Posted inଜାତୀୟ

୨୦୧୩ ଟୁଇଟ୍‌କୁ ନେଇ ମୋଦିଙ୍କୁ ଘେରିଲା କଂଗ୍ରେସ

ନୂଆଦିଲ୍ଲୀ,୯।୭: ୨୦୧୩ ଏପ୍ରିଲ ୧୫ରେ ଚାଇନାର ୧ ପ୍ଲାଟୁନ ସୈନ୍ୟ ଦୌଲତବେଗ୍‌ ଓଲ୍ଡି ସୀମାରୁ ଭାରତୀୟ ଭୂଖଣ୍ଡର ୧୯ କି.ମି. ଭିତରକୁ ଅନୁପ୍ରବେଶ କରି ୪ଟି ଟେଣ୍ଟ ତିଆରି କରିଥିଲେ। ଏହାକୁ ନେଇ ଭାରତ-ଚାଇନା ସୈନ୍ୟଙ୍କ ମଧ୍ୟରେ ୨୧ ଦିନ ଧରି ମୁହଁାମୁହିଁ ପରିସ୍ଥିତି ସୃଷ୍ଟି ହୋଇଥିଲା। ଏହାର ଦୁଇମାସ ପରେ ଚାଇନା ସୈନ୍ୟ ଲଦାଖର ଚୁମାର ସେକ୍ଟରରେ ପୁଣି ଅନୁପ୍ରବେଶ କରିଥିଲେ। ଆଲୋଚନା ପରେ ଦୁଇଦେଶର ସେନା ବିବାଦୀୟ ଅଞ୍ଚଳରୁ ପଛକୁ ହଟିଥିଲେ। ତତ୍କାଳୀନ ଗୁଜରାଟ ମୁଖ୍ୟମନ୍ତ୍ରୀ ନରେନ୍ଦ୍ର ମୋଦି ସେତେବେଳେ କଂଗ୍ରେସ ନେତୃତ୍ୱାଧୀନ ଉପା ସରକାରଙ୍କୁ ଏନେଇ କାଠଗଡ଼ାରେ ଛିଡ଼ା କରାଇଥିଲେ। ନିଜ ଭୂଖଣ୍ଡରୁ ଭାରତୀୟ ଯବାନମାନଙ୍କୁ କାହିଁକି ପ୍ରତ୍ୟାହାର କଲ ବୋଲି ସେହି ସମୟରେ ମୋଦି ପ୍ରଶ୍ନ କରିଥିଲେ। ଏହାର ୭ ବର୍ଷ ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସମାନ ପ୍ରଶ୍ନ ପଚାରି ଘେରିଛି କଂଗ୍ରେସ। ୨୦୧୩ ମସିହାରେ ଉପା ସରକାର ଅମଳରେ ମୋଦିଙ୍କ ମନ୍ତବ୍ୟକୁ ସ୍ମରଣ କରାଇଦେଇଛି ବିରୋଧୀ ଦଳ। କହିଛି, ପ୍ରସଙ୍ଗ ସମାନ, ପ୍ରଶ୍ନ ସମାନ। ଏବେ ଆମ ପାଳି। ଜବାବ ଆପଣ ଦିଅନ୍ତୁ…।

