ଼ା ନିର୍ବାଚନମଣ୍ଡଳୀ ବୁଲିବା ସହିତ କାର୍ଯ୍ୟାଳୟ ମଧ୍ୟ ଖୋଲିଥିଲେ। ହଠାତ ଏଥର ନିମାପଡ଼ା ନୁହେଁଁ ଜଟଣୀରୁ ନିର୍ବାଚନ ଲଢ଼ିବେ ବୋଲି ଘୋଷଣା କରି ସମସ୍ତଙ୍କୁ ଚକିତ କରିଦେଇଥିଲେ। କିଛିଦିନ ପରେ ଏବେ ପୁନର୍ବାର ସେ ନିମାପଡ଼ାରେ ସକ୍ରିୟ ଥିବା ଦେଖିବାକୁ ମିଳୁଛି। ବର୍ତ୍ତମାନ ନିମାପଡ଼ାରୁ କିଏ କଂଗ୍ରେସର ପ୍ରାର୍ଥୀ ହେବେ ସ୍ପଷ୍ଟ ହୋଇନାହିଁ। ଯାହା ଜଣାପଡୁଛି, ବିଜେଡିର ପ୍ରାର୍ଥୀ ଘୋଷଣା ପରେ ହିଁ କଂଗ୍ରେସ ତା’ର ପ୍ରାର୍ଥୀ ଘୋଷଣା କରିପାରେ ବୋଲି ରାଜନୈତିକ ସମୀକ୍ଷକ ମତ ଦେଉଛନ୍ତି। କଂଗ୍ରେସ ଟିକେଟ ଘୋଷଣା ଯେତିକି ବିଳମ୍ବ ହେଉଛି ଆଶାୟୀଙ୍କ ଛାତି ଧଡ୍ଧଡ୍ ହେବା ସହିତ କର୍ମୀଙ୍କ ମଧ୍ୟରେ ଉତ୍କଣ୍ଠା ସେତିକି ବଢ଼ିବାରେ ଲାଗିଛି।
