ନୂଆଦିଲ୍ଲୀ, ୬।୯ : ବୁଧବାର ସେପ୍ଟେମ୍ବର ୭ରେ କନ୍ୟାକୁମାରୀରେ ଏକ ମେଗା ରାଲିରେ କଂଗ୍ରେସ ଏହାର ୩,୫୭୦ କିଲୋମିଟର ଲମ୍ବା ଭାରତ ଯୋଡ ଯାତ୍ରା’ଆରମ୍ଭ କରିବ। ୫ ମାସରେ ଏହି ଯାତ୍ରା ଶେଷ ହେବ। କଂଗ୍ରେସ ଅନୁସାରେ ଆଦର୍ଶ ଏବଂ ଅର୍ଥନୈତିକ ଅସମାନତା, ସାମାଜିକ ଦ୍ରୁବିକରଣ ତଥା ରାଜନୈତିକ କେନ୍ଦ୍ରୀକରଣ ସମସ୍ୟା ବିଚାର ଧାରା ବିରୁଦ୍ଧରେ ଲଢ଼େଇ ପାଇଁ ଏହି ରାଲି କରାଯାଉଛି।
ରାହୁଲ ଗାନ୍ଧୀ ଭାରତ ଯୋଡ ଯାତ୍ରା ଆରମ୍ଭ କରିବା ପୂର୍ବରୁ ବୁଧବାର ଶ୍ରୀପେରୁମ୍ବୁଦୁରରେ ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧୀଙ୍କ ସମାଧିରେ ଏକ ପ୍ରାର୍ଥନା ସଭାରେ ଯୋଗଦେବେ। ଏହା ପରେ ସେ କନ୍ୟାକୁମାରୀରେ ଏକ କାର୍ଯ୍ୟକ୍ରମରେ ତାମିଲନାଡୁର ମୁଖ୍ୟମନ୍ତ୍ରୀ ଏମ.କେ ଷ୍ଟାଲିନ, ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟ ଏବଂ ଛତିଶଗଡ ମୁଖ୍ୟମନ୍ତ୍ରୀ ଭୁପେଶ ବାଘେଲ ଉପସ୍ଥିତରେ ଏହି ଯାତ୍ରାର ଶୁଭାରମ୍ଭ କରିବେ। ଏହି ଅବସରରେ ଖଦୀର ଜାତୀୟ ପତାକା ରାହୁଲଙ୍କୁ ହସ୍ତାନ୍ତର କରାଯିବ।
ମହାତ୍ମା ଗାନ୍ଧୀ ମଣ୍ଡପମରେ ଏହି କାର୍ଯ୍ୟକ୍ରମ ପରେ ରାହୁଲ ଗାନ୍ଧୀ ଅନ୍ୟ କଂଗ୍ରେସ ନେତାଙ୍କ ସହ ଜନ ସମାବେଶ ସ୍ଥଳକୁ ଯିବେ ଯେଉଁଠାରେ ଏହି ଯାତ୍ରା ଆନୁଷ୍ଠାନିକ ଭାବେ ଆରମ୍ଭ ହେବ। ଏକ ଭିଡିଓ ବାର୍ତ୍ତାରେ ପ୍ରିୟଙ୍କା ଗାନ୍ଧୀ ଭଦ୍ରା ଲୋକମାନଙ୍କୁ ଯଥା ସମ୍ଭବ ଯାତ୍ରାରେ ଯୋଗଦେବାକୁ ଅନୁରୋଧ କରିଛନ୍ତି। ଦେଶରେ ନକାରାତ୍ମକ ରାଜନୀତି କରାଯାଉଥିବାରୁ ଏବଂ ଲୋକମାନଙ୍କର ପ୍ରକୃତ ପ୍ରସଙ୍ଗ ଉପରେ ଆଲୋଚନା ହେଉ ନ ଥିବାରୁ ଏହି ରାଲିର ଆବଶ୍ୟକତା ରହିଛି ବୋଲି ସେ କହିଛନ୍ତି। ଦେଶରେ ଦରଦାମ୍ ବୃଦ୍ଧି ଏବଂ ବେକାରୀ ସମସ୍ୟା ଉପରେ ଧ୍ୟାନ ଦେବା ଏହି ଯାତ୍ରାର ଉଦ୍ଦେଶ୍ୟ।
ପ୍ରକାଶ ଥାଉକି, ଏହି ରାଲିରେ ଆନୁଷ୍ଠାନିକ ଭାବେ ୧୨ ଟି ରାଜ୍ୟ ଏବଂ ଦୁଇଟି କେନ୍ଦ୍ର ଶାସିତ ଅଞ୍ଚଳକୁ ଅନ୍ତର୍ଭୁକ୍ତ କରି କନ୍ୟାକୁମାରୀଠାରୁ ଶ୍ରୀନଗର ପର୍ଯ୍ୟନ୍ତ ଯାତ୍ରା ଅନୁଷ୍ଠିତ ହେବ। ପ୍ରକୃତରେ ସେପ୍ଟେମ୍ବର ୮ ରେ ସକାଳ ୭ ଟାରୁ ଏହି ଯାତ୍ରା ଆରମ୍ଭ ହେବ। ରାହୁଲ ଗାନ୍ଧୀ ଏବଂ ଅନ୍ୟାନ୍ୟ କଂଗ୍ରେସ ନେତା ଏହି ଅବସରରେ ପଦଯାତ୍ରାରେ ସାମିଲ ହେବେ। ଯାତ୍ରା ଆରମ୍ଭ ପୂର୍ବରୁ ରାହୁଲ ଗାନ୍ଧୀ କନ୍ୟାକୁମାରୀରେ ବିବେକାନନ୍ଦ ରକ ମେମୋରିଆଲ, ଥିରୁଭାଲୁଭର୍ ଷ୍ଟାଚ୍ୟୁ ଏବଂ କାମାରାଜ ମେମୋରିଆଲ ପରିଦର୍ଶନ କରିବେ।
ପଦଯାତ୍ରା ଦୁଇଟି ବ୍ୟାଚ୍ରେ ଚାଲିବ। ପ୍ରଥମ ବ୍ୟାଚ୍ ସକାଳ ୭ରୁ ପୂର୍ବାହ୍ନ ସାଢ଼େ ୧୦ ଏବଂ ଂ ଅନ୍ୟଟି ଅପରାହ୍ନ ସାଢ଼େ ୩ଟାରୁ ସନ୍ଧ୍ୟା ସାଢ଼େ ୬ଟା ପର୍ଯ୍ୟନ୍ତ। ହାରାହାରି ଯୋଜନାରେ ଦୈନିକ ୨୨ରୁ୨୩ କିଲୋମିଟର ଚାଲିବାକୁ ହେବ। କଂଗ୍ରେସ ଦାବି କରିଛି ଯେ କଶ୍ମୀରରୁ କନ୍ୟାକୁମାରୀ ଅଭିମୁଖେ ଯାତ୍ରା କୌଣସି ପ୍ରକାରେ ମନ କି ବାତ ନୁହେଁ, ବରଂ ଲୋକଙ୍କ ଚିନ୍ତା ଓ ଦାବି ଦିଲ୍ଲୀରେ ପହଞ୍ଚାଇବା ପାଇଁ ଲକ୍ଷ୍ୟ ରଖାଯାଇଛି। କଂଗ୍ରେସ ପକ୍ଷରୁ ରାହୁଲ ଗାନ୍ଧୀଙ୍କ ସମେତ ୧୧୯ ନେତାଙ୍କୁ ଭାରତ ଯାତ୍ରୀ ଭାବେ ଶ୍ରେଣୀଭୁକ୍ତ କରିଛି। ସେମାନେ କନ୍ୟାକୁମାରୀ ଠାରୁ ଶ୍ରୀନଗର ପର୍ଯ୍ୟନ୍ତ ଦୂରତା ଅତିକ୍ରମ କରିବେ।