ପୂର୍ବ ଲଦାଖର ଗଲଓ୍ବାନ ଉପତ୍ୟକାରେ ଭାରତୀୟ ସେନା ଓ ଚାଇନାର ପିପୁଲ୍ସ ଲିବରେଶନ ଆର୍ମି (ପିଏଲ୍‌ଏ) ମଧ୍ୟରେ ସଂଘର୍ଷ ଘଟିବାର ୨୧ ଦିନ ପରେ ପ୍ରକୃତ ନିୟନ୍ତ୍ରଣରେଖା (ଏଲ୍‌ଏସି)ରୁ ଉଭୟ ପକ୍ଷ ହଟିଛନ୍ତି। ଏହାକୁ ନେଇ ବୁଧବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଏକ ପୁରୁଣା ଟୁଇଟ୍‌କୁ ନେଇ ଭାଜପାକୁ ଟାର୍ଗେଟ କରିଛି କଂଗ୍ରେସ। ଦଳର ମୁଖପାତ୍ର ରଣଦୀପ ସୁର୍ଜଓ୍ବୋଲା ଏହି ଅବସରରେ ମୋଦିଙ୍କ ଉଦ୍ଦେଶ୍ୟରେ ଟୁଇଟ୍‌ କରି ଲେଖିଛନ୍ତି, ସମ୍ମାନନୀୟ ପ୍ରଧାନମନ୍ତ୍ରୀ, ଆପଣ ନିଜ ମନ୍ତବ୍ୟ ମନେରଖିଛନ୍ତି କି? ଆପଣଙ୍କ କଥାର କିଛି ମାନେ ଅଛି କି? ଆମ ଭୂମିରୁ ଆମ ଯବାନମାନେ କାହିଁକି ହଟୁଛନ୍ତି ତାହା ଆପଣ ଆମକୁ ଜଣାଇବେ କି ବୋଲି ସୁର୍ଜଓ୍ବୋଲା ପ୍ରଶ୍ନ କରିଛନ୍ତି।
୨୦୧୩ ମେ ୧୩ରେ ଗୁଜରାଟର ତତ୍କାଳୀନ ମୁଖ୍ୟମନ୍ତ୍ରୀ ନରେନ୍ଦ୍ର ମୋଦି କହିଥିଲେ, ଚାଇନା ନିଜ ସୈନ୍ୟଙ୍କୁ ପ୍ରତ୍ୟାହାର କରିନେଲା। କିନ୍ତୁ ଭାରତ କାହିଁକି ଭାରତୀୟ ଭୂଖଣ୍ଡରୁ ଯବାନମାନଙ୍କୁ ପ୍ରତ୍ୟାହାର କରୁଛି? ଆମେ କାହିଁକି ପଛଘୁଞ୍ଚା ଦେଉଛେ? ମୋଦିଙ୍କ ଏହି ଟୁଇଟ୍‌ ସାମ୍ନାକୁ ଆସିବା ପରେ ବରିଷ୍ଠ କଂଗ୍ରେସ ନେତା ଶଶୀ ଥରୁର ମଧ୍ୟ ଏହାକୁ ରିଟୁଇଟ୍‌ କରିଛନ୍ତି। ଏହି ପ୍ରସଙ୍ଗରେ ମୁଁ ମୋଦିଙ୍କ ସହ ଏକମତ। ପ୍ରଧାନମନ୍ତ୍ରୀ ଏହି ପ୍ରଶ୍ନର ଉତ୍ତର ଦେବା ଜରୁରୀ ବୋଲି ସେ କହିଛନ୍ତି।
କଂଗ୍ରେସ ନେତା ରାହୁଲ ଗାନ୍ଧୀ କେନ୍ଦ୍ର ସରକାରଙ୍କୁ ପ୍ରଶ୍ନ କରିଛନ୍ତି, ନୂଆଦିଲ୍ଲୀ ପକ୍ଷରୁ ସ୍ଥିତାବସ୍ଥା ଉପରେ ଜୋର୍‌ ଦିଆଗଲା ନାହିଁ କାହିଁକି? ଏବଂ ସରକାରଙ୍କ ବିବୃତିରେ ଗଲଓ୍ବାନ ଉପତ୍ୟକାର କ୍ଷେତ୍ରୀୟ ସାର୍ବଭୌମତ୍ୱ ସମ୍ପର୍କରେ କାହିଁକି ଉଲ୍ଲେଖ କରାଯାଇ ନାହିଁ। ଜାତୀୟ ସ୍ବାର୍ଥ ହେଉଛି ସର୍ବୋଚ୍ଚ ପ୍ରାଥମିକତା। ଏହାକୁ ସୁରକ୍ଷା ଦେବା ଭାରତ ସରକାରଙ୍କ କର୍ତ୍ତବ୍ୟ ହୋଇଥିବାବେଳେ ସ୍ଥିତାବସ୍ଥା ଉପରେ କାହିଁକି ଜୋର୍‌ ଦିଆଯାଉନାହିଁ? ଆମ ଭୂଖଣ୍ଡରେ ଆମର ୨୦ ନିରସ୍ତ୍ର ଯବାନଙ୍କ ହତ୍ୟାକୁ ଯଥାର୍ଥ ବୋଲି ଦର୍ଶାଇବା ପାଇଁ ଚାଇନାକୁ କାହିଁକି ସୁଯୋଗ ଦିଆଗଲା ବୋଲି ଟୁଇଟରରେ ରାହୁଲ ପ୍ରଶ୍ନ କରିଛନ୍ତି। ଭାରତର ଜାତୀୟ ସୁରକ୍ଷା ପରାମର୍ଶଦାତା (ଏନ୍‌ଏସ୍‌ଏ) ଅଜିତ୍‌ ଡୋଭାଲ ଓ ଚାଇନା ବହିର୍ବ୍ୟାପାର ମନ୍ତ୍ରୀ ଓ୍ବାଙ୍ଗ୍‌ ୟିଙ୍କ ମଧ୍ୟରେ ଆଲୋଚନା ହେବା ପରେ ଉଭୟ ଭାରତ ଓ ଚାଇନା ବହିର୍ବ୍ୟାପାର ମନ୍ତ୍ରଣାଳୟ ପକ୍ଷରୁ ପ୍ରକାଶିତ ବିବୃତିକୁ ରାହୁଲ ଟୁଇଟରରେ ଶେୟାର କରିଛନ୍ତି। ଚାଇନା ବହିର୍ବ୍ୟାପାର ମନ୍ତ୍ରଣାଳୟ ନିଜ ବିବୃତିରେ କିପରି ଗଲଓ୍ବାନ ଉପତ୍ୟକା ସମ୍ପର୍କରେ ଅବତାରଣା କରିଛି ଏବଂ ଭାରତୀୟ ପ୍ରତିପକ୍ଷ ଏହାକୁ ବାଦ୍‌ ଦେଇଛି ତାହା ମଧ୍ୟ ରାହୁଲ ଦର୍ଶାଇଛନ୍ତି। ଦୁଇଦେଶର ସେନା ମଧ୍ୟରେ ରକ୍ତାକ୍ତ ସଂଘର୍ଷରେ ୨୦ ଭାରତୀୟ ଯବାନ ଶହୀଦ ହେବା ପ୍ରସଙ୍ଗକୁ ନେଇ କଂଗ୍ରେସ ମୋଦି ସରକାରଙ୍କୁ ପ୍ରଶ୍ନ କରିଆସୁଥିବାବେଳେ ପ୍ରଧାନମନ୍ତ୍ରୀଙ୍କ ପୁରୁଣା ଟୁଇଟ୍‌ ଏହି ଘଟଣାକ୍ରମରେ ନୂଆ ଟୁଇଷ୍ଟ ଆଣିଛି।
ରାହୁଲ ଶନିବାର ପ୍ରଶ୍ନ କହିଥିଲେ, ଦେଶଭକ୍ତ ଲଦାଖବାସୀ ଚାଇନାର ଅନୁପ୍ରବେଶକୁ ନେଇ ସ୍ବର ଉତ୍ତୋଳନ କରୁଛନ୍ତି। ତେଣୁ ସରକାର ସେମାନଙ୍କ କଥା ଶୁଣନ୍ତୁୁ। କାରଣ ଲଦାଖବାସୀଙ୍କ ସତର୍କବାଣୀକୁ ଅଣଦେଖା କଲେ ଭାରତକୁ ମହଙ୍ଗା ପଡ଼ିବ। ଏହାସହ ରାହୁଲ ଏକ ସୋସିଆଲ ମିଡିଆ ରିପୋର୍ଟ ଶେୟାର କରିଛନ୍ତି, ଯେଉଁଥିରେ ଚାଇନା ଲଦାଖରେ ଭାରତୀୟ ଭୂଖଣ୍ଡ ଦଖଲ କରିଥିବା ଲଦାଖବାସୀ ଅଭିଯୋଗ ଆଣିଛନ୍ତି। ଭାରତର ସ୍ବାର୍ଥ ଦୃଷ୍ଟିରୁ ପ୍ରଧାନମନ୍ତ୍ରୀ ସେମାନଙ୍କ କଥା ଶୁଣନ୍ତୁ ବୋଲି ରାହୁଲ ଏଥିରେ ଅନୁରୋଧ କରିଥିଲେ। ପଞ୍ଜାବ ମୁଖ୍ୟମନ୍ତ୍ରୀ ଅମରିନ୍ଦର ସିଂ ମଙ୍ଗଳବାର ରାହୁଲଙ୍କୁ ସମର୍ଥନ କରିଥିଲେ। ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଜେ.ପି. ନଡ୍ଡା ରାହୁଲଙ୍କୁ ଭାରତୀୟ ଯବାନଙ୍କ ମନୋବଳ ଦୁର୍ବଳ କରୁଥିବା ଦର୍ଶାଇ ଟାର୍ଗେଟ କରିଥିଲେ। ଅମରିନ୍ଦର ଏହାର ଜବାବ ରଖି କହିଥିଲେ, ଗଲଓ୍ବାନ ଉପତ୍ୟକାର ବିଫଳତାରୁ ଲୋକଙ୍କ ଧ୍ୟାନ ହଟାଇବା ପାଇଁ କେନ୍ଦ୍ର ସରକାର ଉଦ୍ୟମ କରୁଛନ୍ତି।
ଗଲଓ୍ବାନ ଅଞ୍ଚଳର ପାଟ୍ରୋଲିଂ ପଏଣ୍ଟ ନମ୍ବର ୧୪ରୁ ଭାରତୀୟ ଓ ଚାଇନା ସୈନ୍ୟ ପଛଘୁଞ୍ଚା ଦେବା ଆରମ୍ଭ କରିଛନ୍ତି ବୋଲି କେତେକ ରିପୋର୍ଟ ପ୍ରକାଶ ପାଇଥିବାବେଳେ ପ୍ରଧାନମନ୍ତ୍ରୀ ନିଜ ପୂର୍ବ ମନ୍ତବ୍ୟକୁ ନେଇ ଦେଶବାସୀଙ୍କୁ କ୍ଷମା ମାଗନ୍ତୁ ବୋଲି ସୋମବାର କଂଗ୍ରେସ ପକ୍ଷରୁ ଦାବି କରାଯାଇଥିଲା। କାରଣ ସୋମବାର ଭର୍ଚୁଆଲ ସର୍ବଦଳୀୟ ବୈଠକକୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଥିଲେ, ଭାରତୀୟ ଭୂଖଣ୍ଡକୁ କେହି ଅନୁପ୍ରବେଶ କରିନାହାନ୍ତି ଅଥବା କେହି ଆମ ସେନାର କୌଣସି ଶିବିରକୁ ଦଖଲ କରିନାହାନ୍ତି।
ଇତିମଧ୍ୟରେ ଉଭୟ ଭାରତ ଓ ଚାଇନା ସୈନ୍ୟ ହଟ୍‌ସ୍ପ୍ରିଙ୍ଗ୍‌ ସେକ୍ଟରର ପାଟ୍ରୋଲିଂ ପଏଣ୍ଟ ୧୫ ଓ ପାଟ୍ରୋଲିଂ ପଏଣ୍ଟ ୧୭ଏ (ଗୋଗ୍ରା)ରୁ ପଛକୁ ଫେରିଥିବା ସୂଚନା ମିଳିଛି। ପ୍ରକୃତ ନିୟନ୍ତ୍ରଣରେଖା (ଏଲ୍‌ଏସି)ରେ ଉତ୍ତେଜନା ହ୍ରାସ ପାଇଁ ଦୁଇପକ୍ଷ ମଧ୍ୟରେ ସହମତି ପ୍ରକାଶ ପାଇବା ପରେ ଏପରି ପଦକ୍ଷେପ ନିଆଯାଉଥିବା କୁହାଯାଉଛି।


Enter your email to get our daily news in your inbox.

All Right Reserved By Dharitri.Com

ଭାଜପାରେ କୁଲଦୀପ: କ୍ରସ ଭୋଟିଂ କରି କଂଗ୍ରେସରୁ ହୋଇଥିଲେ ବହିଷ୍କାର

ନୂଆଦିଲ୍ଲୀ,୪।୮ ହରିୟାଣାର ପୂର୍ବତନ ବିଧାୟକ କୁଲଦୀପ ବିଷ୍ଣୋଇ ଗୁରୁବାର ଭାଜପାରେ ଯୋଗ ଦେଇଛନ୍ତି। ଦୁଇ ମାସ ପୂର୍ବରୁ ସେ ରାଜ୍ୟ ସଭା ନିର୍ବାଚନରେ ଦଳୀୟ ହୁଇପ୍‌...

ସୂର୍ଯ୍ୟ ପରାଗ ସମୟରେ ୩ ପିଲାଙ୍କୁ ମାଟିରେ ବେକ ପର୍ଯ୍ୟନ୍ତ ପୋତାଗଲା

ବେଙ୍ଗାଲୁରୁ,୨୭।୧୨: ଆଧୁନିକ ଦୁନିଆରେ ମଧ୍ୟ ମଣିଷ ମଧ୍ୟରେ ବିଭିନ୍ନ କୁସଂସ୍କାର ଏବଂ ଅନ୍ଧବିଶ୍ୱାସ ରହିଛି। ଏହାଯୋଗୁ ବହୁ ରୋଚକ ଘଟଣାମାନ ଘଟୁଛି। ଗୁରୁବାର ସୂର୍ଯ୍ୟପରାଗ ସମୟରେ...

ଅନ୍ତଃବସ୍ତ୍ର ପିନ୍ଧି ଟ୍ରେନ୍‌ ଭିତରେ ବୁଲିଲେ ବିଧାୟକ: ଆଉ ତା’ପରେ

ପାଟନା,୩।୯: ବିହାରର ଶାସକ ଦଳ ଜେଡିୟୁ ବିଧାୟକ ଗୋପାଳ ମଣ୍ଡଳ ଏବେ ଚର୍ଚ୍ଚାରେ ଅଛନ୍ତି। ସେ ଏବେ ଏଭଳି କାର୍ଯ୍ୟ କରିଛନ୍ତି ଯେ ଲୋକେ ତାଙ୍କୁ...

ରାଜ୍ୟକୁ ରିପୋର୍ଟ ମାଗିଲେ ସୁପ୍ରିମକୋର୍ଟ

ନୂଆଦିଲ୍ଲୀ, ୫ା୫: ସୁପ୍ରିମକୋର୍ଟ ପୂର୍ବତନ ବିଚାରପତିମାନଙ୍କ ପେନସନ୍‌ ସମୀକ୍ଷା ଲାଗି ପୂର୍ବରୁ ଦେଇଥିବା ନିର୍ଦ୍ଦେଶନାମାର ଅନୁପାଳନ ସମ୍ପର୍କିତ ରିପୋର୍ଟ ବୁଧବାର ଓଡ଼ିଶା ସମେତ ରାଜ୍ୟଗୁଡ଼ିକୁ ମାଗିଛନ୍ତି।...

ପୋଙ୍ଗୋଙ୍ଗରେ ଡ୍ରାଗନର ନଜର: ବ୍ୟବହାର କରୁଛି ହାଇସ୍ପିଡ୍‌ ପାଟ୍ରୋଲିଂ କ୍ରାଫ୍ଟ୍‌

ଲେହ, ୧୩।୧୦: ପୂର୍ବ ଲଦାଖର ଏଲ୍‌ଏସିରେ ଚାଇନା ଲଗାତାର ଉତ୍ତେଜନା ସୃଷ୍ଟି କରିବାରେ ଲାଗିଛି। ଭାରତୀୟ ସେନାର କଡ଼ା ଆଭିମୁଖ୍ୟକୁ ଦୃଷ୍ଟିରେ ରଖି ଚାଇନା ଏବେ...

ମମତାଙ୍କୁ ଝଟ୍‌କା, ଟିଏମ୍‌ସି ନେତା ଅନୁବ୍ରତ ମଣ୍ଡଳଙ୍କୁ ଗିରଫ କଲା ସିବିଆଇ…

କୋଲକାତା, ୧୧।୮ : ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କୁ ବଡ଼ ଝଟ୍‌କା ଲାଗିଛି। ପଶୁ ଚୋରା ଚାଲାଣ ମାମଲାରେ ଏକ ବଡ ପଦକ୍ଷେପ ନେଇ ସିବିଆଇ...

ଆସ୍ଥାଭୋଟ ବିରୋଧରେ ଯିବ ଏନ୍‌ସିପି

ମୁମ୍ବାଇ,୧୦ା୧୧(ପି.ଟି.): ମହାରାଷ୍ଟ୍ର ବିଧାନସଭାରେ ଯଦି ଆସ୍ଥାଭୋଟ ନିଆଯାଏ ତେବେ ଭାଜପା ବିରୋଧରେ ଏନ୍‌ସିପି ଭୋଟ ଦେବ ବୋଲି ଏହାର ମୁଖପାତ୍ର ନଓ୍ବାବ ମଲିକ୍‌ କହିଛନ୍ତି। ଯଦି...

ଅନୁରାଧା ପୋଡୱାଲଙ୍କ ପୁଅ ଆଦିତ୍ୟଙ୍କ ପରଲୋକ

ମୁମ୍ବାଇ,୧୨ ।୯: ବଲିଉଡ୍ ଗାୟିକା ଅନୁରାଧା ପୋଡୱାଲଙ୍କ ପୁଅ ଆଦିତ୍ୟ ପୋଡୱାଲଙ୍କ ଶନିବାର ମାତ୍ର ୩୫ ବର୍ଷ ବୟସରେ ପରଲୋକ ହୋଇଛି । କିଛିଦିନ ହେବ...

Advertisement
Archives

Model This Week